وتادان وپا بولمادى: وپەراتسيادان كەيىن كوز جۇمعان ايەلدىڭ تۋىستارى كلينيكانى جاۋاپقا تارتۋدى تالاپ ەتتى

مارقۇمنىڭ قىزى بەيبىت جۇماعاليەۆا بولعان جايتتى Threads پاراقشاسىندا جاريالادى. وتادان كەيىن وڭالماعان ناۋقاستىڭ جاعدايىن دارىگەرلەرگە بايانداعاندا, «ناركوزدىڭ قالىپتى اسەرى» دەپ جاۋاپ بەرگەن. دارىگەرلەر ءدال وسى بەيقامدىعى ءۇشىن زاڭ الدىندا جاۋاپ بەرۋگە ءتيىس دەپ بەل بايلاعان بەيبىت جۇماعاليەۆ بولعان وقيعانىڭ ءمان-جايىن Tengrinews.kz سايتىنداعى ارىپتەسىمىزگە بايانداپ بەردى.

«انام ءساتتى وتەتىنىنە سەنگەن. بۇل كۇردەلى وپەراتسيا ەمەس ەدى»

ناۋقاسقا نەبارى 1–2 سانتيمەتر بولاتىن شاعىن جارىق دياگنوزى قويىلعان. دارىگەرلەر وتانىڭ ومىرگە قاۋىپ توندىرمەيتىنىن, تەك جوسپارلى تۇزەتۋ قاجەت ەكەنىن ايتقان. پاتسيەنتكە كۆوتاعا سايكەس تەگىن وپەراتسيا ۇسىنعان. ءسويتىپ ەم الۋشى Green Clinic-ءتى تاڭداعان.

وتا 11 قىركۇيەكتە جاسالعان. مارقۇم وپەراتسيا الدىندا جوعارعى دەڭگەيدە تەكسەرۋدەن ءوتىپ, قاجەتتى مەديتسينالىق تور مەن قۇرالداردى ءوز قاراجاتىنا شەتەلدەن الدىرعان.

الايدا كەلەسى كۇنى ايەلدىڭ جاعدايى كۇرت ناشارلاي باستاعان. السىزدىك, جۇرەك اينۋ, قان قىسىمنىڭ تومەندەۋى بايقالعان. تۋىستارى ماماندارعا قايتا-قايتا حابارلاسقانىمەن, «ناركوزدىڭ اسەرى», «مۇنداي بەلگىلەر وتادان كەيىن بولۋى مۇمكىن» دەگەن سالعىرت جاۋاپتارمەن شەكتەلگەن.

ء«بىز انامىزدىڭ السىرەپ بارا جاتقانىن كوردىك. بىراق ەشكىم ناقتى ءتۇسىندىرىپ بەرمەدى», دەيدى قىزى.

كەشكە قاراي ايەل جانساقتاۋ بولىمىنە تۇسەدى. بىراق تۋىستارىنىڭ ايتۋىنشا, وندا دا جاعدايدىڭ ناقتى سەبەبى ايتىلماعان.

جانساقتاۋ بولىمىنە جونەلتىلدى

13 قىركۇيەكتە تۋىستارىنا ايەلدىڭ «جاعدايى تۇراقتى» ەكەنى, ءتىپتى ۇيىنە شىعارۋعا دايىندالىپ جاتقانى حابارلانادى. الايدا تەلەفون ارقىلى سويلەسكەن كەزىندە اناسىنىڭ ارەڭ سويلەپ جاتقانىن كورگەن قىزى دەرەۋ ۋدز جاساۋدى تالاپ ەتكەن.

تەكسەرۋ كەشكىسىن عانا جۇرگىزىلىپ, جاعدايدىڭ تىم قيىنداعانى بەلگىلى بولعان. ارتەريالىق قىسىم قاۋىپتى دەڭگەيگە تۇسكەن.

جەدەل وتادا دارىگەرلەر اش ىشەكتىڭ شامامەن 70 پايىزىنىڭ ولىەتتەنگەنىن انىقتاپ, ونىڭ سەبەبىن مەزەنتەريالدى ترومبوز دەپ كورسەتكەن.

وتادان سوڭ ايەل مەديكامەنتوزدى ۇيقىعا جىبەرىلگەن. تۋىستارىنىڭ ايتۋىنشا, حيرۋرگ شامامەن ءبىر ساعاتتان كەيىن بولىمشەدەن شىعىپ كەتكەن. تۇندە سول دارىگەر حابارلاسىپ, ايەلدىڭ قايتىس بولعانىن ەستىرتكەن.

ساراپتاماعا سەنىمسىزدىك: «دەرەكتەردىڭ ءوزى قاتە»

تۋىستار العاشقى سوت-مەديتسينالىق قورىتىندىدا شىندىققا سايكەس كەلمەيتىن كورسەتكىشتەر بار ەكەنىن ايتادى.

ولاردىڭ جالداعان تاۋەلسىز ساراپشىسى دا قورىتىندى تولىق جاسالماعانىن, ترومبوزدىڭ دامۋ تەتىگى زەرتتەلمەگەنىن اتاپ كورسەتكەن.

تۋىستار مينيسترلىككە شاعىم تۇسىرگەن. الايدا ۆەدومستۆو ءوتىنىشتى تەكسەرۋ ءۇشىن ونى كەرى اينالدىرىپ, سول كلينيكانىڭ وزىنە قايتا جىبەرگەن. مارقۇمنىڭ بالاسى رامازان وراقباي بۇل شەشىمدى «مۇددەلەر قاقتىعىسى» دەپ باعالايدى.

ونىڭ ايتۋىنشا, ۇزاق شاعىمدانۋدان كەيىن عانا كوميتەت كلينيكاعا تەكسەرۋ جۇرگىزۋگە دايىن ەكەنىن حابارلاعان, بىراق سول ۋاقىت ارالىعىندا كلينيكا وزدەرى تاڭداعان ساراپشىلاردىڭ قورىتىندىسىن الىپ ۇلگەرگەن.

«ولار دا كومەك كورسەتۋدىڭ كەشىككەنىن راستادى. ال ساراپتاما اكتىسىنىڭ ساپاسى سونشالىقتى تومەن, ونى سوتتا دالەل رەتىندە قولدانۋدىڭ ءوزى قيىن», دەيدى رامازان.

كلينيكانىڭ ءوزى نە دەيدى؟

Green Clinic باسشىلىعى رەسمي مالىمدەمە جاساپ, تەكسەرۋ زاڭ اياسىندا ءجۇرىپ جاتقانىن جانە بارلىق ماتەريالدىڭ اشىق بولاتىنىن مالىمدەدى.

ەمدەۋ ءىسى جونىندەگى ورىنباسار ءالىمجان مۇحامبەتوۆ كەي اسقىنۋلار الدىن الا بولجانبايتىنىن اتاپ ءوتىپ:

ء«بىز بۇل وقيعانى جاسىرعىمىز كەلمەيدى. ءار ناۋقاستىڭ اعزاسى ءارتۇرلى. كەيبىر قاۋىپتى اسقىنۋلاردى بولدىرماۋ مەديتسينادا دا مۇمكىن بولماي قالاتىن جاعدايلار كەزدەسەدى», دەدى.

ونىڭ ايتۋىنشا, بۇل وقيعا ساقتاندىرۋ جاعدايى رەتىندە تىركەلگەن. تاۋەلسىز ساراپشىلار دا اسقىنۋ كەزىندە كورسەتىلگەن كومەكتىڭ كەشىككەنىن راستاعان.

تۋىستار: ء«بىزدىڭ ماقسات – كىنالىلەردىڭ جاۋاپقا تارتىلۋى»

مارقۇمنىڭ جاقىندارى ءىستىڭ اشىق تەرگەلۋىن جانە مەديتسينالىق قىزمەتكەرلەردىڭ ناقتى جاۋاپقا تارتىلۋىن تالاپ ەتىپ وتىر.

«ادام اۋرۋحاناعا ءومىرىن ساقتاپ قالۋ ءۇشىن كەلەدى. ەگەر دارىگەر كومەكتەسە الماي قالسا, ءبىر باسقا. بىراق كلينيكا قاۋىپسىزدىككە تولىق كەپىلدىك بەرىپ, ءوزى شاقىرىپ وپەراتسيا جاساعاندا, جاۋاپكەرشىلىك تە وزگەشە», دەيدى مارقۇمنىڭ بالاسى.