سارىاعاش اۋداندىق ورتالىق اۋرۋحاناسىندا 3 ايلىق ءسابيدى مەديتسينالىق تەكسەرۋ كەزىندە مي ىشىنە قان قۇيىلعانى انىقتالعان. دارىگەرلەر شەشىمىمەن ناۋقاسقا شۇعىل وتا جاسالعان, دەپ جازادى Egemen.kz.
وتانى تۇركىستان وبلىستىق بالالار اۋرۋحاناسىنىڭ نەيروحيرۋرگ-دارىگەرلەرى جاساعان.
وبلىستىق دەنساۋلىق ساقتاۋ باسقارماسىنىڭ مالىمەتىنشە, ءسابيدىڭ مي قۋىسىنا سىرتقى درەناج ورناتۋ وپەراتسياسى ءساتتى اياقتالعان.
«وتا بارىسىندا ترەپاناتسيا جاسالىپ, ارنايى تۇتىكشە ارقىلى 3-4 مل كولەمىندەگى قان جينالعان ايماق تولىق تازارتىلدى. ءبىر اپتادان كەيىن نارەستە سارىاعاش اۋداندىق ورتالىق اۋرۋحاناسىنان تۇركىستان وبلىستىق بالالار اۋرۋحاناسىنا اۋىستىرىلدى. قازىر ونىڭ جاعدايى تۇراقتى, قاجەتتى ەم-شارا جۇرگىزىلىپ جاتىر», دەلىنگەن حابارلامادا.
ەندى دارىگەرلەر الداعى ۋاقىتتا سابيدى كومپيۋتەرلىك توموگرافياعا ءتۇسىرىپ, جاعدايىنا قاراي تۇتىكشەنى الىپ تاستاۋ نەمەسە قوسىمشا وتا جاساۋ ماسەلەسىن قاراستىرادى.