قىتايدىڭ گونكونگ قالاسىندا حالىقارالىق ات سپورتى فەدەراتسياسىنىڭ (FEI) باس اسسامبلەياسى ءوتتى. بۇل – الەمدىك ات سپورتىنىڭ دامۋ باعىتىن ايقىندايتىن جىل سايىنعى ماڭىزدى جيىن. بيىلعى جيىنعا ۇيىمعا مۇشە 132 ەلدىڭ ىشىندە 87 ۇلتتىق فەدەراتسيانىڭ دەلەگاتسياسى قاتىستى. قازاقستان 1993 جىلدان بەرى FEI قۇرامىنا كىرىپ, جىل سايىن اسسامبلەيا جۇمىسىنا قاتىسىپ كەلەدى, دەپ جازادى Egemen.kz.
1921 جىلى قۇرىلعان حالىقارالىق ات سپورتى فەدەراتسياسى عاسىردان استام ۋاقىت بويى الەمدىك جارىستاردىڭ ەرەجەسى مەن جۇيەسىن قالىپتاستىرىپ كەلەدى. بيىلعى تالقىلاۋلاردا قازاقستاندىق دەلەگاتسيا كونكۋر مەن ۆيەزدكا سالالارىنداعى ەرەجەلەردى جەتىلدىرۋ, وليمپيادا ويىندارى مەن 2026 جىلى ااحەندە وتەتىن الەم چەمپيوناتىنا ىرىكتەۋ فورماتىن وزگەرتۋ ماسەلەلەرىن كوتەردى. سونداي-اق سپورتشىلاردىڭ قاۋىپسىزدىگى مەن جىلقىلاردىڭ ءال-اۋقاتى, تسيفرلىق ۆەتەرينارلىق پاسپورت جۇيەسىن ەنگىزۋ جانە اشىق ءارى كاسىبي باسقارۋ ۇلگىسىن دامىتۋ تاقىرىپتارى قارالدى.
6–7 قاراشا كۇندەرى وتكەن پلەنارلىق وتىرىستار مەن داۋىس بەرۋ قورىتىندىسى بويىنشا قازاقستانعا 2026 جىلى FEI اياسىنداعى ءۇش حالىقارالىق جارىستى وتكىزۋ قۇقىعى بەرىلدى. ولاردىڭ قاتارىندا الەم كۋبوگىنىڭ كەزەڭى, FEI World Cup Challenge فينالى جانە ەۋرازيالىق ليگا فينالى بار. بۇل شەشىم ەلىمىزدەگى ات سپورتىن جاڭا دەڭگەيگە شىعارىپ, قازاقستاندىق سپورتشىلارعا حالىقارالىق رەيتينگتىك ۇپايلاردى ءوز ەلىندە جيناۋعا مۇمكىندىك بەرەدى. سونىمەن قاتار شەتەلدىك جارىستارعا قاتىسۋ شىعىنىن ازايتىپ, جۇيەلى دايىندىققا جول اشادى.
قازاقستان ات سپورتى فەدەراتسياسى پرەزيدەنتىنىڭ كەڭەسشىسى سەرگەي بۋيكەۆيچ بۇل شەشىمنىڭ ماڭىزىن اتاپ ءوتتى:
«كۋبوك كەزەڭى مەن FEI World Cup Challenge فينالىن وتكىزۋ قۇقىعىن الۋ – ەلىمىزدەگى ات سپورتىنىڭ جۇيەلى دامۋى ءۇشىن ماڭىزدى قادام. قازاقستاندىق سپورتشىلار العاش رەت حالىقارالىق ۇپايدى ءوز جەرىندە جيناي الادى. جاس شاباندوزدار ءۇشىن دە بۇل – الەمدىك فينالدارعا قاتىسۋدىڭ بىرەگەي مۇمكىندىگى. ەندى ءبىزدىڭ مىندەتىمىز – ۇيىمداستىرۋ دەڭگەيىن جوعارى ۇستاپ, وسى مۇمكىندىكتى سپورتشىلاردى دايىنداۋ جولىندا ءتيىمدى پايدالانۋ», دەدى ول.
FEI پرەزيدەنتى ينگمار دە ۆوس, ۇيىمدى 12 جىل باسقارعاننان كەيىن حالىقارالىق وليمپيادا كوميتەتىنە اۋىساتىنىن مالىمدەپ, قازاقستاننىڭ باستاماسىن جوعارى باعالادى. ول ءبىزدىڭ ەلدە تۋرنيرلەر وتكىزۋ فەدەراتسيانىڭ گەوگرافياسىن كەڭەيتۋ جانە جاڭا ەلدەردى جاھاندىق سپورت كۇنتىزبەسىنە قوسۋ ساياساتىنا ساي كەلەتىنىن ايتتى.
قازاقستان دەلەگاتسياسى سونىمەن قاتار جاتتىقتىرۋشىلاردى دايارلاۋ جۇيەسىن جەتىلدىرۋ جانە سپورتشىلاردى حالىقارالىق سەرتيفيكاتتاۋ جوبالارىن ۇسىندى. بۇل باستامالار FEI جانە Olympic Solidarity تاراپىنان قولداۋ تاۋىپ, Coaching System باعدارلاماسىن ەنگىزۋ جونىندە كەلىسىم جاسالدى.
اسسامبلەيانىڭ قورىتىندى ساتىندە Longines FEI Awards ماراپاتتاۋ ءراسىمى ءوتتى. وندا جىل ۇزدىكتەرى اتانعان سپورتشىلار, جاتتىقتىرۋشىلار جانە جارىس ۇيىمداستىرۋشىلارى ماراپاتتالدى.