الماتى قالاسىنىڭ اكىمى دارحان ساتىبالدى جۇمىس ساپارى اياسىندا «الماتى–1» تەمىرجول ۆوكزالىنا بارىپ, نىساندا جۇرگىزىلىپ جاتقان جاڭعىرتۋ جۇمىستارىمەن تانىستى. قۇرىلىس 1974 جىلى سالىنعان عيماراتتىڭ باستاپقى ساۋلەتتىك كەلبەتىن بارىنشا ساقتاي وتىرىپ جۇزەگە اسىرىلۋدا. مەردىگەر ۇيىم جولاۋشىلار اعىنىنىڭ كوپتىگى مەن نىساننىڭ جوعارى جۇكتەمەسىن ەسكەرىپ, زاماناۋي انتيۆاندال ماتەريالداردى قولدانىپ جاتىر, دەپ جازادى Egemen.kz.
جاڭعىرتىلعان ۆوكزال اۋماعىندا ۆيزيت-ورتالىق, مۋزەيلىك ەكسپوزيتسيا جانە كاپسۋلدىك قوناقۇي اشۋ جوسپارلانىپ وتىر. بۇل قىزمەت ساپاسىن ارتتىرۋعا, تۋريستىك ينفراقۇرىلىمدى جاقسارتۋعا جانە جولاۋشىلار ءۇشىن قوسىمشا قولايلى جاعداي جاساۋعا مۇمكىندىك بەرەدى.
الماتى اكىمى ۆوكزالدىڭ جاڭعىرتىلۋى قالا تۇرعىندارى مەن قوناقتارىنىڭ قاۋىپسىزدىگى مەن جايلىلىعىنا تىكەلەي اسەر ەتەتىن ماڭىزدى الەۋمەتتىك جوبا ەكەنىن اتاپ ءوتىپ, جۇمىستار بەلگىلەنگەن مەرزىمدە جانە تالاپقا ساي ورىندالۋى ءتيىس ەكەنىن ايتتى.
«مەرزىمدى سوزۋ نەمەسە تالاپتى بۇزۋ فاكتىلەرىنە جول بەرگەن جاۋاپسىز مەردىگەرلەر جاۋاپكەرشىلىككە تارتىلادى. بىزدە ساپاسى تومەن جۇمىس ءۇشىن ليتسەنزيادان ايىرۋ تاجىريبەسى بار. سوندىقتان سىزدەردەن ءتارتىپ, جەتكىلىكتى رەسۋرس جانە مىندەتتەمەلەردى ساپالى ورىنداۋدى كۇتەمىز», دەدى دارحان ساتىبالدى.
الماتى اكىمدىگى جاڭعىرتۋ جۇمىستارىنىڭ ورىندالۋىن ءارى قاراي دا باقىلاۋدا ۇستايدى. جاڭارعان ۆوكزال قالانىڭ زاماناۋي, ىڭعايلى ءارى قاۋىپسىز كولىك ينفراقۇرىلىمى نىسانىنا اينالۋى ءتيىس.