بيىل وبلىستا «كەلەشەك مەكتەبى» ۇلتتىق جوباسى اياسىندا 2 700 ورىنعا ارنالعان 4 مەكتەپ ىسكە قوسىلدى. ەندى 500 ورىندىق وقۋشىلار سارايى اشىلادى دەپ جوسپارلانىپ وتىر, دەپ حابارلايدى Egemen.kz.
بۇل تۋرالى وڭىرلىك كوممۋنيكاتسيالار قىزمەتى الاڭىندا وتكەن ءباسپاسوز جيىنىندا اباي وبلىسى ءبىلىم باسقارماسىنىڭ باسشىسى باۋىرجان ەردەمبەكوۆ ايتىپ بەردى.
«اباي وبلىسىندا ايماق باسشىسىنىڭ باستاماسىمەن مەكتەپكە دەيىنگى جانە ورتا ءبىلىم بەرۋ ينفراقۇرىلىمىن دامىتۋ باعىتىندا جۇيەلى جۇمىستار اتقارىلىپ جاتىر. وڭىردە 177 بالاباقشا جانە 191 شاعىن ورتالىق جۇمىس ىستەيدى. قازىر 3,9 مىڭنان استام بالا كەزەكتە تۇر, ونىڭ ىشىندە 2-6 جاس ارالىعىندا 758 بالا بار. ورىن تاپشىلىعىن ازايتۋ ماقساتىندا بيىل 5 جەكەمەنشىك بالاباقشا اشىلىپ, ماقانشىدا سالىناتىن 140 ورىندىق بالاباقشانىڭ قۇجاتتارى ازىرلەنىپ جاتىر», دەدى باسقارما باسشىسى.
ونىڭ مالىمەتىنشە, اباي وبلىسىندا قازىر 311 مەكتەپ جۇمىس ىستەپ تۇر. جالپى, وڭىردە 2025-2026 وقۋ جىلىندا 100,6 مىڭ وقۋشى ءبىلىم الادى.
«سونداي-اق سەمەي قالاسىنىڭ وڭ جاق شىعىس كەنتىندە 300 ورىندىق مەكتەپتىڭ قۇرىلىسى جۇرگىزىلۋدە. سۋىقبۇلاقتا 100 ورىندىق ءبىلىم وشاعىنىڭ قۇرىلىسى باستالىپ, ەكپىن جانە سەمەي قالالارىندا 300 ورىندىق مەكتەپتەردىڭ جوبالارى ازىرلەنىپ جاتىر. «قازاقستان حالقىنا» قورى ارقىلى 36 مەكتەپكە 58 جاڭا كابينەت ورناتىلىپ, 4 مەكتەپكە (جاڭاسەمەي, ماقانشى, كۋرچاتوۆ, ءۇرجار) ارقايسىسىنا 250 ملن تەڭگەگە وقۋ كابينەتتەرى مەن جيھازدار ساتىپ الىندى. ايتا كەتەيىك, سەمەي قالاسىنداعى 500 ورىندىق وقۋشىلار سارايىنىڭ قۇرىلىسى جەلتوقسان ايىندا اياقتالىپ, ەل يگىلىگىنە بەرىلەدى», دەيدى ب.ەردەمبەكوۆ.
اباي وبلىسى