فۋتبولدان قازاقستان ۇلتتىق قۇراماسىنىڭ باس باپكەرىنىڭ مىندەتىن اتقارۋشى تالعات بايسۋفينوۆ 2026 جىلعى الەم چەمپيوناتىنىڭ ىرىكتەۋى اياسىندا بەلگياعا قارسى وتەتىن ماتچ الدىندا وتكەن ءباسپاسوز ءماسليحاتىندا جۋرناليستەردىڭ سۇراقتارىنا جاۋاپ بەردى, دەپ حابارلايدى Egemen.kz kazfootball.kz سايتىنا سىلتەمە جاساپ.
– ءبىز بۇل ماتچتى كۇتتىك. بارلىعى دايىن, تەك مۋرودجون حالماتوۆ جاراقات الىپ قالدى. ەرتەڭگى ويىن ءبارىن كورسەتەدى.
– ەرتەڭ شابۋىلعا دەن قويعان ويىن كۇتە الامىز با؟
– بىلەسىزدەر, ءبىز ەسكى تۇسىنىكتەردەن بىرتىندەپ باس تارتىپ جاتىرمىز. ببەلگىلى ءبىر باعىتتى تاڭدادىق. قارسىلاستىڭ كۇشىن, موتيۆاتسياسىن, ماقساتىن جاقسى تۇسىنەمىز. ءبىز وزىمىزگە ماكسيمالدى مىندەت قويدىق. جانكۇيەرلەر ءۇشىن دە, ءوزىمىز ءۇشىن دە ناتيجە ءبىرىنشى ورىندا. ەگەر جاقسى ناتيجە بولسا, ول الداعى ۋاقىتتا سەرپىن بەرەدى. تەك قورعانىستا وتىرىپ, جاقسى ناتيجەگە جەتۋ قيىن. ويىنشىلارمەن تەوريالىق ءارى موتيۆاتسيالىق جۇمىستار جۇرگىزدىك. قارسىلاس ءبىز قانشالىقتى مۇمكىندىك بەرسەك, سونشالىقتى ناتيجەلى وينايدى. ال ولاردىڭ بىزگە ءوز ويىنىن كورسەتۋگە قانشالىقتى مۇمكىندىك بەرەتىنىن ەرتەڭ كورەمىز.
– بولاشاققا قاتىستى سۇراق. باس باپكەر لاۋازىمىنا كانديداتتار تۋرالى جاڭالىقتار توقتاپ قالدى. بۇل ءسىزدىڭ ورنىڭىزدا قالاتىنىڭىزدى بىلدىرە مە؟
– ءبىز – ۇلتتىق قۇراما رەتىندە جينالىپ وتىرمىز. كلۋبتاعى كەلەسى ماۋسىمعا دايىندىق ءالى باستالعان جوق. شەتەلدىك مامان ماسەلەسىنە كەلسەك, ول – باسشىلىق شەشەتىن سۇراق. ەكى ويىندى وتكىزىپ الايىق, سودان كەيىن الداعى قادامداردى سويلەسەمىز.
– ويىن جوسپارى قانداي؟
– العاشقى ويىندا جىگىتتەر جاقسى وينادى. بىراق سولتۇستىك ماكەدونيا مەن بەلگيا ويناعان ماتچتى كوردىڭىزدەر, قانشا سوققى جاسالدى, بىراق گول سوعىلمادى. بۇل – فارت پا, الدە جولى بولماۋ ما؟ ارينە, بىزدە ا جانە ۆ جوسپارى بار. قۋات ەسكەرتۋ ليميتىنە بايلانىستى ويىندى وتكىزىپ الدى. قازىر وعان لايىقتى اۋىساتىن ويىنشىنى دايارلاپ جاتىرمىز. ويىن ۇستىندە قيىن بولادى. ءبىز ەكى نۇسقانى دا ويىنشىلارعا كورسەتىپ, ءبارىن تالدادىق. جىگىتتەردىڭ ويىن تونۋسى جاقسى.
ءبىز جاس ويىنشىلاردى ىزدەدىك. بۇل باعىتتا ءالي اليەۆ جۇمىس ىستەدى. فارەر ارالدارىنا قارسى ويىندا روتاتسيا جاساۋدى جوسپارلاپ وتىرمىز. قىزىقتى بولادى دەپ ويلايمىن. داۋرەن جۇماتتىڭ دەبيۋتتىك ويىنى اۋىر ءوتتى, شارشاڭقى بولدى. ءبىزدىڭ چەمپيونات اياقتالدى. ويىن تونۋسىندا جۇرگەندەرگە باسىمدىق بەرىلەدى. نەگىزگى قۇرام قالىپتاسىپ كەلەدى. باسەكەلەستىك بار. قۇرامدى جاتتىعۋدان كەيىن انىقتايمىز.
– وتكەن جيىنعا قاشكەندى, بۇل جولى قۇسايىپوۆتى شاقىردىڭىزدار. ويىنشىلاردى شاقىرۋدا قانداي دا ءبىر ستاتيستيكاعا سۇيەندىڭىزدەر مە؟
– ستاتيستيكاعا قاراعان جوقپىز. سەرگەي مالىي مەن ۇلار جاقسىباەۆ جاراقات العاندىقتان, دىنمۇحامەد قاشكەندى شاقىردىق. ونىڭ مۇمكىندىكتەرىن جاقسى بىلەمىز, اۆانس رەتىندە شاقىردىق. قازىر قاتارىمىزدا مالىي, ءالىپ, قاسىم بار. سوندىقتان تالعات قۇسايپوۆ پەن ساعادات تۇرسىنباي بار. الىپتەن وزگە سول پوزيتسيادا شەبەر وينايتىن, اسىرەسە سول اياعى جاقسى جۇمىس ىستەيتىن فۋتبولشىلار جوق ەكەنىن تۇسىنەمىز.
– ەرتەڭ داستان ساتپاەۆ ويناي ما؟
– ونىڭ جاراقاتى بار, ونى بىلەمىز. 3-4 كۇن بۇرىن سويلەستىك. ول – ۇلكەن كاسىبي ويىنشى. جاتتىعۋدا كورەمىز, ەگەر اۋىرسىنۋ بولسا, ءوزى ايتادى.
– جەرەمي دوكۋعا قارسى قانداي جوسپار بار؟
– ءيا, ونىڭ قانداي فورمادا ەكەنىن كورىپ وتىرمىز. ول وينايدى, ءبىز دە وينايمىز. ءبىز جەكە وپەكا قويمايمىز. بىزدە دە جاقسى ويىنشىلار بار. بەلگيا – تەك دوكۋ ەمەس, بۇكىل كوماندا مىقتى.