تۇركىستان وبلىسىندا 20 قازان مەن 19 قاراشا ارالىعىندا براكونەرلىكتى بولدىرماۋ, بيولوگيالىق رەسۋرستاردىڭ زاڭسىز اينالىمىن انىقتاۋ جانە ونىڭ الدىن الۋ ماقساتىندا جۇزەگە اسىرىلىپ جاتقان "براكونەر" جەدەل-پروفيلاكتيكالىق ءىس-شاراسىنىڭ 22 تاۋلىگى ىشىندە 2 قىلمىستىق قۇقىق بۇزۋشىلىق جانە تابيعاتتى قورعاۋ زاڭناماسىن بۇزۋدىڭ 212 دەرەگى انىقتالدى, دەپ جازادى Egemen.kz.
پوليتسيا دەپارتامەنتى قوعامدىق قاۋىپسىزدىك باسقارماسىنىڭ تابيعاتتى قورعاۋ جانە قارۋ اينالىمىن باقىلاۋ توبىنىڭ ينسپەكتورى عالىمجان ارىستانبەك ۇلىنىڭ مالىمدەۋىنشە, اڭشىلىق جانە جانۋارلار دۇنيەسىن پايدالانۋ ەرەجەلەرىن بۇزعانى ءۇشىن 75 قۇقىق بۇزۋشى اكىمشىلىك جاۋاپكەرشىلىككە تارتىلدى.
تىركەلمەگەن قارۋدى زاڭسىز يەمدەنۋ, ساقتاۋ جانە الىپ ءجۇرۋ بويىنشا 24 قارۋ تاركىلەنگەن. ازاماتتىق جانە قىزمەتتىك قارۋ اينالىمى قاعيدالارىن بۇزعان 47 ازامات انىقتالىپ, جاۋاپكەرشىلىككە تارتىلدى. سونىمەن قاتار وڭىردە زاڭسىز بالىق اۋلاعان 65 ازاماتقا شارا قولدانىلعان. ماسەلەن, شاردارا اۋدانىندا قۇقىق بۇزۋشىلاردان 100 كەلىگە جۋىق بالىق, ۇرمەلى ەسكەك, رەزەڭكە قايىق جانە 300 مەترگە جۋىق تىيىم سالىنعان مونوتالشىقتى قىتاي اۋى تاركىلەندى.
بۇل ءجايت «بالىق رەسۋرستارىن, باسقا دا سۋ جانۋارلارىن نەمەسە وسىمدىكتەردى زاڭسىز ءوندىرۋ» بويىنشا تىركەلگەن. زاتتاي دالەلدەمەلەرى بار براكونەرلەر پوليتسيا بولىمىنە جەتكىزىلدى. قازىرگى ۋاقىتتا شاردارا سۋ قويماسىنداعى زاڭسىز بالىق اۋلاۋ دەرەگى بويىنشا سوتقا دەيىنگى تەرگەۋ امالدارى جۇرگىزىلۋدە.
تۇركىستان وبلىسى