استاناداعى پرەزيدەنتتىك ورتالىقتا بىرىككەن ۇلتتار ۇيىمىنىڭ 80 جىلدىعىنا ارنالعان «بۇۇ – 80: شىنايىلىق» اتتى فوتوكورمە اشىلدى. ءىس-شارانىڭ اشىلۋىنا مەملەكەتتىك ورگانداردىڭ, ديپلوماتيالىق كورپۋستىڭ, حالىقارالىق ۇيىمداردىڭ وكىلدەرى قاتىستى.
پرەزيدەنتتىك ورتالىقتىڭ ديرەكتورى باقىتجان تەمىربولات بۇگىنگى كورمە قوناقتارعا بۇۇ ىشكى جاعىنان كورۋگە مۇمكىندىك سىيلاعانىن ايتتى.
«مۇندا كۇندەلىكتى وتىرىستار مەن ميسسيالار ەرەكشە كورىنىستەر مەن ەموتسيالارعا تولى ادام تاعدىرلارىنىڭ تاريحىنا اينالادى. ەلىمىز تاۋەلسىزدىك العاننان كەيىن 1992 جىلعى 2 ناۋرىزدا بىرىككەن ۇلتتار ۇيىمىنىڭ مۇشەسى اتانىپ, كوپجاقتى ىنتىماقتاستىق, بەيبىتشىلىك پەن قاۋىپسىزدىكتى نىعايتۋ قاعيداتتارىن دايەكتى تۇردە ىسكە اسىرىپ كەلەدى», دەدى ول. ال قازاقستانداعى بۇۇ تۇراقتى ۇيلەستىرۋشىسى سارانگو رادناراگچا بۇل جاي عانا كورمە ەمەس, ۇيىمنىڭ شىنايى بولمىسىن كورۋگە شاقىرۋ ەكەنىن جەتكىزدى.
«بۇل سۋرەتتەر بىزگە بۇۇ – بۇل نيۋ-يورك پەن جەنەۆاداعى عيماراتتار عانا ەمەس, الەمنىڭ ءار تۇكپىرىندە بەيبىتشىلىك پەن ادامگەرشىلىككە قىزمەت ەتىپ جۇرگەن ادامدار قاۋىمداستىعى ەكەنىن ەسكە سالادى. فوتوگرافيا سەكىلدى ديپلوماتيا دا – نازار مەن سەزىمنىڭ ونەرى», دەدى س.رادناراگچا.