كوپتەن كۇتكەن جاڭالىق: قىزىلوردا – جەزقازعان اۆتوجولى اشىلدى

مەملەكەت باسشىسىنىڭ تاپسىرماسىن ورىنداۋ اياسىندا قىزىلوردا وبلىسى اۋماعىندا ورنالاسقان رەسپۋبليكالىق ماڭىزى بار قىزىلوردا – جەزقازعان اۆتوجولىنىڭ جاڭارتىلعان بولىگىندە نەگىزگى جۇمىستار تولىق اياقتالىپ, كولىك قوزعالىسى اشىلدى. ۇزىندىعى 216 شاقىرىم بولاتىن ۋچاسكەنىڭ 192 شاقىرىمى قايتا جاڭعىرتۋدان, ال 24 شاقىرىمى ورتاشا جوندەۋدەن ءوتتى.

جۇك تاسىمالى ارتادى

اتالعان جولدىڭ پايدالانۋعا بەرىلۋى قىزىلوردا جانە ۇلىتاۋ وبلىستارىنىڭ تۇرعىندارى ءۇشىن ايرىقشا ماڭىزدى ءارى كوپتەن كۇتكەن جاڭالىق بولدى. بۇل جوبا رەسپۋبليكانىڭ وڭتۇستىك جانە ورتالىق وڭىرلەرى اراسىنداعى كولىك بايلانىسىن نىعايتىپ, وڭىرلىك ەكونوميكانىڭ دامۋىنا, جولاۋشىلار مەن جۇك تاسىمالىنىڭ قاۋىپسىزدىگىن ارتتىرۋعا زور ۇلەس قوسادى.

«قىزىلوردا–جەزقازعان اۆتوجولىن قايتا جاڭعىرتۋ جۇمىستارى كومپانيانىڭ جۇزەگە اسىرىپ جاتقان باسىم جوبالارىنىڭ ءبىرى. قىزىلوردا وبلىسىنداعى جاڭارتىلعان ۋچاسكەنىڭ پايدالانۋعا بەرىلۋى مەردىگەر ۇيىمداردىڭ, ينجەنەرلەردىڭ جانە سالا ماماندارىنىڭ كاسىبي ءارى ۇيلەسىمدى جۇمىسىنىڭ ناتيجەسى», دەدى جولدىڭ ستراتەگيالىق ماڭىزىنا توقتالعان «قازاۆتوجول» ۇلتتىق كومپانياسىنىڭ باسقارما توراعاسى دارحان يماناشەۆ. 

قايتا جاڭعىرتۋ جۇمىستارى 2022 جىلى باستالدى. جوبا اياسىندا جولدىڭ تەحنيكالىق ساناتى III ساناتتان II ساناتقا اۋىستىرىلدى. جولدىڭ قۇرىلىسىنا بەس مەردىگەر ۇيىم تارتىلىپ, جۇمىستار بەكىتىلگەن وندىرىستىك كەستەگە ساي جۇرگىزىلدى.

جوباعا 7 زاۋىت اتسالىستى

جوباعا 600-دەن استام مامان, 400-گە جۋىق جول-قۇرىلىس تەحنيكاسى جانە جەتى اسفالتبەتون زاۋىتى جۇمىلدىرىلدى. قۇرىلىستا 2,6 ملن توننادان استام قيىرشىق تاس, شامامەن 66 مىڭ توننا بيتۋم جانە 5 مىڭ تەكشە مەتر تەمىربەتون بۇيىمدارى قولدانىلدى. سونىمەن بىرگە 2,8 ملن تەكشە مەتر جەر قازۋ جۇمىستارى ورىندالىپ, 1,2 ملن توننادان استام اسفالتبەتون قوسپاسى توسەلدى. جول بويىندا ءتورت دەمالىس الاڭى, 43 تەمىربەتون قۇبىرى جانە التى مال وتكەلى سالىندى.

«بۇل ۋچاسكەدە قوزعالىستىڭ اشىلۋى جول جۇرەتىن ۋاقىتتى ەداۋىر قىسقارتادى, وتكىزۋ قابىلەتىن ارتتىرادى جانە جول پايدالانۋشىلار ءۇشىن قولايلى ءارى قاۋىپسىز جاعداي جاسايدى. كومپانيا قالعان ۋچاسكەلەردەگى جۇمىستاردى دا جوعارى ساپامەن ءارى بەلگىلەنگەن مەرزىمدە اياقتاۋدى جالعاستىرادى»,  دەپ اتاپ ءوتتى د.يماناشەۆ. 

ۇلىتاۋ وبلىسىنداعى ۋچاسكەدە دە جۇمىستار قارقىندى جۇرگىزىلىپ جاتىر. مەردىگەر ۇيىمدار قاجەتتى تەحنيكالاردى جانە مامانداردى تولىق موبيليزاتسيالادى. جوبانى 2027 جىلدىڭ اياعىنا دەيىن اياقتاۋ جوسپارلانعان.

«قازاۆتوجول» ۇلتتىق كومپانياسى رەسپۋبليكا بويىنشا جول-كولىك ينفراقۇرىلىمىن جەتىلدىرۋگە باعىتتالعان اۋقىمدى باستامالاردى تۇراقتى تۇردە جۇزەگە اسىرىپ, ەلىمىزدىڭ كولىك جۇيەسىن دامىتۋعا جانە نەگىزگى اۆتوجولداردا ساپا مەن قاۋىپسىزدىكتىڭ جوعارى ستاندارتتارىن قامتاماسىز ەتۋگە باسىمدىق بەرىپ كەلەدى.