پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا ەل ازاماتتارىن حالىقارالىق وتباسى كۇنىمەن قۇتتىقتاپ, بۇگىننەن باستاپ «مەرەيلى وتباسى» ۇلتتىق كونكۋرسىنا ءوتىنىم قابىلداۋ باستالاتىنىن ايتتى, دەپ حابارلايدى Egemen.kz.
مينيستر وتباسى بالانىڭ بويىنا ىزگىلىك پەن سۇيىسپەنشىلىكتى دارىتاتىن مەكەن ەكەنىن اتاپ ءوتتى.
«وتباسى – ءار ادامنىڭ ومىرىندەگى ەڭ قىمبات مەكەن. ادام العاش رەت مەيىرىمدى دە, جاۋاپكەرشىلىكتى دە, قۇرمەت پەن قامقورلىقتى دا ءوز شاڭىراعىندا سەزىنەدى. بالانىڭ بويىنا ىزگىلىك, ەڭبەكقورلىق, ۇلكەنگە قۇرمەت, كىشىگە ىزەت, ەلگە دەگەن سۇيىسپەنشىلىك ەڭ الدىمەن وتباسىندا داريدى. سوندىقتان حالقىمىز «وتان وتباسىنان باستالادى» دەپ بەكەر ايتپاعان. شاڭىراق – قازاق ءۇشىن قاسيەتتى ۇعىم. ول تەك كيىز ءۇيدىڭ توبەسى عانا ەمەس, ۇرپاقتىڭ جالعاسى, اۋلەتتىڭ اماندىعى, تاتۋلىق پەن بەرەكەنىڭ نىشانى. شاڭىراعى بيىك, كەرەگەسى كەڭ, بوساعاسى بەرىك ەلدىڭ بولاشاعى دا نىق بولادى. مەملەكەت باسشىسى قاسىم-جومارت توقاەۆ: «وتباسى – حالقىمىز ءۇشىن قاسيەتتى ۇعىم. ءار ادام, ەڭ الدىمەن, ءوزىنىڭ قاستەرلى شاڭىراعىندا تۇلعا رەتىندە قالىپتاسادى, ۇلگى-ونەگە الىپ, ناعىز ازاماتقا ءتان يگى قاسيەتتەردى بويىنا سىڭىرەدى», دەگەن بولاتىن. راسىندا, بەرەكەلى وتباسى – تاربيەلى ۇرپاقتىڭ, ال تاربيەلى ۇرپاق – مىقتى مەملەكەتتىڭ نەگىزى», دەدى مينيستر.
ايدا بالاەۆا ەلىمىزدە وتباسى ينستيتۋتىن نىعايتۋعا, انا مەن اكەنىڭ مارتەبەسىن ارتتىرۋعا, بالالاردىڭ قاۋىپسىز ءارى باقىتتى ورتادا وسۋىنە ەرەكشە كوڭىل ءبولىنىپ كەلە جاتقانىن دا ايرىقشا اتاپ ءوتتى.
«بۇل باعىتتا جاس وتباسىلارعا قولداۋ كورسەتۋ, اتا-انالاردىڭ جاۋاپكەرشىلىگىن ارتتىرۋ, بالا تاربيەسى مادەنيەتىن دامىتۋ بويىنشا جۇيەلى جۇمىستار اتقارىلىپ جاتىر. «اتا-انالار اكادەمياسى», وتباسىن قولداۋ ورتالىقتارى, اكەلەر وداعى مەن انالار وداعى سياقتى باستامالار قوعامدا جاۋاپتى اتا-انا بولۋ مادەنيەتىن قالىپتاستىرۋعا, ۇرپاقتار ساباقتاستىعىن ساقتاۋعا جانە وتباسى قۇندىلىقتارىن دارىپتەۋگە زور ۇلەس قوسىپ كەلەدى. مۇنىڭ ءبارى – ءار شاڭىراقتىڭ بەرىك, ءار بالانىڭ باقىتتى, ءار وتباسىنىڭ قامقور ورتادا ءومىر ءسۇرۋى ءۇشىن جاسالىپ جاتقان ماڭىزدى قادامدار», دەدى ول.
قوستانايدا وتباسىلىق عىلىمي-يننوۆاتسيالىق فەستيۆال ءوتىپ جاتىر
سونىمەن قاتار ايتۋلى مەرەكەگە وراي, بۇگىننەن باستاپ «مەرەيلى وتباسى» كونكۋرسىنا ءوتىنىم قابىلداناتىنىن ەسكەرتتى.
«قىمباتتى دوستار! بۇگىن, حالىقارالىق وتباسى كۇنى, ەلىمىزدە ءداستۇرلى «مەرەيلى وتباسى» ۇلتتىق كونكۋرسىنا ءوتىنىم قابىلداۋ باستالادى. بۇل بايقاۋ – ونەگەلى ءومىرى, ەڭبەگى, تاتۋلىعى, ۇرپاق تاربيەسىندەگى ۇلگىسى ارقىلى كوپكە جول كورسەتىپ جۇرگەن وتباسىلاردى تانىتاتىن ەرەكشە جوبا», دەدى ا. بالاەۆا.
مينيستر وتباسىلاردى وسى كونكۋرسقا بەلسەندى قاتىسۋعا شاقىرىپ, ءار شاڭىراققا اماندىق, تاتۋلىق پەن بەرەكە تىلەدى.