پوليتسەيلەرمەن قاتار وقىتۋ كۋرستارىنا پروكۋراتۋرا, سوت, جاساندى ينتەللەكت جانە تسيفرلىق دامۋ مينيسترلىگى, «استانا» حالىقارالىق قارجى ورتالىعى وكىلدەرى جانە حالىقارالىق دەڭگەيدەگى IT-ماماندارى قاتىسقان, دەپ جازادى Egemen.kz.
سوڭعى كەزدەرى قىلمىسكەرلەر زاڭسىز تابىستارىن جاسىرۋ ءۇشىن كريپتوۆاليۋتا پلاتفورمالارىن پايدالانىپ تسيفرلىق اكتيۆتەرگە اينالدىرۋعا كوشە باستاعان.
وسىعان بايلانىستى, ىشكى ىستەر ءمينيسترىنىڭ تاپسىرماسىمەن «زاڭ مەن ءتارتىپ» قاعيداتىن جۇزەگە اسىرۋ ماقساتىندا قازان-قاراشا ايلارىندا تاراز, سەمەي, ورال, قاراعاندى قالالارىندا وقىتۋ سەمينارلارى وتكىزىلىپ, ەلىمىزدىڭ بارلىق ايماعىنان 1 500-دەن استام تەرگەۋشىلەر, جەدەل ۋاكىلدەر, كريميناليستەر قاتىسقان.
Polisia.kz سايتىنىڭ حابارلاۋىنشا, سەمينارلاردىڭ قورىتىندىلارى بويىنشا كيبەرقىلمىسقا قارسى ءىس-قيمىل جۇمىستارىن جەتىلدىرۋگە باعىتتالعان ۇسىنىستار ازىرلەندى.
جالپى, سوڭعى ەكى جىلدا ينتەرنەت-الاياقتىققا قارسى كۇرەس تاسىلىنە ۇيرەتۋ سەمينارلارى ەلىمىزدىڭ باسقا قالالارىندا دا وتكىزىلىپ, 3 مىڭنان استام جەدەل-تەرگەۋ قىزمەتكەرى قامتىلعان.