بۇرناعى كۇنى «قايرات» ەۋروپا ليگاسى ىرىكتەۋ ءتۋرنيرىنىڭ ءۇشىنشى راۋندى شەڭبەرىندە شوتلانديانىڭ «ابەردين» كومانداسىمەن قارىمتا كەزدەسۋ وتكىزدى. كەلتتەر ەلىندە بولعان ماتچ 1:1 ەسەبىمەن تەڭ اياقتالدى. اپتا بۇرىن قوس كوماندا الماتىدا كۇش سىناسىپ, الاڭ يەلەرى 2:1 ەسەبىمەن جەڭىسكە جەتكەن ەدى. وسى ەكى ويىننىڭ ناتيجەسى بويىنشا «قايرات» اتالعان ءتۋرنيردىڭ پلەي-وفف باسەكەسىنە جولداما الدى. ابەرديندەگى ايقاستىڭ ءبىرىنشى تايمىندا شوتلاندتار وتە شيراق قيمىلدادى. ال قايراتتىقتار نەگىزىنەن قارىمتا شابۋىلعا يەك ارتىپ, كوبىنە قورعانىسقا كوڭىل ءبولدى. ناتيجەسىندە قارسىلاستار ۇزىلىسكە دەيىن ەسەپ اشا المادى.
ماتچتىڭ ەكىنشى بولىگى دە الاڭ يەلەرىنىڭ باسىمدىعىمەن باستالدى. ولار بىرنەشە وتكىر شابۋىلدار ۇيىمداستىرىپ, ءبىزدىڭ قاقپانى نىساناعا العانىمەن, «قايراتتىڭ» قورعانىسى سىر بەرمەدى. ەسەسىنە, 59-مينۋتتا «ابەرديننىڭ» قورعاۋشىلارى قوناقتاردىڭ شابۋىلشىسى جەرار گوۋدان كوز جازىپ قالدى. وزىنە بەرىلگەن مۇمكىندىكتى ۇتىمدى پايدالانعان فورۆارد گول سوعىپ, ەسەپ اشتى. تابلوداعى ناتيجە تەك 84-مينۋتتا وزگەردى. كەزەكتى شابۋىلدارىنىڭ بىرىندە ابەرديندىكتەر تارازى باسىن تەڭەستىرىپ كەتتى. دوپتى قاقپاعا ەنگىزگەن – كەنني ماكلين. بۇل ناتيجە ويىن سوڭىنا دەيىن ساقتالدى. وسىلايشا, ەكى كەزدەسۋ قورىتىندىسى بويىنشا «قايرات» كەلەسى اينالىمعا شىقتى. الماتىلىقتار مۇنداي ناتيجەگە كلۋب تاريحىندا تۇڭعىش رەت قول جەتكىزىپ وتىر. بۇعان دەيىن ەۋروپا ليگاسى ىرىكتەۋ ءتۋرنيرىنىڭ پلەي-وفف باسەكەسىندە وتاندىق كوماندالاردان «اقتوبە» مەن «استانا» ويناپ كوردى. وكىنىشكە قاراي, ەكى جاساق تا ودان ءارى اسا المادى. ال 2013 جىلى قاراعاندىنىڭ «شاحتەرى» ءتۋرنيردىڭ توپتىق سايىسىندا ويناعان بولاتىن. «كەنشىلەر» بۇل مۇمكىندىككە چەمپيوندار ليگاسى ىرىكتەۋ ءتۋرنيرىنىڭ پلەي-وفف سىنىنا شىعۋ ارقىلى قول جەتكىزدى. ايتا كەتەيىك, كەشە شۆەيتساريانىڭ نون قالاسىندا چەمپيوندار ليگاسى مەن ەۋروپا ليگاسى ىرىكتەۋ تۋرنيرلەرىنىڭ پلەي-وفف سىنى ءۇشىن جەرەبە تارتۋ ءراسىمى ءوتتى. سونىڭ قورىتىندىسىنا سايكەس, «قايرات» توپتىق كەزەڭنىڭ جولداماسىن فرانتسيانىڭ «بوردو» كومانداسىمەن ساراپقا سالادى. العاشقى ويىن 20 تامىزدا وينالسا, قارىمتا كەزدەسۋ ءبىر اپتادان كەيىن وتەدى. ءبىرىنشى ماتچ فرانتسيادا بولاتىنىن ايتا كەتەيىك. ال چەمپيوندار ليگاسىندا ەل نامىسىن قورعاپ جۇرگەن «استانا» بۇل اينالىمدا كيپردىڭ اپوەل-ىمەن كۇش سىناسادى. قوس كوماندا الدىمەن استانادا, كەيىن كيپردىڭ نيكوسيا قالاسىندا شەبەرلىك بايقاسادى. اتالعان ويىندار 18-19 جانە 25-26 تامىزدا وينالادى دەپ كۇتىلۋدە.
ەلامان قوڭىر, «ەگەمەن قازاقستان».