قىزىلوردا وبلىستىق تاريحي-ولكەتانۋ مۋزەيىندە ورتا عاسىر وركەنيەتىنىڭ قازىعى سانالاتىن وتىراردان تابىلعان تاريحي مۇرالار كورمەسى اشىلدى. « ۇلى جىبەك جولى بويىنداعى وتىرار: عىلىم مەن وركەنيەتتىڭ ساباقتاستىعى» اتتى بۇل شارانىڭ ەرەكشەلىگى – وتىرار مەملەكەتتىك ارحەولوگيالىق مۋزەي-قورىعىندا جيناقتالعان جادىگەرلەر جۇرتشىلىققا ۇسىنىلدى.
اشىلۋ سالتاناتىندا قىزىلوردا وبلىستىق تاريحي-ولكەتانۋ مۋزەيىنىڭ ديرەكتورى ساپار كوزەيباەۆ وتىرارلىق ارىپتەستەرىنە العىس ايتىپ, كورمە جۇمىسىنا ساتتىلىك تىلەدى. وتىرار مەملەكەتتىك ارحەولوگيالىق مۋزەي-قورىعىنىڭ باس قور ساقتاۋشىسى نۇرسۇلتان بەكەشەۆ مۇنداعى جادىگەرلەر كونە قالانىڭ دۇنيەجۇزىلىك وركەنيەتكە قوسقان ۇلەسىنىڭ دالەلى ەكەنىن اتاپ ءوتتى.
كورمە بارىسىندا وتىرار وركەنيەتى, قالانىڭ وركەندەۋىنە ۇلى جىبەك جولى مەن يسلام ءدىنىنىڭ اسەرى تۋرالى ايتىلدى. ءار ءداۋىر جىلناماشىلارى گۇلدەنگەن شاھار دەپ باعا بەرگەن بايىرعى قونىستاعى قالالىق مادەنيەت, ەگىنشىلىك, ساۋدا, وندىرىسكە قاتىستى زاتتار قويىلعان كورمەدە سوناۋ XIII عاسىردان قالعان ماقتا, بيداي قالدىقتارى, XIV عاسىر مۇراسى سانالاتىن تەمىر كەتپەن ەل نازارىن ەرەكشە اۋدارادى.
وتىراردىڭ عىلىم مەن مادەنيەت, ءوندىرىس پەن ساۋدانى قاتار دامىتقان ۇلكەن ورتالىق بولعانىن ايعاقتاي تۇسەتىن سىرلى, ورنەكتى قاپتامالار, شىڭىلتىرلى ىدىستار, كەراميكالىق جانە شىنى بۇيىمدار, اشەكەيلەر, مىس تەڭگەلەر تاريحي تانىمدى كەڭەيتەتىن قۇندى جادىگەر بولىپ وتىر.
قىزىلوردا