جىل باسىنان بەرى 13 202 ەتنيكالىق قازاق اتاجۇرتقا ورالىپ, قانداس مارتەبەسىن الدى. جالپى 1991 جىلدان بەرى رەسپۋبليكاعا 1 ملن 161,2 مىڭ ەتنيكالىق قازاق ورالدى, دەپ حابارلايدى Egemen.kz.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, بيىل ەلگە كەلگەن قانداستاردىڭ 45,6%-ى وزبەكستاننان, 42,3% – قىتايدان, 4,1% – تۇرىكمەنستاننان, 2,9% – مونعوليادان, 2,6% – رەسەيدەن جانە 2,5%-ى باسقا ەلدەردەن.
ال, 1 قاراشاداعى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 57,6%-دى, ەڭبەككە قابىلەتتى جاستان كىشى 33,9%-دى جانە زەينەتكەرلەر 8,5%-دى قۇرايدى.
«ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 15,2%-ى جوعارى ءبىلىمدى, 28,2%-ى ورتا كاسىبي ءبىلىمدى, 50,5%-ى جالپى ورتا ءبىلىمدى, جانە 6,1%-ى ءبىلىمى جوق. قونىس اۋدارعان ەتنيكالىق قازاقتار رەسپۋبليكانىڭ ءتۇرلى وڭىرلەرىنە قونىستاندى. سونىمەن بىرگە, قانداستاردى قونىستاندىرۋ ءۇشىن كەلەسىدەي ەڭبەك كۇشى تاپشى وڭىرلەر انىقتالدى: اقمولا, اباي, قوستاناي, پاۆلودار, اتىراۋ, باتىس, شىعىس جانە سولتۇستىك قازاقستان وبلىستارى», دەلىنگەن حابارلامادا.
بيىل قونىستاندىرۋ وڭىرلەرىندە قانداستاردى قابىلداۋ كۆوتاسى 2 309 ادامعا جەتكەن. 2025 جىلعى 1 قاراشاداعى جاعداي بويىنشا قونىستاندىرۋ وڭىرلەرىنە 1 942 قانداس قونىس اۋدارعان.
ەسەرىڭىزگە سالا كەتەيىك, جوعارىدا اتالعان وڭىرلەردە قونىستانعان قانداستارعا كوشۋگە سۋبسيديا تۇرىندە مەملەكەتتىك قولداۋ شارالارى ۇسىنىلادى – ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 اەك (275,2 مىڭ تەڭگە) مولشەرىندە; تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە – ءبىر جىل ىشىندە 15-تەن 30 اەك (59-دان 118 مىڭ تەڭگەگە دەيىن) مولشەرىندە.
سونىمەن قاتار 2025 جىلدىڭ باسىنان بەرى 1010 قانداسقا ءتۇرلى قولداۋ شارالارى كورسەتىلدى, ولاردىڭ اراسىنان 313 ادام تۇراقتى جۇمىسقا ورنالاستىرىلدى.