اقتوبەدە 35 مىڭ ورىندىق ستاديون سالىنادى. قۇرىلىسى ەكى جىلدا اياقتالۋى مۇمكىن, دەپ حابارلايدى Egemen.kz.
اقتوبە وبلىسىنىڭ اكىمى اسحات شاحاروۆ ورتالىق كوممۋنيكاتسيالار قىزمەتىندەگى بريفينگتە اقتوبە قالاسىندا جاڭا فۋتبول ستاديونىن سالۋ جوسپارى تۋرالى ايتتى.
– ستاديونعا قاتىستى, باستاپقىدا قۇجاتتاما بويىنشا سۇراقتار تۋىندادى, سەبەبى ۋەفا تالاپتارىن ورىنداۋ وڭاي ەمەس, بۇل ۇلكەن قارجىنى قاجەت ەتەدى. ورىن سانى بويىنشا ءبىز ەۋروكۋبوك ماتچتارىن ەسكەردىك: ويىندار كەزىندە قوسىمشا ارقىلى 160 مىڭنان استام بيلەتكە سۇرانىس بولدى, ال ىشكى چەمپيونات ويىندارىنا سۇرانىس 50-55 مىڭ بيلەتكە دەيىن جەتەدى. سوندىقتان ءبىز 35 مىڭ كورەرمەنگە ارنالعان ستاديون سالۋعا شەشىم قابىلدادىق. بۇعان دەيىن ايتقانىمداي, مامانداردىڭ قورىتىندىسى بويىنشا قۇرىلىستى ەكى جىل ىشىندە اياقتاۋعا مۇمكىندىك بار, – دەدى شاحاروۆ.
قازىرگى تاڭدا قازاقستانداعى ەڭ ۇلكەن ستاديون – «استانا ارەنا» (30 مىڭ ورىن). قۇرىلىس اياقتالعاننان كەيىن اقتوبەدەگى جاڭا ستاديون ەلدەگى ەڭ سىيىمدى ارەناعا اينالادى. ال “اقتوبە” كلۋبىنىڭ قازىرگى ستاديونى قوبىلاندى باتىر اتىنداعى ارەنا 12 مىڭ جانكۇيەرگە ارنالعان.