تاشكەنت قالاسىندا ورتالىق ازيا ەلدەرىنىڭ مادەنيەت مينيسترلەرىنىڭ العاشقى كەزدەسۋى ءوتتى. جيىنعا قازاقستان, وزبەكستان, قىرعىزستان, تاجىكستان, تۇرىكمەنستان مادەنيەت مينيسترلىكتەرىنىڭ باسشىلارى, سونداي-اق قۇرمەتتى قوناق رەتىندە ازەربايجاننىڭ مادەنيەت ءمينيسترى قاتىستى.
ارىپتەستەرىنە جىلى لەبىزىن بىلدىرگەن مادەنيەت جانە اقپارات ءمينيسترى ايدا بالاەۆا بۇل العاشقى كەزدەسۋ ورتالىق ازيا ەلدەرى اراسىنداعى مادەني ىنتىماقتاستىق تاريحىنداعى ماڭىزدى كەزەڭ ەكەنىن اتاپ ءوتتى. ونىڭ ايتۋىنشا, بۇل جيىن ءوڭىر ەلدەرىنىڭ مادەني بايلانىستارىن نىعايتىپ, ءوزارا ىنتىماقتاستىقتى جاڭا دەڭگەيگە كوتەرۋگە دەگەن ورتاق ۇمتىلىستىڭ ايقىن دالەلى.
«بۇگىندە الدىمىزدا مادەني كەڭىستىكتىڭ دامۋىنا قوسىمشا سەرپىن بەرەتىن ناقتى شارالار مەن باستامالاردى كەلىسىپ قابىلداۋ مىندەتى تۇر», دەپ اتاپ ءوتتى مينيستر.
ايدا بالاەۆا ورتالىق ازيانىڭ مادەني كۇنتىزبەسىن ازىرلەۋ باستاماسىن ۇسىندى. بۇل قۇجات وڭىردەگى ماڭىزدى مادەني شارالاردى جۇيەلەۋگە جانە بىرىكتىرۋگە مۇمكىندىك بەرەدى.
مينيستر, سونداي-اق, ورتالىق ازيانىڭ مادەني تۋرنە پلاتفورماسىن ىسكە قوسۋدى ۇسىندى. بۇل مەحانيزم وڭىرلىك گاسترولدىك باعدارلامالاردى, رەتروسپەكتيۆالىق كورمەلەردى جانە ارحيۆتىك فيلمدەردى مىندەتتى تۇردە تسيفرلاندىرۋدى كوزدەيتىن ايماقارالىق كينوكورسەتىلىمدەرىن جىل سايىن تۇراقتى تۇردە وتكىزۋگە مۇمكىندىك بەرەدى.
سونىمەن قاتار مينيستر عىلىمي جانە تاريحي ىنتىماقتاستىقتى دامىتۋ ماسەلەسىنە دە ەرەكشە توقتالدى.
«ورتالىق ازيا ەلدەرىنىڭ عىلىمي, دەرەكتى جانە ادەبي ارحيۆتىك ماتەريالدارىنىڭ كوشىرمەلەرىمەن الماسۋ بويىنشا اۋقىمدى ءارى ءوزارا ءتيىمدى ىنتىماقتاستىق ورناتۋ دا پايدالى بولار ەدى. ءوز تاراپىمىزدان بىزدە بار, سىزدەردىڭ ەلدەرىڭىزگە قاتىستى ماتەريالداردى بولىسۋگە دايىنبىز. مۇنداي الماسۋ ءوڭىردىڭ تاريحى مەن مادەنيەتىن زەرتتەۋدە كۇش بىرىكتىرۋگە, بار ولقىلىقتاردى تولتىرۋعا, جەكەلەگەن وقيعالاردىڭ جاڭا قىرلارىن اشۋعا, سونداي-اق كورنەكتى تۇلعالاردىڭ ەڭبەگىنە نەعۇرلىم تولىق ءارى وبەكتيۆتى باعا بەرۋگە مۇمكىندىك بەرەدى», دەپ اتاپ ءوتتى ايدا بالاەۆا.
ءسوز سوڭىندا مينيستر ورتالىق ازيانىڭ بىرىڭعاي تسيفرلىق پلاتفورماسىن قۇرۋ مۇمكىندىگىن قاراستىرۋدى ۇسىندى. بۇل زاماناۋي كرەاتيۆتى يندۋستريالار ماركەتپلەيسى قولونەرشىلەردى, ديزاينەرلەردى, زەرگەرلەردى جانە شىعارماشىلىق سالانىڭ باسقا دا وكىلدەرىن ناسيحاتتاۋعا ارنالعان ورتا بولماق.
كەزدەسۋ قورىتىندىسى بويىنشا تاراپتار ودان ارعى ىنتىماقتاستىقتىڭ نەگىزگى مىندەتتەرى مەن باعىتتارىن ايقىنداعان حاتتاماعا قول قويدى. قۇجات اياسىندا سونداي-اق «ورتالىق ازيانىڭ مادەني برەندى» تۇجىرىمداماسىن ازىرلەۋ بويىنشا جۇمىس توبىن قۇرۋ مۇمكىندىگىن قاراستىرۋعا كەلىستى.