مەملەكەتتىك شەكارادان وتكەن ساتتەن ماسكەۋ اۋەجايىنا قونعانعا دەيىن رەسەيدىڭ اۋە كەڭىستىگىندە قازاقستان پرەزيدەنتىنىڭ بورتىمەن بىرگە رف قورعانىس مينيسترلىگىنىڭ سۋ-35 ۇشاقتارى قاتارلاسىپ ۇشقان, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
ايتا كەتەيىك, بۇگىن قاسىم-جومارت توقاەۆ رەسەي فەدەراتسياسىنا مەملەكەتتىك ساپارمەن باردى. ساپار 11 قاراشادان 12 قاراشاعا دەيىن سوزىلادى.
مەملەكەت باسشىسى ۆلاديمير پۋتينمەن كەلىسسوزدەرگە قاتىسىپ, سونداي-اق ونلاين فورماتتا ورالدا ءوتىپ جاتقان قازاقستان مەن رەسەيدىڭ XXI ايماقارالىق ىنتىماقتاستىق فورۋمىنىڭ پلەنارلىق سەسسياسىنا قاتىسادى دەپ جوسپارلانىپ وتىر.
بۇعان دەيىن پرەزيدەنت توقاەۆ «روسسيسكايا گازەتا» بەتىندە جاريالانعان «ماڭگىلىك دوستىق – حالىقتارىمىز ءۇشىن جارقىن جول» اتتى ماقالاسىندا ساپارىنىڭ نەگىزگى ماقساتى رەتىندە قازاقستان مەن رەسەي اراسىنداعى قاتىناستاردى جان-جاقتى ستراتەگيالىق ارىپتەستىك پەن وداقتاستىق دەڭگەيىنە كوتەرۋ تۋرالى دەكلاراتسياعا قول قويۋدى اتاعان ەدى.