19 قاراشادان باستاپ اتىراۋ وبلىسىنىڭ ماحامبەت اۋدانىنا قاراستى بەيبارىس اۋىلىندا ەكى مەكتەپ پەن ەكى بالاباقشا ۋاقىتشا جۇمىسىن توقتاتتىدەپ جازادى Egemen.kz.
ءبىلىم بەرۋ باسقارماسىنىڭ مالىمەتىنشە, ونلاين-وقىتۋ فورماتىنا كوشۋ ەپيدەميولوگيالىق قاۋىپتىڭ الدىن الۋ ماقساتىندا قابىلدانعان. اۋىلدا تىشقان سانىنىڭ كۇرت ارتقانى انىقتالىپ, ءبىلىم بەرۋ مەكەمەلەرىندە جاپپاي دەزينفەكتسيا جۇرگىزىلە باستاعان.
قاشىقتان وقۋعا بايتۇرسىن ۇلى اتىنداعى مەكتەپتىڭ 573 وقۋشىسى مەن تالدىقول مەكتەبىنىڭ 261 وقۋشىسى كوشىرىلدى. سونىمەن قاتار "بالدىرعان" جانە "بالاقاي" بالاباقشالارىنىڭ جۇمىسى دا ۋاقىتشا توقتاتىلدى. بۇل مەكەمەلەردە تولىق سانيتارلىق وڭدەۋ جۇرگىزىلىپ جاتىر.
ۆەدومستۆونىڭ مالىمەتىنشە, ارنايى قىزمەتتەر دەزينفەكتسيا جۇمىستارىن باستاپ كەتكەن.
قاۋىپ تولىق جويىلعاننان كەيىن مەكتەپتەر مەن بالاباقشالار قالىپتى جۇمىس تارتىبىنە قايتا ورالادى. ءبىلىم باسقارماسى جاعدايدىڭ تولىق باقىلاۋدا ەكەنىن مالىمدەدى.