الەمدى كوزبەن كورمەسە دە جۇرەكپەن سەزەتىن ءار وقىرماننىڭ وزىندىك تاريحى مەن تاعدىرى بار. قانشا سىناق كورسە دە, ومىردەن سىنباي, ون ەكى مۇشەسى ساۋ ازاماتتارعا موتيۆاتسيا بەرەتىن وقىرماندارىمىزدىڭ ءبىز ءۇشىن ورنى بولەك.
وسى كىتاپحاناعا كەلگەننەن باستاپ, مەن زاعيپ جاندارمەن ەتەنە ارالاسىپ, ولاردىڭ ىشكى الەمىن, قىزىعۋشىلىقتارىن تەرەڭ تۇسىنۋگە مۇمكىندىك الدىم.
جامبىل وبلىستىق كوزى كورمەيتىن جانە ءالسىز كورەتىن ازاماتتار كىتاپحاناسىنىڭ باستى ماقساتى – مۇمكىندىگى شەكتەۋلى جانداردى قازىرگى زامانداعى قاجەتتى اقپاراتتى ىزدەۋگە, تاجىربيەلىك قىزمەتتى پايدالانۋعا باعىتتاۋ جانە الەۋمەتتىك مادەني ومىرگە بەيىمدەۋ. كىتاپحانا ءوز جۇمىسىن ينكليۋزيۆتى باعىتتا جۇزەگە اسىرىپ, ءاربىر وقىرمانعا جەكە كوزقاراس پەن ەرەكشە قىزمەت كورسەتۋگە ۇمتىلادى.
وڭىردە 1 وبلىستىق ارنايى كىتاپحانا جانە اۋداندىق ورتالىقتاندىرىلعان كىتاپحانالاردا 9 اۋداندىق كوزى كورمەيتىن جانە ءالسىز كورەتىن ازاماتتارعا ارنالعان بولىمدەر بار. جامبىل وبلىستىق كوزى كورمەيتىن جانە ءالسىز كورەتىن ازاماتتار كىتاپحاناسىندا 4 ءبولىم, 1 سەكتور جۇمىس ىستەپ تۇر. بىزدەگى وقىرمان سانى – 3000, ونىڭ ىشىندە زاعيپتار سانى – 935. كىتاپ قورى – 40558, ونىڭ ىشىندە مەملەكەتتىك تىلدە 19672 دانا كىتاپ بار.
كىتاپحانا جۇمىسىن ينكليۋزيۆتى باعىتتا ۇيىمداستىرۋ ءۇشىن بىرنەشە ماڭىزدى جوبالار جۇزەگە اسىرىلدى. وسى جوبالاردىڭ ناتيجەسىندە, كىتاپحانا قىزمەتى مۇگەدەكتىگى بار ادامدارعا قاجەتتى ءبىلىم بەرۋ مەن مادەنيەتتى يگەرۋ ءۇشىن كەڭ مۇمكىندىكتەر ۇسىنۋ ماقساتىندا ينكليۋزيا باعىتىنداعى 13 جوبا 2 ۇيىرمە جۇمىس ىستەيدى. «تيفلومۋزەي», «قاۋىپسىزدىكتى ساقتايىق», «Kenes time», «Tiflo-اسحانا», سەكىلدى وزگە دە جوبالاردىڭ ءبىز ءۇشىن ماڭىزى زور.
«TIFLO-اسحانا» جوباسى اياسىندا «اناما ارنالعان اق داستارحان» وبلىستىق بايقاۋى وتكىزىلدى. «ينكليۋزيا جانە تەاتر» جوباسى اياسىندا «جۇرەكپەن وقىعان شىعارمام» اتتى العاشقى ينكليۋزيۆتىك تەاتر بايقاۋى ۇيىمداستىرىلدى. وعان ءوڭىرىمىزدىڭ زاعيپ بالالارى مەن جاسوسپىرىمدەر قاتىستى.
«اۋليەاتا – كىتاپ وقيتىن ءوڭىر» جوباسى اياسىندا ۇلى جەڭىستىڭ 80 جىلدىعىنا وراي ء«بىز جەڭىستىڭ ۇرپاقتارىمىز» اتتى برايل جۇيەسىندە ەسسە جازۋدان رەسپۋبليكالىق بايقاۋى ءوتتى. بايقاۋدا قازاقستاننىڭ ءار ايماعىنان, ناقتىراق ايتساق, جامبىل وبلىسى, الماتى, پاۆلودار, استانا, شىمكەنت قالالارىنان 50-دەن استام زاعيپ قاتىسۋشىلارىنىڭ جۇمىستارى ۇسىنىلىپ, جەڭىمپاز اتانعان قاتىسۋشىلار باعالى سىيلىقتارمەن ماراپاتتالدى, ناتيجەسىندە 200 وقىرمان قاتىسىپ, 70 كىتاپ ۇسىنىلدى.
وبلىس اكىمى ەربول قاراشوكەەۆتىڭ باستاماسىمەن «اۋليەاتا – كىتاپ وقيتىن ءوڭىر» اكتسياسى اياسىندا جىل باسىنان 4 مىڭعا جۋىق وقىرماننىڭ قاتىسۋىمەن مەملەكەتتىك مەرەكەلەرگە, ايتۋلى كۇندەرگە, جازۋشىلاردىڭ, اقىندار مەن قوعام قايراتكەرلەرىنىڭ مەرەيتويلارىنا ارنالعان 122 ءىس-شارا وتكىزىلدى. كەش قوناقتارىنىڭ ەڭبەكتەرىن ناسيحاتتاۋ ماقساتىندا زاعيپتارعا ارنالعان برايل قارپىندەگى اۋدارمالارى جانە اۋديوتاسپا كىتاپتارى شىعارىلىپ وتىرادى.
وبلىستىق كوزى كورمەيتىن جانە ءالسىز كورەتىن ازاماتتار كىتاپحاناسى مۇمكىندىگى شەكتەۋلى ازاماتتارعا شەكسىز مۇمكىندىكتەر ۇسىنىپ, ولاردىڭ بولاشاققا دەگەن سەنىمىن نىعايتۋ ءۇشىن ايانباي ەڭبەك ەتىپ ءجۇر. بىزدە مۇمكىندىگى شەكتەۋلى 4 قىزمەتكەر جۇمىس ىستەيدى. ولاردىڭ ىشىندە 2011 جىلدان بەرى جۇيەلى جۇمىس اتقارىپ جۇرگەن تيفولوگيا ءبولىمىنىڭ مەڭگەرۋشىسى ەربول اققاي ۇلىنىڭ قىزمەتىنە كوپشىلىك ءدان ريزا.
ەربول اققاي ۇلىنىڭ ەڭبەكقورلىعى مەن كاسىبيلىگىنە ءسوز جوق. العاشىندا كىتاپحانا وقىرمانى بولىپ جۇرگەن ازامات, كىتاپحنادان برايل قارپىن ۇيرەنىپ باستادى. كەيىن ءوزى سەكىلدى كوز جانارىنان ايىرىلىپ, تاعدىر تاۋقىمەتىن تارتقان جاندارعا بىلگەنىن ۇيرەتۋگە كىرىستى. العاشىندا زاعيپ بالالارعا ارنالعان مەكتەپ وقۋلىقتارىن برايل قارپىنە اۋدارۋدان باستاعان ول كىتاپحانا وقىرماندارىنىڭ سۇرانىسىنا قاراي كەيىن 2 مىڭعا جۋىق كىتاپتى ءتارجىمالادى.
ەربول اققاي ۇلىنىڭ كاسىبي شەبەرلىگى مەن جۇمىسىنا دەگەن سۇيىسپەنشىلىگى ونى سالاداعى ۇزدىك مامانداردىڭ بىرىنە اينالدىردى. ول زاعيپ جاندارعا برايل قارپىندە كىتاپتار اۋدارىپ قانا قويماي, ولارعا كومپيۋتەرلىك ساۋاتتىلىقتى ۇيرەتىپ, ءاربىر وقىرمانمەن جەكە جۇمىس ىستەپ, ونىڭ رۋحاني قاجەتتىلىكتەرىن تۇسىنۋگە تىرىسادى. وسىلايشا, ول الەۋمەتتىك ينكليۋزيانى ىلگەرىلەتۋگە ءوز ۇلەسىن قوسىپ ءجۇر. ول 2019 جىلى جامبىل وبلىسىنىڭ 80 جىلدىق مەرەيتويىنا وراي «وبلىسقا سىڭگەن ەڭبەگى ءۇشىن» توسبەلگىسىن, 2021 جىلى ۇلتتىق اكادەميالىق كىتاپحاناسىنىڭ «كىتاپحانا ءىسىنىڭ ۇزدىگى» ءتوس بەلگىسىن, «رۋحاني قازىنا – 2021» فەستيۆالىندە «ۇزدىك وبلىستىق ماڭىزى بار زاعيپ جانە ناشار كورەتىن ازاماتتارعا ارنالعان كىتاپحانا قىزمەتكەرى» نوميناتسياسىن, 2024 جىلى قازاقستان رەسپۋبليكاسىنىڭ «التىن جۇلدىز» توسبەلگىسىن يەلەندى.
ارىپتەسىم, ءۇشىنشى توپ مۇگەدەگى شويرا ميرشاريپوۆانىڭ دا جۇمىسى كوڭىل توعايتادى. العاشىندا كىتاپحانا رەداكتورى بولىپ قىزمەت اتقارعان ول وقىرماندارمەن تەز ءتىل تابىسىپ, جۇمىستى جانداندىردى. كەيىن ونىڭ كاسىبي جانە ادامي قاسيەتتەرى جوعارى باعالانىپ, ابونەمەنت بولىمىنە وقىرماندارعا قىزمەت كورسەتۋ ءۇشىن اۋىستىرىلدى. كىتاپحاناشى رەتىندە شويرانىڭ ەڭ باستى قاسيەتتەرىنىڭ ءبىرى – ەمپاتيا. زاعيپ جاندار كۇندەلىكتى ومىردە كوپتەگەن قيىندىقتارعا تاپ بولادى, سوندىقتان ولارمەن جۇمىس ىستەگەندە, كىتاپحاناشى ولاردىڭ ىشكى كۇيىن ءتۇسىنىپ, قاجەتتى قولداۋ كورسەتۋى كەرەك. شويرا ءوز قىزمەتىندە وسى قاسيەتتى جوعارى دەڭگەيدە ۇستانىپ, ءار وقىرمانعا جان تانىمەن كومەكتەسەدى.
ونىڭ جۇمىسىنا ءتان ەرەكشەلىكتەردىڭ ءبىرى – وڭ قولىنان ايىرىلعانىنا قاراماستان ول ءوز جۇمىسىن كاسىبي تۇرعىدا اتقارىپ وتىر. شويرانىڭ بۇل جۇمىسىنا دەگەن ادالدىعى, كىسىلىگى ءبىزدى ءتانتى ەتپەي قويمايدى. ول دا بىرنەشە ۇلكەن ماراپاتقا يە بولدى.
قالاي دەسەك تە بىزدە ءوز ىسىنە ادال ماماندار از ەمەس. مۇمكىندىگى شەكتەۋلى بولسا دا, قارىمى شەكسىز ازاماتتاردىڭ جانكەشتىلىگى كىمگە دە بولسا ۇلگى دەپ پايىمدايمىز.
تولقىن كۇزەنوۆا, وبلىستىق كوزى كورمەيتىن جانە ءالسىز كورەتىن ازاماتتار كىتاپحاناسى ديرەكتورىنىڭ ورىنباسارى.
تاراز