الماتى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا بالقاش اۋدانىنىڭ ءۇش تۇرعىنى قازاقستان رەسپۋبليكاسىنىڭ قىزىل كىتابىنا ەنگەن قاراقۇيرىقتى زاڭسىز اۋلاعانى جانە اتقانى ءۇشىن كىنالى دەپ تانىلدى, دەپ حابارلايدى Egemen.kz.
سوت ۇكىمى بويىنشا سوتتالۋشىلاردىڭ ارقايسىسىنا 3 جىلعا باس بوستاندىعىن شەكتەۋ جازاسى تاعايىندالدى, سونداي-اق, مەملەكەت پايداسىنا 7 ميلليون تەڭگە ءوندىرىلدى.
اعىمداعى جىلدىڭ باسىنان بەرى الماتى وبلىسىنىڭ سوتتارى زاڭسىز اڭشىلىق فاكتىلەرى بويىنشا 5 قىلمىستىق ءىستى قارادى, 10 ادام ءارتۇرلى جازا تۇرلەرىنە تارتىلدى, ولاردىڭ زاڭسىز ارەكەتتەرىنەن كەلتىرىلگەن جالپى شىعىن 36 ملن تەڭگەنى قۇراپ, مەملەكەت پايداسىنا تولىق كولەمدە ءوندىرىلدى.
الماتى وبلىسىنىڭ پروكۋراتۋراسى زاڭسىز اڭشىلىق ءۇشىن 7 جىلعا دەيىن باس بوستاندىعىنان ايىرۋ جازاسى قاراستىرىلعانىن ەسكەرتەدى (قر قىلمىستىق كودەكسىنىڭ 337-بابى).