جامبىل وبلىسىندا ءوندىرىس سالاسىن وركەندەتۋگە باسىمدىق بەرىلىپ وتىر. اتقارىلعان جۇمىستىڭ ناتيجەسى دە كوڭىل كونشىتەدى. كەيىنگى 10 ايدىڭ بەدەرىندە وڭىردە 1 ترلن تەڭگەنىڭ ءونىمى وندىرىلگەن. بۇل كورسەتكىشپەن جامبىل وبلىسى وڭىرلەر اراسىندا كوش باستاپ تۇر. جالپى, وبلىس اۋماعىنداعى 919 كاسىپورىندا 41 مىڭنان استام ادام ەڭبەك ەتىپ جاتىر. بيىل وڭىردە بىرنەشە كاسىپورىن اشىلعان ەدى. كۇنى كەشە سول ءۇردىس ساتىمەن جالعاستى.
مەملەكەت باسشىسىنىڭ تاپسىرماسىنا سايكەس وڭىردە الەۋەتتى ينۆەستورلاردىڭ قولعا الۋىمەن بىرنەشە ءوندىرىس وشاعى سالىنىپ جاتىر. ولاردىڭ كەيبىرى ءوز ءونىمىن شىعارىپ ۇلگەردى. جاقىندا «تاراز» يندۋستريالىق ايماعىندا جىلىنا 70 مىڭ توننا جوعارى ساپالى كۇيدىرىلگەن اك وندىرەتىن كاسىپورىن جۇمىسىن باستادى. ءوڭىر باسشىسى ەربول قاراشوكەەۆتىڭ ايتۋىنشا, پرەزيدەنت پارمەنىمەن قولعا الىنعان جۇمىس توقتاۋسىز جالعاسپاق. جەرگىلىكتى اتقارۋشى بيلىك وكىلدەرى وڭدەۋ سالاسىنا ينۆەستيتسيا تارتۋعا باسىمدىق بەرىپ وتىر.
جاڭادان بوي كوتەرگەن زاۋىتتىڭ ينۆەستيتسيالىق قۇنى 2 ملرد تەڭگەنى قۇرايدى. كاسىپورىندا شامامەن 100 ادام ەڭبەك ەتەدى. زاۋىت باسشىلارىنىڭ ايتۋىنشا, مۇندا جۇمىسشىلاردىڭ الاڭسىز ەڭبەك ەتۋىنە بارلىق مۇمكىندىك قاراستىرىلعان ەكەن. ال كاسىپورىن جەتەكشىلەرى الداعى ۋاقىتتا وزگە دە جوبالاردى قولعا الۋعا بەكىنىپ وتىر.
– بۇگىنگى باستاما – ەل پرەزيدەنتى جۇكتەگەن مىندەتتەرمەن تولىق ۇيلەسەتىن ناقتى قادام. ءبىزدىڭ ماقساتىمىز – ءوڭىر ەكونوميكاسىن جاڭا دەڭگەيگە كوتەرەتىن ءوندىرىس ورىندارىنىڭ سانىن ارتتىرۋ جانە ينۆەستورلارمەن ءوزارا ءتيىمدى ارىپتەستىك ورناتۋ. سول باعىتتا تىنىمسىز ەڭبەك ەتىپ جاتىرمىز. بۇگىن ىسكە قوسىلعان جاڭا جوبا – وسى باعىتتاعى ماڭىزدى باستامالاردىڭ ءبىرى. جالپى, وڭىرگە الەۋەتتى ينۆەستورلاردى تارتۋ جۇمىسى ءارى قاراي دا جالعاسادى. وبلىس اكىمدىگى ينفراقۇرىلىم تارتۋ, ينجەنەرلىك جەلىلەرمەن قامتاماسىز ەتۋ جانە قاجەتتى اكىمشىلىك قولداۋ كورسەتۋ جۇمىستارىن ورىنداپ وتىر. ينۆەستورلار ءۇشىن قولايلى جاعداي قالىپتاستىرۋدى جالعاستىرامىز. جاڭا ءوندىرىس ورنى ەلىمىزدىڭ جانە ءوڭىرىمىزدىڭ وركەندەۋىنە ۇلەس قوسادى دەگەن سەنىم مول, – دەيدى ءوڭىر باسشىسى.
كاسىپورىن قاجەتتى شيكىزاتتى جەكە كارەرىنەن الادى ەكەن. مامانداردىڭ سوزىنە سەنسەك, بۇل قادام اكتاستى قازۋدان باستاپ دايىن ءونىم شىعاراتىن كەزەڭگە دەيىن ساپانى تۇراقتى باقىلاۋعا مۇمكىندىك بەرەدى. ءونىم ءوندىرۋشىسى – «KazGeoEnergy». مامانداردىڭ ايتۋىنشا, جاڭادان سالىنعان ءوندىرىس وشاعى – وڭىردەگى 1-سىنىپتى اك شىعاراتىن جالعىز كاسىپورىن.
– قاراتاۋ قالاسىندا كەن وندىرەتىن جەكە كارەرىمىز بار. سوندىقتان ءبىزدىڭ زاۋىتتى شيكىزاتتان دايىن ونىمگە دەيىن جۇمىس ىستەيتىن تسيكلدىك ءوندىرىس وشاعى دەپ ايتۋعا تولىق نەگىز بار. كاسىپورىندا شامامەن 100 ادام جۇمىسپەن قامتىلادى. بىزدە ەڭبەك ەتەتىن ازاماتتاردىڭ ورتاشا جالاقىسى 350-400 مىڭ تەڭگەنى قۇرايدى, – دەيدى جاڭا زاۋىت باسشىسى ارىستانبەك ەركىنبەك ۇلى.
زاۋىت زاماناۋي تەحنولوگيالارمەن, وزىق قۇرال-جابدىقتارمەن جابدىقتالعان. ونىڭ ىشىندە نەمىستىڭ «Siemens AG» مونيتورينگ جۇيەسى ورناتىلىپ, ءوندىرىستىڭ بارلىق كەزەڭىندە ساپانى جوعارى دالدىكپەن باقىلاۋدى قامتاماسىز ەتىپ وتىر.
مۇندا وندىرىلەتىن كۇيدىرىلگەن اك ەكونوميكانىڭ نەگىزگى سالالارىندا كەڭىنەن قولدانىلادى. ناقتىراق ايتساق, بايلانىستىرعىش ماتەريال رەتىندە, سيليكات كىرپىش, تسەمەنت, گازوبلوك, سىلاق ونىمدەرىن دايىنداۋ كەزىندە كادەگە جارايدى. سونداي-اق مەتاللۋرگيادا قوسپالاردى ءبولىپ الۋ جانە كەندى بايىتۋ كەزىندە فليۋس, حيميا ونەركاسىبىندە سودا, كالتسي كاربيدى, اتسەتيلەن, بوياۋ-لاك ونىمدەرىن وندىرۋدە نەگىزگى شيكىزات رەتىندە پايدالانىلادى.
جاڭا زاۋىت ءوڭىردىڭ ونەركاسىپتىك الەۋەتىن ارتتىرۋداعى ماڭىزدى كاسىپورىنداردىڭ ساناتىنا ەنىپ وتىر. ول وبلىس ەكونوميكاسىنىڭ وركەندەۋىنە ەلەۋلى ۇلەس قوسىپ, جاڭا جۇمىس ورىندارىن اشۋعا, يمپورتتى الماستىرۋعا, وتاندىق ونەركاسىپتى نىعايتۋعا مۇمكىندىك تۋعىزادى.
تاراز