كوكشەتاۋ قالاسىنىڭ تۇرعىنى ءدىنبولات قۇسايىنوۆ اناسىنىڭ ءومىرىن ساقتاپ قالۋ ءۇشىن باۋىرىن دونور رەتىندە بەردى. بۇل شەشىمگە ول التى جىل بۇرىن بەكىگەنىمەن, اناسىنىڭ كەلىسىمىن ۇزاق كۇتۋگە تۋرا كەلگەن, دەپ جازادى Egemen.kz.
مەڭدىگۇل لاتيف – جوعارى ساناتتى حيرۋرگ-انەستەزيولوگ, 33 جىلدىق ەڭبەك ءوتىلى بار تاجىريبەلى مامان. الماتى قالاسى مەن سولتۇستىك قازاقستان وڭىرىندەگى اۋرۋحانالاردا جۇزدەگەن وتا جاساپ, تالاي ادامنىڭ ءومىرىن اراشالاپ قالعان. قازىر اقمولا وبلىستىق كوپبەيىندى اۋرۋحانا جانىنداعى ونكوديسپانسەردىڭ حيميوتەراپيا ءبولىمىن باسقارادى. كۇن سايىنعى تىنىمسىز جۇمىستىڭ ورتاسىندا ول جۇقپالى ۆيرۋستى بايقاۋسىزدا جۇقتىرىپ العان: بالكىم قان ارقىلى, بالكىم قولعاپ ارقىلى ناۋقاستان بەرىلگەن بولۋى مۇمكىن.
«ۆ جانە D گەپاتيتى باۋىردى زاقىمداعان ەكەن. بۇعان دەيىن بىلمەدىم. 2019 جىلى جۇبايىمنان بۇيرەك وبىرى انىقتالعاندا قاتتى كۇيزەلدىم, كوپ جىلادىم. سول كەزدە اۋىرسىنۋ باستالىپ, تەكسەرۋدەن وتكەندە – تسيرروز دەگەن دياگنوز قويىلدى. سودان بەرى التى جىل بويى اۋرۋمەن كۇرەستىم», دەيدى ول.
اناسىنىڭ جاعدايىن ەستىگەن ءدىنبولات قاتتى قينالعان.
«جۇرەگىم ەزىلىپ, كوز جاسىم تىيىلمادى. قالاي ءومىر سۇرەمىن دەگەن وي مازالادى. العاشىندا دارىگەرلەر مارقۇم دونوردان الىنعان باۋىر قاجەت دەدى. بىراق مۇنداي كەزەككە قازاقستاندا ءتورت مىڭعا جۋىق ادام تىركەلگەن. انامنىڭ جاعدايى كۇن سايىن ناشارلاپ بارا جاتقان سوڭ, ءوزىم دونور بولاتىنىمدى ايتتىم», دەيدى ول.
ءدىنبولاتتىڭ تالداۋلارى دونورلىققا تولىق سايكەس كەلگەن. الايدا انا جۇرەگى بىردەن كەلىسە قويماعان.
«ول – مەنىڭ جالعىز ۇلىم. 2019 جىلى سپورت شەبەرى اتاعىن الىپ جاتقان كەزى ەدى. ونىڭ ومىرىنە قاۋىپ توندىرە المايىن دەپ ويلادىم. بالامنان باۋىر الۋ تۋرالى ويدىڭ ءوزى قورقىنىشتى بولدى», دەيدى مەڭدىگۇل ساۋىتحانقىزى.
سوڭعى ەكى جىلدا دارىگەردىڭ جاعدايى كۇرت ناشارلاعان. ء«ومىرىم قىل ۇستىندە تۇردى. ۇلىم, قىزىم, نەمەرەم كۇندىز-ءتۇنى جىلاپ ءجۇردى. تەك ءبىر تىلەۋىم – 80 جاستاعى انام مەنىڭ قينالعانىمدى كورمەسە ەكەن», دەيدى ول.
قان كەتۋ باستالعان ساتتە ءدىنبولات شەشىم قابىلداۋدى كۇتكىزبەدى. «ماما, كەتتىك. ءبىز ەندى دونور كۇتىپ وتىرمايمىز», دەگەندە, اناسى تاۋەكەل ەتۋگە بەل بۋعان. «ولسەم, بۇيىرعانى سول شىعار. بالالارىم وكىنبەسىن دەدىم. ۇلىمنىڭ كوزىندەگى جاس ءبارىن شەشتى», دەيدى ول.
بۇل مەڭدىگۇل ءلاتيفتىڭ ومىرىندەگى توعىزىنشى ءارى ەڭ اۋىر وپەراتسيا بولدى. ۇلىنىڭ باۋىرىنان ۇلگى الۋ 6,5 ساعاتقا, اناسىنا ترانسپلانتاتسيا جاساۋ 9,5 ساعاتقا سوزىلعان.
«ويانعان ساتتە جانىمدا ەشكىم بولمادى. ەڭ الدىمەن ۇلىمدى ىزدەدىم. ول – مەنىڭ جالعىز تىرەگىم. قول-اياعىم دىرىلدەپ كەتتى. رەانيماتسيادا وتكەن سەگىز كۇن تەك سونى كۇتۋمەن ءوتتى. پالاتاعا اۋىستىرعان سوڭ بارىپ كورىستىك. بۇل ءساتتى سوزبەن جەتكىزۋ قيىن. ەكەۋمىز ۇزاق قۇشاقتاسىپ تۇردىق. «ماما, سەن ءتىرىسىڭ بە؟» دەپ تە سۇرامادى, مەن دە جاۋاپ بەرمەدىم. تەك ءۇنسىز قۇشاقتاستىق», دەپ ەسكە الادى ول.
بۇگىندە اناسىنا ەكىنشى ءومىر سىيلاعان ءدىنبولات سپورت مەكتەبىندە جاتتىقتىرۋشى بولىپ جۇمىس ىستەيدى. ءوزىنىڭ وتباسى, بالالارى بار. اكەسى – مەديتسينا قىزمەتكەرى, ال اپكەسى موڭعوليادا دارىگەر. مەڭدىگۇل لاتيف سىرقاتتان ايىققان سوڭ ونكوديسپانسەردە ەمدەۋ جۇمىسىن قايتا جالعاستىرعان.