ۇلتتىق بيبليوگرافيانى جۇيەلەۋ – رۋحاني مۇرامىزدى بولاشاققا جەتكىزۋدىڭ سەنىمدى جولى. ەلىمىزدە بيبليوگرافيالىق قىزمەتتىڭ قالىپتاسۋ كەزەڭى 1933 جىلدان باستالادى دەسەك, ءدال سول جىلى 7 قازاندا قازاق كسر ورتالىق كىتاپحاناسىندا ارنايى ءبولىم قۇرىلىپ, 1934 جىلى العاشقى كورسەتكىش جارىق كورگەن بولاتىن. الماتىدا وتكەن «ۇلتتىق بيبليوگرافيانى دامىتۋ: تاجىريبە, زاماناۋي تەحنولوگيالار مەن ينتەگراتسيا ماسەلەلەرى» اتتى حالىقارالىق عىلىمي-تاجىريبەلىك كونفەرەنتسيادا ەل عىلىمىنداعى ماڭىزدى باعداردىڭ بۇگىنى مەن بولاشاعى سارالاندى.
ۇلتتىق كىتاپحانادا وربىگەن كاسىبي پىكىر الماسۋ الاڭىنا ەلىمىزدىڭ ايتۋلى عالىمدارى مەن كىتاپحاناشىلارى, بىرنەشە مەملەكەتتەن ارنايى كەلگەن جەتەكشى بيبليوگرافتار قاتىستى. ۇلتتىق كىتاپحانانىڭ 115 جىلدىعىنا, الاش قايراتكەرى مىرجاقىپ دۋلات ۇلىنىڭ 140 جىلدىق مەرەيتويىنا, ەلىمىزدىڭ كىتاپحاناتانۋ سالاسىنىڭ كورنەكتى مامانى روزا بەردىعاليەۆانىڭ 80 جاسقا تولۋىنا وراي ۇيىمداستىرىلعان ءىس-شارادا ۇلتتىق بيبليوگرافيانىڭ بۇگىنگى بەتالىسى مەن بولاشاعى تالقىلانىپ, سالاعا سەرپىن بەرەتىن بىرنەشە ۇسىنىس ايتىلدى.
وتاندىق بيبليوگرافيانىڭ ينستيتۋتسيونالدىق نەگىزدەرى مەن رۋحاني جاڭعىرۋداعى ماڭىزىنا توقتالعان عالىمدار قازىرگى كەزەڭدە دەرەكتەردى تولىق تسيفرلىق فورماتقا كوشىرۋ, ۇلتتىق ەلەكتروندى كاتالوگ قۇرۋ جانە بيبليوگرافيالىق دەرەكتەردى حالىقارالىق ستاندارتتارعا سايكەستەندىرۋ قاجەتتىگىن اتاپ ءوتتى. بۇدان بولەك, دەرەكتەردى بىرىزدەندىرۋ ءارى جاھاندىق اقپاراتتىق جۇيەلەرمەن ينتەگراتسيالاۋ, ادىستەمەلىك قولداۋدى كۇشەيتۋ, ماماندار دايارلاۋ جۇيەسىن جەتىلدىرۋ ماسەلەلەرى دە كىتاپحاناشىلار نازارىنان تىس قالمادى.
ءىس-شارادا قازاقستان ۇلتتىق كىتاپحاناسىنىڭ ديرەكتورى, قازاقستان كىتاپحانالار وداعىنىڭ توراعاسى عازيزا نۇرعاليەۆا, «مەكتەپ» باسپاسىنىڭ باس ديرەكتورى ەرلان ساتىبالديەۆ, يفلا بيبليوگرافيا سەكتسياسىنىڭ توراعاسى رەحاب وف (الەكساندريا كىتاپحاناسى, مىسىر), قىتاي ۇلتتىق كىتاپحاناسىنىڭ ادەبيەتتى جيناقتاۋ جانە كاتالوگتەۋ ءبولىمىنىڭ مەڭگەرۋشىسى حۋان تسزە, الەۋمەتتانۋ عىلىمدارىنىڭ دوكتورى سۋات بەيلۇر, «Alash book» باسپا ءۇيىنىڭ جەتەكشىسى الما تۇرسىن, رەسپۋبليكالىق عىلىمي-پەداگوگيكالىق كىتاپحانانىڭ ديرەكتورى ءاليا سايدەمباەۆا بايانداما جاسادى. ماماندار تاجىريبە الماسۋ, كاسىبي بايلانىستى نىعايتۋ, زاماناۋي ترەندتەردى بىرلەسە تالداۋ ماسەلەلەرىنىڭ ارناسىن كەڭەيتۋدى قاجەت دەپ ەسەپتەيدى. اسىرەسە تسيفرلىق ترانسفورماتسيا, دەرەكتەردى ينتەللەكتۋالدى وڭدەۋ, ينكليۋزيۆتى اقپاراتتىق رەسۋرستار قالىپتاستىرۋدىڭ ماڭىزى زور. ساراپشىلار پىكىرىنشە, جاساندى ينتەللەكت قۇرالدارىن بيبليوگرافيالىق ۇدەرىستەرگە ەنگىزۋ ارقىلى سالا تيىمدىلىگىن ارتتىرۋعا بولادى.
«ۇلتتىق بيبليوگرافيا – ەل جادىنىڭ, مادەني مۇرانىڭ, تاريحي دەرەكتىڭ نەگىزى. ونىڭ دامۋى مەن جۇيەلەنۋى ۇلتتىق عىلىم مەن ءبىلىمنىڭ ىلگەرىلەۋىنە تىكەلەي ىقپال ەتەدى. كونفەرەنتسيادا ۇلتتىق كىتاپحانا جانىنان بيبليوگرافياعا ارنالعان عىلىمي ورتالىق قۇرۋ, دامۋ ستراتەگيالارىن ازىرلەۋ, حالىقارالىق سەرىكتەستىك پەن كاسىبي كادرلار دايارلاۋدى جۇيەلەۋ سەكىلدى ناقتى ۇسىنىستاردى ورتاعا سالدىق. قازاق بيبليوگرافياسىنىڭ عاسىرلىق جولىن بارلاعان باسقوسۋدا كىتاپ مۇراسىن جۇيەلەۋگە ارنالعان بىرنەشە ماڭىزدى باسىلىمنىڭ تۇساۋى كەسىلدى. سولاردىڭ قاتارىندا مىرجاقىپ دۋلات ۇلى قۇراستىرعان «قازاق تىلىندە باسىلعان كىتاپتار كورسەتكىشى (1926–1927)», «قازاقستان بيبليوگرافياسى مەن كىتاپحانا ءىسى», «ۇلتتىق كىتاپحانا قورىنداعى ءداستۇرلى كارتوتەكالىق اقپاراتتار (1921–2001): بيبليوگرافيالىق شولۋ انىقتامالىعى» جيناقتارى بار. بۇل باسىلىمدار – تاريحي دەرەك پەن رۋحاني مۇرانى ۇشتاستىراتىن قۇندى بيبليوگرافيالىق ەڭبەك», دەيدى ۇلتتىق كىتاپحانانىڭ ديرەكتورى عازيزا نۇرعاليەۆا.
كونفەرەنتسيا اياسىندا «عاسىرلىق جول: قازاق بيبليوگرافياسىنىڭ شەجىرەسى» اتتى ارنايى كورمە ۇيىمداستىرىلىپ, سيرەك قورلاردان الىنعان باسىلىمدار, كاتالوگتەر مەن بيبليوگرافيالىق قۇرالدار جۇرتشىلىق نازارىنا ۇسىنىلدى. كورمەدە ۇلتتىق بيبليوگرافيانىڭ قالىپتاسۋ كەزەڭدەرىنەن باستاپ بۇگىنگە دەيىنگى دامۋ ساتىلارى كورىنىس تاپقان.
الماتى