الماتى وبلىسىندا العاش رەت بارياتريالىق-مەتابوليكالىق وتا جاسالدى. ايماق ءۇشىن ماڭىزدى بۇل جوعارى تەحنولوگيالىق حيرۋرگيالىق ەم-شارا ىلە ورتالىق اۋداندىق اۋرۋحاناسىندا وتكىزىلدى, دەپ حابارلايدى Egemen.kz.
وتاعا مەديتسينا عىلىمدارىنىڭ دوكتورى, سەمىزدىك پەن قانت ديابەتى حيرۋرگياسى ورتالىعىنىڭ جەتەكشىسى, پروفەسسور ورال وسپانوۆ قاتىستى. سونداي-اق وپەراتسيانى ىلە اۋداندىق اۋرۋحاناسىنىڭ حيرۋرگيا ءبولىمىنىڭ مەڭگەرۋشىسى اڭسات تاۋبالديەۆ جانە حيرۋرگ ءادىلحان كاريپباەۆ جۇرگىزدى.
بارياتريالىق-مەتابوليكالىق وپەراتسيا — سەمىزدىكتى جانە ونىمەن بايلانىستى اۋرۋلاردى (اسىرەسە 2 ءتيپتى قانت ديابەتىن) ەمدەۋگە ارنالعان حيرۋرگيالىق ادىستەردىڭ جالپى اتاۋى. بۇل وپەراتسيالاردىڭ نەگىزگى ماقساتى سالماقتى تۇراقتى تۇردە ازايتۋ جانە زات الماسۋدى جاقسارتۋ بولىپ سانالادى.
«مۇنداي وتالاردىڭ اۋداندىق دەڭگەيدەگى اۋرۋحانالاردا جاسالۋى – حالىققا جوعارى تەحنولوگيالىق مەديتسينالىق كومەكتىڭ قولجەتىمدىلىگىن ارتتىرۋداعى ماڭىزدى قادام. بۇل ەمدەلۋشىلەرگە ءتيىمدى ءارى زاماناۋي ەمدى تۇرعىلىقتى جەرىندە الۋعا مۇمكىندىك بەرەدى. ىلە اۋداندىق اۋرۋحاناسىنىڭ كاسىبي دايىندىعى مەن زاماناۋي حيرۋرگيا باعىتتارىن دامىتۋعا دەگەن تالپىنىسىن ەرەكشە اتاپ وتكىم كەلەدى», دەدى ورال بازارباي ۇلى.
ايتا كەتۋ كەرەك, مەديتسينالىق قىزمەت تولىقتاي مىندەتتى الەۋمەتتىك مەديتسينالىق ساقتاندىرۋ جۇيەسى اياسىندا تەگىن كورسەتىلدى. بۇل ناۋقاسقا قاجەتتى جانە ۋاقىتىلى جوعارى بىلىكتى مەديتسينالىق كومەكتى ەشقانداي قارجىلىق شىعىنسىز الۋعا مۇمكىندىك بەردى.
الماتى وبلىسى