حالىقارالىق ۆاليۋتا قورى (حۆق) 2025 جىلى قازاقستان ەكونوميكاسىنىڭ 6% وسەتىنىن بولجاپ وتىر, بىراق ينفلياتسيانىڭ 13%-عا دەيىن ءوسۋ قاۋپى بار ەكەنىن جانە تاپشىلىق تاۋەكەلىنىڭ ىقتيمالدىعىن ەسكەرتتى, دەپ حابارلايدى Egemen.kz.
بيىل قاراشا ايىندا قازاقستان بيلىگىمەن كونسۋلتاتسيالار وتكەن. كونسۋلتاتسيالار قورىتىندىسى بويىنشا ايتقاندا, مۇناي ءوندىرۋ كولەمىنىڭ ۇلعايۋى جانە ىشكى سۇرانىستىڭ جوعارى بولۋى ەكونوميكالىق بەلسەندىلىكتى ارتتىرادى. الايدا مۇنداي ءوسۋ – تاپشىلىق تاۋەكەلىنىڭ ىقتيمالدىعى مەن ينفلياتسيالىق قىسىمنىڭ كۇشەيۋىنە الىپ كەلۋى مۇمكىن.
Tengenomika تەلەگرام ارناسى دەرەكتەرىنە سايكەس, حۆك بولجامىنشا, 2026 جىلى ءوسىم 4,5%-عا دەيىن باياۋلايدى, ال ينفلياتسيا 11%-عا تومەندەيدى دەپ كۇتىلىپ وتىر. ورتا مەرزىمدى پەرسپەكتيۆادا ەكونوميكالىق ءوسىم 3,5% دەڭگەيىندە تۇراقتالۋى مۇمكىن, ال ينفلياتسيا 5% ماقساتتى دالىزگە ورالادى.
سىرتقى تاۋەكەلدەر:
- نەگىزگى ساۋدا سەرىكتەستەرىنىڭ سۇرانىسىنىڭ تومەندەۋى
- الەمدىك مۇناي باعاسىنىڭ قۇلدىراۋ ىقتيمالدىعى
- ەكسپورتتا ۇزىلىستەر تۋىنداۋى
ىشكى قاۋىپتەر:
- ينفراقۇرىلىمدىق جوبالاردىڭ جۇزەگە اسىرىلۋىنداعى كىدىرىستەر
- بيۋدجەت شىعىستارىن باقىلاۋدىڭ السىزدىگى
- مەملەكەتتىك كاسىپورىندار شىعىندارىنىڭ تىم جىلدام ءوسۋى
حۆق اقشا-كرەديت ساياساتىن ءارى قاراي قاتاڭداتۋدى ۇسىندى. قازىردىڭ وزىندە بازالىق مولشەرلەمە كوتەرىلىپ, بانكتەر ءۇشىن رەزەرۆتىك نورماتيۆتەر ارتتىرىلدى. سونداي-اق وتىمدىلىكتى باسقارۋ ءۇشىن قىسقا مەرزىمدى قۇرالداردى – ۇلتتىق بانكتىڭ نوتالارىن جانە قازىناشىلىق ۆەكسەلدەردى بەلسەندىرەك قولدانۋدى ۇسىندى.
فيسكالدىق ساياسات
فيسكالدىق ساياسات بويىنشا قور 2026 جىلى مۇنايعا قاتىسى جوق بيۋدجەتتىك تاپشىلىقتى قىسقارتۋ جوسپارىن جانە جاڭا سالىق كودەكسىن دايىنداۋ جۇمىسىن وڭ باعالادى. بىراق مەملەكەتتىك سەكتوردىڭ كۆازيفيسكالدىق وپەراتسيالارىن شەكتەۋ, ۇلتتىق قوردان بەرىلەتىن ترانسفەرتتەردى باقىلاۋدى كۇشەيتۋ جانە ناقتى قارىزعا قاتىستى ەرەجەلەر ەنگىزۋ قاجەتتىگىن اتاپ ءوتتى.
حۆق باعالاۋىنشا, قازاقستاننىڭ قارجى جۇيەسى تۇراقتى, بىراق تۇتىنۋشىلىق نەسيەلەۋدىڭ تىم جىلدام ءوسۋى الاڭداۋشىلىق تۋدىرادى, وعان بايلانىستى ءۇي شارۋاشىلىقتارىنىڭ قارىزدارى تۋرالى دەرەكتەردى جيناۋ جانە جاريالاۋ جۇيەسىن كۇشەيتۋ, سونداي-اق ماقساتتى رەتتەۋ شارالارىن ازىرلەۋ قاجەت.
تۇراقتى ەكونوميكالىق ءوسىم ءۇشىن حۆق قۇرىلىمدىق رەفورمالاردى جەدەلدەتۋ قاجەت دەپ سانايدى:
- ەكونوميكاداعى مەملەكەتتىڭ ۇلەسىن ازايتۋ,
- جەكە سەكتوردى دامىتۋ,
- بيزنەستىڭ قۇقىقتىق قورعالۋى مەن ينۆەستكليماتتى جاقسارتۋ,
- جەكەشەلەندىرۋدى ىلگەرىلەتۋ.
سونىمەن قاتار حۆق ءبىلىم بەرۋ, دەنساۋلىق ساقتاۋ, تسيفرلاندىرۋ جانە ينفراقۇرىلىمعا ينۆەستيتسيانى جالعاستىرۋدى ۇسىندى.