كەشە, 7 تامىز كۇنى ءبىلىم جانە عىلىم ءمينيسترى ا.ءسارىنجىپوۆ باستاعان ءبىلىم جانە عىلىم مينيسترلىگىنىڭ ءبىلىم گرانتتارىن تاعايىنداۋ جونىندەگى رەسپۋبليكالىق كونكۋرستىق كوميسسياسى ءوز جۇمىسىن اياقتادى. قازىر ونى باسپاسوزدە جاريالاۋ ءۇشىن بەتتەۋ جۇمىستارى ءجۇرىپ جاتىر. بۇل تۋرالى مينيسترلىك ءباسپاسوز قىزمەتىنە سىلتەمە جاساعان egemen.kz حابارلادى.
بيىلعى تەست سىناعىن تاپسىرعاندارعا بەرىلەتىن مەملەكەتتىك ءبىلىم گرانتتارىنىڭ يەلەرىن انىقتايتىن كوميسسيا قۇرامىندا مەملەكەتتىك ورگاندار قىزمەتكەرلەرى, ۇلتتىق كاسىپكەرلەر پالاتاسىنىڭ, قازاقستان ازاماتتىق اليانسىنىڭ, عىلىم جانە ءبىلىم قىزمەتكەرلەرى كاسىپوداعىنىڭ وكىلدەرى, جوعارى وقۋ ورىندارىنىڭ رەكتورلارى بولدى.
وسى قۇرامداعى كوميسسيا 2015 جىلعا بولىنگەن 32 168 گرانت يەگەرلەرىن تولىق انىقتادى. گرانتتىڭ 500-ءى جوعارى وقۋ ورىندارىنىڭ دايىندىق بولىمدەرىنە بەرىلسە, 29 668 گرانت 1 كۋرسقا وقۋشىلار قابىلداۋعا ارنالدى. سونىڭ ىشىندە كۇندىزگى وقۋ بولىمىنە – 29 168, سىرتتاي ءۇشىن 500 گرانت بەرىلدى.
ءبىلىم گرانتتارىن قابىلداۋ قۇقىعىن كونكۋرس جولىمەن انىقتالعان 60 جوعارى وقۋ ورنى جەڭىپ الدى.
كورسەتىلگەن باسىمدىقتار ەسەبىمەن 12 600 گرانت – تۇلەكتەردى تەحنيكالىق جانە تەحنولوگيالىق, 6000-عا جۋىق گرانت – پەداگوگيكالىق, 2 690 گرانت اۋىل شارۋاشىلىعى جانە مال شارۋاشىلىعى ماماندىقتارى بويىنشا وقىتۋعا ءبولىندى.
ەسكە سالا كەتەيىك, 2015 جىلى ءبىلىم گرانتتارىن الۋعا 67 377 تۇلەك قاتىستى. ولاردىڭ 53 162-ءسى – قازاق, 14 215 ورىس مەكتەپتەرىن بىتىرگەن. سول سياقتى «ماڭگىلىك ەل جاستارى – يندۋسترياعا!» جوباسى شەڭبەرىندەگى كۆوتانى الۋ ءۇشىن تالاسقا 6 457 مەكتەپ ءبىتىرۋشى ۇمىتكەر بولدى.
كونكۋرسقا «التىن بەلگى» توسبەلگىسىنىڭ 2 116 يەگەرى اتسالىستى. بۇلاردان بولەك, ۇمىتكەرلەر اراسىندا نازارباەۆ زياتكەرلىك مەكتەپتەرىنىڭ 1 255 تۇلەگى, جالپى ءبىلىم بەرەتىن پاندەر بويىنشا حالىقارالىق جانە رەسپۋبليكالىق وليمپيادالاردىڭ 163 جەڭىمپازى, جالپى ءبىلىم بەرەتىن پاندەر حالىقارالىق جانە رەسپۋبليكالىق عىلىمي جارىستاردىڭ 930 جەڭىمپازى, رەسپۋبليكالىق جانە حالىقارالىق سپورت جارىستارىنىڭ 816 جەڭىمپازى, پرەزيدەنتتىك وليمپيادانىڭ 6 جەڭىمپازى بار. ولاردىڭ ءبارى ءبىلىم بەرۋ گرانتىن تاعايىنداۋ كەزىندە باسىمدىلىقتار الدى.
حابارلامادا كونكۋرسقا قاتىساتىندار اراسىندا سونداي-اق 483 جەتىم بالانىڭ I جانە II توپتارداعى 341 مۇگەدەكتىڭ بار ەكەنى اتاپ كورسەتىلگەن. سول سياقتى سوعىسقا قاتىسۋشىلارعا تەڭەستىرىلگەن جەڭىلدىكتەر مەن كەپىلدىكتەر بويىنشا 20 ابيتۋريەنت كونكۋرسقا ءتۇستى.
بۇدان بولەك, قازاقستان رەسپۋبليكاسىنىڭ ازاماتى بولىپ تابىلمايتىن قازاق ۇلتىنىڭ 1 190 وكىلىنە كۆوتا قارالدى.
وتىرىستا وسىنىڭ ءبارىن سارالاي قاراپ شىققان كوميسسيا گرانت يەلەرىنىڭ اتى-جوندەرىن تولىق انىقتاپ بولدى.
ەندى اسىعا كۇتىپ وتىرعان بارشا اعايىنعا ءبىلىم گرانتتارىنا يە بولعانداردىڭ ءتىزىمى رەسپۋبليكالىق «ەگەمەن قازاقستان» جانە «كازاحستانسكايا پراۆدا» گازەتتەرىنىڭ 11 تامىز, سەيسەنبى كۇنى جارىققا شىعاتىن نومىرىندە جاريالاناتىنىن جەتكىزگىمىز كەلەدى.
ال ايرىقشا اسىققان وقىرمان ونى «ەگەمەن قازاقستاننىڭ» سايتىنان (egemen.kz) سول كۇنى تۇنگى 00:05 ساعاتتان باستاپ قاراپ, كورە الادى.
تالعات رايىمبەك.
دەرەك, فوتو: egemen.kz.