اۋقىمدى ترانسفورماتسيا كەزەڭىندەگى ورتالىق ازيا

باكۋدىڭ جاڭا مارتەبەسىنىڭ ماڭىزى

وسىمەن جەتىنشى مارتە ۇيىم­داستىرىلعان ورتالىق ازيا مەملەكەت­تەرى باسشىلارى كونسۋلتاتيۆتىك كەزدەسۋىنە بيىل ازەربايجان تولىققاندى مۇشە رەتىندە قاتىستى. ياعني ازەربايجان تەڭ قۇقىلى مۇشەسى اتاندى. مەملەكەت باسشىسى قاسىم-جومارت توقاەۆ يلحام اليەۆكە ءىلتيپات ءبىلدىرىپ, ازەربايجاننىڭ اتالعان كەڭەسكە تولىق مۇشە رەتىندە قوسىلۋىن تاريحي شەشىم دەپ باعالادى. سونداي-اق باكۋدىڭ جاڭا مارتەبەسى ايماق ىنتىماقتاستىعىن كەڭەيتۋگە ايتارلىقتاي ۇلەس قوساتىنىنا سەنىم ارتتى.

وسىناۋ جاڭالىقتى سامميتتە وزبەكستان پرەزيدەنتى شاۆكات ميرزيوەۆ ءمالىم ەتتى.

– قۇرمەتتى يلحام گەيداروۆيچتى بۇل ءىس-شارعا ورتالىق ازيا مەملەكەتتەرى باسشىلارى كونسۋلتاتيۆتىك كەزدەسۋىنىڭ تەڭ قۇقىلى مۇشەسى رەتىندە قاتىسىپ وتىرعانىن ەرەكشە اتاپ وتكىم كەلەدى. شىن مانىندە, ءبىز ورتالىق ازيا مەن وڭتۇستىك كاۆكاز اراسىندا بەرىك كوپىر قۇرىپ, ىنتىماقتاستىقتىڭ ورتاق كەڭىستىگىن قالىپتاستىرۋعا جول اشامىز. بۇل ەكى ءوڭىردىڭ ستراتەگيالىق ءوزارا بايلانىسىن جانە تۇراقتىلىعىن نىعايتا تۇسەرى ءسوزسىز, – دەدى شاۆكات ميرزيوەۆ.

قازاقستان, وزبەكستان, قىرعىزستان, تاجىكستان, تۇرىكمەنستان جانە ازەربايجان مەملەكەت­تەرىنىڭ باسشىلارى, بۇۇ-نىڭ ور­تالىق ازياداعى پرەۆەنتيۆتىك ديپلو­ماتيا جونىندەگى ايماقتىق ورتالىعىنىڭ باسشىسى كاحا يمنادزە قاتىسقان كونسۋلتاتيۆتىك كەز­دە­سۋدە ايماق قاۋىپسىزدىگى, كولىك-لوگيس­تي­كا جانە ورتالىق ازيانىڭ سىرتقى ساياساتى­نا قاتىستى ماڭىزدى ماسەلەلەر تالقىلاندى.

جابىق شەكارا مەن وقشاۋلانۋ ۋاقىتى ءوتتى

كەزدەسۋدە سويلەگەن سوزىندە قاسىم-جومارت توقاەۆ قوناقجايلىق تانىتىپ, ءسامميتتى جوعارى دەڭگەيدە ۇيىمداس­تىرعانى ءۇشىن وزبەكستان پرەزيدەنتى شاۆكات ميرزيوەۆكە العىس ايتا كەلە, ورتالىق ازيا مەملەكەت باسشىلارىنىڭ كونسۋلتاتيۆتىك كەزدەسۋلەرى ءوز تيىمدىلىگىن دالەلدەگەنىن اتاپ ءوتتى.

– قازىر ورتالىق ازيا اۋقىمدى ترانسفورماتسيا كەزەڭىن وتكەرىپ جاتىر. جابىق شەكارالار مەن وقشاۋلانۋدىڭ ۋاقىتى ءوتتى. مۇنى سەنىممەن ايتۋعا بولادى. ورتاق كۇش-جىگەردىڭ ارقاسىندا ءوڭىردىڭ ىشكى بىرلىگى ارتتى. بۇل ەلدەرىمىزدىڭ دامۋىنا جانە حالىقارالىق ىنتىماقتاستىققا كەڭى­نەن جول اشتى. الەمنىڭ الدىڭعى قاتار­لى مەملەكەتتەرى ءوڭىردىڭ جاھاندىق ۇدەرىس­تەردە ماڭىزدى ءرول اتقاراتىنىن مويىندايدى. سوندىقتان «ورتالىق ازيا پليۋس» فور­ماتىنا قىزىعۋشىلىق ارتىپ كەلەدى. بۇعان بيىل نەگىزگى شەتەلدىك سەرىكتەستەرمەن وتكەن سامميتتەر دالەل بولا الادى. مەنىڭ ويىمشا, مۇنداي سەرىكتەستىكتىڭ باستى ماقساتى – وڭىردەگى تۇراقتىلىقتى نىعايتۋ جانە ور­نىقتى پروگرەسس ءۇشىن جاعداي جاساۋ, ەل­دەرىمىز بەن حالىقتارىمىزدىڭ ءال-اۋقا­تىن, باقۋاتتى تۇرمىسىن قامتاماسىز ەتۋ. ورتالىق ازيانىڭ الەۋمەتتىك-ەكونوميكا­لىق تۇرعىدان قارقىندى دامىعان ءارى جان-جاقتى ىنتىماقتاستىق پەن بەيبىتشىلىك ورناعان بەرەكەلى ءوڭىر رەتىندەگى مارتەبەسىن نىعايتۋدى كوزدەيمىز, – دەدى پرەزيدەنت.

سونداي-اق قاسىم-جومارت توقاەۆ وڭىرلىك ىقپال­داستىقتىڭ ەكونوميكالىق نەگىزىن كۇشەيتكەن تولايىم تابىستارعا توقتالدى.

– ءوندىرىس, ەنەرگەتيكا, ماشينا جاساۋ, اگروونەركاسىپ جانە باسقا دا سەكتورلاردا بىرلەسكەن كاسىپورىنداردىڭ سانى كوبەيىپ, اۋقىمدى جوبالار جۇزەگە اسىرىلىپ جاتىر. ساۋدا كەدەرگىلەرى بىرتىندەپ جويىلىپ, جاڭا وتكىزۋ بەكەتتەرى اشىلىپ, اۆتو, تەمىرجول ارقىلى بايلانىس جاندانىپ كەلەدى. ناتيجەسىندە, بىلتىر ءوڭىر ىشىندەگى ساۋدا-ساتتىق كولەمى 11,5 ملرد دوللارعا جەتتى. كورسەتكىشتى 20 ملرد دوللارعا دەيىن جەتكىزۋ ءۇشىن وسى قارقىندى ساقتاۋ قاجەت دەپ ويلايمىن, – دەدى پرەزيدەنت.

مەملەكەت باسشىسى پەرسپەكتيۆتى سالالاردا سەرپىندى جوبانى بىرلەسە ىسكە قوسۋدى ۇسىندى. ونىڭ ايتۋىنشا, قازاقستان بيدايدى, مايلى داقىلداردى, ەت-ءسۇت ونىمدەرىن تەرەڭ وڭدەۋ, مال جانە ورگانيكالىق ەگىن شارۋاشىلىقتارىن دامىتۋ ارقىلى بۇل باعىتتا ءتيىمدى جۇمىس اتقارۋعا دا­يىن. سونىمەن قاتار زاماناۋي قويمالار, لوگيستيكالىق ورتالىقتار سالۋ, ىشكى نا­رىق­قا جانە ەكسپورتقا ارنالعان دايىن تاعام ونىمدەرىن ءوندىرۋ باعىتتارى­نىڭ كەلە­شەگى زور. حالىقارالىق ارەناداعى وز­گەرىستەر كەزەڭىندە ورتالىق ازيا ەل­دەرىنىڭ ەۋرازياداعى نەگىزگى ترانزيتتىك توراپقا اينالۋعا بىرەگەي مۇمكىندىگى بار. مەم­لەكەت باسشىسى ەلدەرىمىز تەك كەلىسىمدى ءارى ۇيلەسىمدى ارەكەت ەتكەندە عانا ايماقتىڭ الەۋەتى تولىق اشىلاتىنىنا سەنىمدى.

– ءبىر-ءبىرىن قايتالايتىن تەكسەرىستەردەن, شەكارادان ءوتۋ كەزىندەگى شەكتەن تىس بيۋروكراتيالىق راسىمدەردەن ارىلۋ ءۇشىن جۇكتى تاسىمالداۋدىڭ بىرىڭعاي ەلەكتروندىق جۇيەسىن ەنگىزۋ ماسەلەسىن قاراستىرعان ءجون. ايماقتىڭ الەۋەتىن ودان ءارى نىعايتۋ ءۇشىن ورتالىق ازيانىڭ كولىك جۇيەسىن دامىتۋدىڭ كەشەندى ستراتەگياسىن بىرلەسىپ ازىرلەۋدى ۇسىنامىز. شەكارا ماڭىندا قالىپتاسىپ كەلە جاتقان ونەركاسىپ حابى كەڭ مۇمكىندىككە جول اشادى. ونى دامىتۋ اياسىندا جوعارى تەحنولوگيالىق جوبالاردى ىسكە قوسۋعا باسا نازار اۋدارعان ءجون, – دەدى پرەزيدەنت.

قاسىم-جومارت توقاەۆ جيىنعا قاتىسۋشىلار نازارىن سيرەك كەزدەسەتىن مەتالداردى ءوندىرۋ جانە وڭدەۋ سالاسىنداعى ىقپالداستىق كەلەشەگىنە اۋداردى.

– مەملەكەتتەرىمىز ازىرگە تولىق بارلان­باعان, بىراق ايتارلىقتاي مول رەسۋرسقا يە. ايماققا وزىق تەحنولوگيا تارتۋ جانە يننوۆاتسيالىق شەشىمدەردى ەنگىزۋ ىسىندە كۇش بىرىكتىرۋ كەرەك. قازاقستان استانادا سيرەك مەتالداردى زەرتتەۋ جونىندەگى وڭىرلىك ورتالىعىن قۇرۋ باستاماسىن كوتەرگەن بولاتىن. بۇل مەكەمەدە كەنىشتەر مەن ونى يگەرۋ تەحنولوگيالارى تۋرالى وزەكتى اقپاراتتاردى جيناقتاپ, ينۆەستورلارعا ۇسىنا الامىز, – دەدى مەملەكەت باسشىسى.

جاساندى ينتەللەكت تەحنولوگياسىن كەڭىنەن قولدانۋ ناتيجەسىندە پايدا بولاتىن مۇمكىندىكتەرگە توقتالعان پرە­زيدەنت بۇل سالاداعى سەرىكتەستىكتى ودان ءارى دامىتۋ ءۇشىن اتالعان تەحنولوگيا­نى قولدانۋدىڭ بىرىڭعاي ستاندارتتارىن ازىرلەۋدى, ورتالىق ازيا مەملەكەتتەرىندە جي-ءدى جاۋاپكەرشىلىكپەن پايدالانۋ تۋرالى دەكلاراتسيانىڭ جوباسىن دايىنداۋدى ۇسىندى. قۇجات بىرلەسكەن تسيفرلىق جوبالار اياسىندا مالىمەت الماسقان كەزدە اشىقتىقتى, سەنىم مەن قاۋىپسىزدىكتى قامتاماسىز ەتۋگە مۇمكىندىك بەرەدى. وسىلايشا, بارلىق قاتىسۋشىنىڭ قۇقىعى قورعالاتىنىنا كەپىل بولادى.

سۋ قاۋىپسىزدىگى – وزەكتى ماسەلە

بۇل ورايدا ورتالىق ازيا ەلدەرى كە­يىن­­گى بەس جىلدا سۋ ساياساتىنا قا­تىس­­تى ۇس­تا­نىمدارىن جاڭعىرتتى. قازاقستان پرەزي­دەنتى سۋ ماسەلەلەرىنىڭ ترانسشەكارالىق سيپاتىن ەسكەرە وتىرىپ, سالالىق ستراتەگيانى ۇيلەستىرۋ ماڭىزدى دەپ سانايتىنىن ايتتى.

– بۇل ءبىر جاعىنان سۋ ۇنەمدەۋدىڭ اناعۇر­لىم ءساتتى تاجىريبەلەرىن كەڭىنەن تاراتۋ ءۇشىن قاجەت. الداعى ۋاقىتتا حالىق­ارالىق ستاندارتتارعا سايكەس ورتالىق ازيا­نىڭ سۋدى پايدالانۋ جونىندەگى نەگىزدەمەلىك كون­ۆەن­تسياسىن قابىلداۋدى ويلاستىرۋعا بولا­دى. مۇنداي قۇجات سالاداعى بىرىڭعاي جۇ­مىس قاعيداتتارىن بەكىتىپ, ىقتيمال قارا­ما-قايشىلىقتاردىڭ الدىن الۋعا مۇمكىن­دىك بەرەدى. كەلەسى جىلى ءساۋىر ايىندا استانادا وڭىرلىك ەكولوگيالىق سامميتى­مەن قاتار وتەتىن حالىقارالىق ارالدى قۇت­قارۋ قورىنا مۇشە مەملەكەت باسشىلارى­نىڭ جيىنىندا وسى تاقىرىپقا ورالىپ, ۇسىنىستاردى تالقىلاي الامىز. سىزدەر اتالعان ءىس-شارالارعا بەلسەندى قاتىسادى دەپ سەنەمىن, – دەدى مەملەكەت باسشىسى.

سونداي-اق قاسىم-جومارت توقاەۆ ورتاق تاريحي-مادەني مۇرانى ساقتاۋدىڭ, ۇلتتىق قولونەردى ناسيحاتتاۋ جانە تۇراق­تى تۇردە بىر­لە­سكەن ءىس-شارا ۇيىم­داس­تى­رۋدىڭ ماڭى­زىنا نازار اۋداردى. كينە­ما­توگرافيا سالاسىندا, سونداي-اق زاماناۋي تۋريستىك كلاستەرلەر قۇرۋ جانە جاڭا تەحنولوگيالاردى پايدالانۋ ارقىلى ۇلى جىبەك جولىنىڭ مۇراسىن دارىپتەۋدە ءبىرشاما ءىس تىندىرۋعا بولادى.

– وسى سالادا بارىنشا بەلسەندى ارەكەت ەتىپ, تۋريزم ساياساتىن ءوزارا ءتيىمدى ۇيلەستىرەتىن ۋاقىت جەتتى دەپ ويلايمىن. بۇعان دەيىن بۇكىل وڭىرگە ورتاق تۋريستىك باعدارلاردى دامىتۋ تۋرالى ۇسىنىس ايتىلعان ەدى. ءبىز مۇنداي باستامالاردى قولدايمىز. بۇدان بولەك, ورتالىق ازيانىڭ ءبىرتۇتاس تۋريستىك برەندىن ىلگەرىلەتۋدە پارمەندى شارالار قابىلداۋدى ۇسىنامىز. تۋريزم سالاسىنداعى ىنتىماقتاستىق تۋرالى كەلىسىم جانە ورتالىق ازيا ەلدەرىنىڭ بىرىڭعاي تۋريستىك كەڭىستىگىن قالىپتاستىرۋ اتالعان سالاداعى بايلانىستارىمىزدى جانداندىرۋعا قۇقىقتىق نەگىز بولا الادى, – دەدى پرەزيدەنت.

الەمدەگى گەوساياسي دۇربەلەڭ جاعدايىن­دا وڭىرلىك تۇراقتىلىق پەن قاۋىپسىزدىكتى كۇشەيتۋدىڭ ءمانى زور. بۇل رەتتە پرەزيدەنت تاجىكستان مەن قىرعىزستان اراسىنداعى مەم­لەكەتتىك شەكارا تۋرالى, سونداي-اق قىرعىزستان, تاجىكستان جانە وزبەكستان شەكارا­لارىنىڭ ءتۇيىسۋ نۇكتەسى تۋرالى شارتتار­عا قولداۋ ءبىلدىرىپ, بۇل مامىلەلەردى ماڭىز­دى قادام رەتىندە باعالادى. بۇدان بولەك, جاقىندا تاجىكستاننىڭ XXI عاسىر­داعى دوستىق جونىندەگى شارتقا قوسىلۋىن ەلەۋلى شەشىم دەپ اتادى.

قاسىم-جومارت توقاەۆتىڭ پىكىرىنشە, ءوڭىر ءالى دە تەرروريزم مەن ءدىني ەكسترەميزم, ەسىرتكى تاسىمالى جانە ترانسۇلتتىق قىلمىس سەكىلدى سىن-قاتەرلەرمەن بەتپە-بەت كەلىپ وتىر. بۇل قاۋىپتەردى بىرلەسىپ قانا ەڭسەرۋگە بولادى. وسى باعىتتاعى جۇمىس ءوڭىر ەلدەرىنىڭ قاۋىپسىزدىك كەڭەستەرى حاتشىلارى دەڭگەيىندە جۇرگىزىلۋگە ءتيىس. ءسوزىنىڭ سوڭىندا پرەزيدەنت كونسۋلتاتيۆتىك كەزدەسۋ فورماتىن ودان ءارى جەتىلدىرۋ ماسەلەسىنە توقتالدى.

– ۇلتتىق ۇيلەستىرۋشىلەر كەڭەسى بەكىتىل­گەننەن بەرى بۇل الاڭ تيىمدىلىگىن كورسەت­تى. كەڭەستىڭ ءرولىن كۇشەيتەتىن ۋاقىت كەلدى دەپ ويلايمىن. ول ۋاعدالاستىقتاردىڭ ورىندالۋىن باقىلاۋمەن شەكتەلمەي, ءوڭىردى دامىتۋدىڭ ستراتەگيالىق ۆەكتورلارىن ازىرلەۋمەن اينالىسۋى كەرەك. وزبەكستان پرەزيدەنتى شاۆكات ميرزيوەۆتىڭ وسى فورماتتىڭ ينستيتۋتسيونالدىق نەگىزىن كۇشەيتۋگە قاتىستى ۇسىنىسىن قۋاتتايمىن. بۇل ماسەلەلەردى جۇمىس تارتىبىندە تالقىلاپ, ءتيىستى باستامالاردى بەكىتۋگە بولادى دەپ ويلايمىن. ورتالىق ازيا ساراپتامالىق فورۋمىن وڭىرلىك ىقپالداستىق جۇيەسىنە قوسۋدى ۇسىنامىن. سونىڭ ناتيجەسىندە فورۋم زەرتتەۋ جۇرگىزەتىن جانە بىرىڭعاي تاسىلدەر قالىپتاستىراتىن نەگىزگى پلاتفورماعا اينالا الادى, – دەدى مەملەكەت باسشىسى.

وڭىرلىك قوعامداستىق قۇرۋ ۇسىنىلدى

سامميتتە وزبەكستان پرەزيدەنتى شاۆكات ميرزيوەۆ, تۇرىكمەنستان پرەزيدەنتى سەردار بەردىمۇحامەدوۆ, تاجىكستان پرەزيدەنتى ەمومالي راحمون, قىرعىزستان پرەزيدەنتى سادىر جاپاروۆ جانە ازەربايجان پرەزيدەنتى يلحام اليەۆ ءسوز سويلەدى. سونىمەن قاتار بۇۇ باس حاتشىسى انتونيۋ گۋتەرريش بەينەۇندەۋ جولدادى.

شاۆكات ميرزيوەۆ كەزدەسۋدىڭ فورماتىنا وزگەرىس ەنگىزىپ, ونىڭ بەدەلىن ارتتىرۋ قاجەتتىگىن ايتتى.

– ءبىزدىڭ كەزدەسۋلەرىمىزدى وڭىرلىك ديالوگ دەڭگەيىنەن ورتالىق ازيا قوعامداستىعىنىڭ ستراتەگيالىق فورماتى دارەجەسىنە كوتەرەتىن ۋاقىت كەلدى. وسىعان بايلانىستى ونىڭ ينستيتۋتسيونالدىق جانە ۇيىمداستىرۋشىلىق نەگىزدەرىنىڭ ناقتى ماسەلەلەرىن زەردەلەيتىن كونسۋلتاتيۆتىك كەزدەسۋلەر تۋرالى ەرەجە ازىرلەۋدى ۇسىنامىز. روتاتسيالىق نەگىزدە جۇمىس ىستەيتىن حاتشىلىق قۇرىلسىن. ۇلتتىق ۇيلەستىرۋشىلەردىڭ مارتەبەسىن پرەزيدەنتتەردىڭ ارنايى وكىلدەرى دەڭگەيىنە كوتەرۋ قاجەت, – دەدى وزبەكستان باسشىسى.

سونداي-اق شاۆكات ميرزيوەۆ ورتاق قۇندىلىقتار مەن حالىقتىق ديپلوماتيا داستۇرلەرىنە سۇيەنە وتىرىپ, باي ومىرلىك تاجىريبەگە يە قوعام قايراتكەرلەرىنىڭ قاتىسۋىمەن اقساقالدار كەڭەسىن قۇرۋدى ۇسىندى. ونىڭ ويىنشا, بۇل باستاما ۇرپاقتار اراسىنداعى بايلانىستى تەرەڭدەتۋگە, جالپى وڭىرلىك ىنتىماقتاستىق پەن بىرەگەيلىكتى نىعايتۋعا ىقپال ەتەدى.

ال تاجىكستان پرەزيدەنتى ەمومالي راحمون ايماقتاعى كولىك دالىزدەرىن دامىتۋ­عا نازار اۋدارۋ كەرەكتىگىن مالىمدەدى.

– ترانزيتتىك مارشرۋتتارعا دەگەن سۇرا­نىستىڭ ارتقان كەزەڭىندە ءبىزدىڭ ايماق كولىك جانە لوگيستيكالىق بايلانىس­تار­دىڭ ستراتەگيالىق تورابىنا اينالىپ جاتىر. كولىك-كوممۋنيكاتسيالىق ينفراقۇرىلىمدى ينتەگراتسيالاۋ جانە لوگيستيكالىق ۇدەرىستەردى تسيفرلاندىرۋ ارقىلى وسى سالاداعى ىنتىماقتاستىقتى جۇيەلى جولعا قويۋ قاجەت. سونداي-اق تەمىرجول, اۋە جانە ارالاس تاسىمال باعىتىنداعى مۇمكىندىكتى ۇتىمدى پايدالانۋ ورىندى. بۇل جۇك تاسىمالىن ۇلعايتۋ جانە ءوڭىردىڭ ينۆەستيتسيالىق تارتىمدىلىعىن ارتتىرۋ ءۇشىن جاڭا مۇمكىندىكتەر اشادى. وسى رەتتە ورتالىق ازيانىڭ ورتاق كولىك-لوگيستيكالىق كەڭىستىگىن قالىپتاستىرۋدى ۇسىنامىز, – دەدى ەمومالي راحمون.

كونسۋلتاتيۆتىك كەزدەسۋدە پرەزي­دەنت­تەر ورتالىق ازيا مەملەكەت باس­شى­لارىنىڭ VII كونسۋلتاتيۆتىك كەزدەسۋى­نىڭ قورىتىندىسى بويىنشا بىرلەس­كەن مالىم­دەمەسىنە, ورتالىق ازيا مەملەكەت­ باسشىلارىنىڭ 2027–2028 جىلدار ارالىعىندا بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە قىرعىز رەسپۋبلي­كاسىنىڭ كانديداتۋراسىن ۇسىنۋ بويىنشا بۇۇ-عا مۇشە ەلدەرگە ۇندەۋىنە قول قويدى. سونداي-اق ورتالىق ازيا مەملەكەت باسشىلارىنىڭ بىرلەسكەن مالىمدەمەسىنە سايكەس وڭىرلىك قاۋىپسىزدىك, تۇراقتىلىق جانە ورنىقتى دامۋ تۇجىرىم­داماسى, قاۋىپسىزدىك تاۋەكەلدەرى مەن ولار­دىڭ الدىن الۋدىڭ 2026–2028 جىلدارعا ارنالعان تىزبەسى قابىلداندى.

حالىقارالىق سىيلىق تاپسىرىلدى

وسىناۋ جيىننان ءبىر كۇن بۇرىن پرەزيدەنت قاسىم-جومارت توقاەۆ ورتالىق ازيا جانە ازەربايجان مەملەكەت باسشىلارىمەن بىرگە يسلام وركەنيەتى ورتالىعىنا باردى.

سونداي-اق «كەلەشەك مۇراسى» حالىق­ارالىق سىيلىعىن تاپسىرۋ ءراسىمى ءوتتى. وزبەكستان پرەزيدەنتى شاۆكات ميرزيوەۆ­تىڭ ايتۋىنشا, بۇل سىيلىق ءداستۇردى جاڭعىر­تۋعا, ونەردى دامىتۋعا, سونداي-اق ۇلتتىق رۋحاني مۇرانى ناسيحاتتاۋعا ەلەۋلى ۇلەس قوسقان مادەنيەت قايراتكەرلەرىنە بەرىلەدى.

حالىقارالىق سىيلىققا يە بولعاندار قاتارىندا م.اۋەزوۆ اتىنداعى قازاق ۇلتتىق دراما تەاترىنىڭ ءارتىسى ەركەبۇلان دايىروۆ بار. ول «تەاتر جانە كينو» اتالىمى بويىنشا «كەلەشەك مۇراسى» سىيلىعىنىڭ لاۋرەاتى اتاندى.

استانا – تاشكەنت – استانا