اۋىلدىق وڭىرلەردە جۇمىس ىستەگىسى كەلەتىن جاستار ءۇشىن جاڭا مۇمكىندىك پايدا بولدى. «وتباسى بانك» «ديپلوممەن – اۋىلعا» اتتى جاڭا باعدارلامانى ىسكە قوسقان. بۇل باستاما اۋىلدا ەڭبەك ەتىپ, سوندا تۇراقتى ءومىر سۇرۋگە نيەتتى جاس ماماندارعا ناقتى قولداۋ كورسەتۋدى كوزدەيدى, دەپ جازادى Egemen.kz.
باعدارلاما اياسىندا قاتىسۋشىلارعا ەكى نەگىزگى مۇمكىندىك قاراستىرىلعان. ءبىرىنشىسى – 100 ايلىق ەسەپتىك كورسەتكىش (اەك) كولەمىندە ءبىر رەتتىك كوتەرمە جاردەماقى. بۇل اۋىلعا بارىپ, جاڭا ورتاعا بەيىمدەلىپ جاتقان جاس ماماندار ءۇشىن ەلەۋلى كومەك بولماق.
ەكىنشى جانە ەڭ ماڭىزدىسى – تۇرعىن ۇيگە 1 پايىزدىق جەڭىلدەتىلگەن نەسيە. بۇرىن مۇنداي شارت قاراستىرىلماعان ەدى. ەندى اۋىلدىق جەردە ءۇي سالۋ نەمەسە ساتىپ الۋ الدەقايدا قولجەتىمدى بولماق. نەسيە سوماسى ەلدى مەكەنگە بايلانىستى 2 500 اەك-كە دەيىن, ال قايتارۋ مەرزىمى 15 جىلعا دەيىن بەلگىلەنەدى. بۇل ۋاقىت ارالىعىندا مامان تۇراقتى جۇمىس ىستەپ, ءوز ءومىرىن قالىپتاستىرا الادى.
باعدارلاماعا ءبىلىم بەرۋ, دەنساۋلىق ساقتاۋ, الەۋمەتتىك قورعاۋ, مادەنيەت, سپورت, اگروونەركاسىپ سالالارىندا جۇمىس ىستەيتىن ماماندار قاتىسا الادى. سونداي-اق اۋىلدىق وكرۋگ اكىمدىكتەرىنىڭ اپپارات قىزمەتكەرلەرى دە ءوتىنىم بەرە الادى, بىراق اكىمدەر مەن ولاردىڭ ورىنباسارلارى بۇل تىزىمگە ەنبەيدى.
قاتىسۋشىلارعا قويىلاتىن تالاپتار دا ناقتى كورسەتىلگەن: ۇمىتكەردىڭ تەحنيكالىق, كاسىپتىك نەمەسە جوعارى ءبىلىمى بولۋى شارت جانە ول العان ماماندىعى بويىنشا كەمىندە ءۇش جىل اۋىلدا جۇمىس ىستەۋگە مىندەتتى. بۇعان قوسا, بۇرىنعى نەسيەلەرى بويىنشا مەرزىمى وتكەن قارىز بولماۋى كەرەك.
ءوتىنىم بەرۋ پروتسەسى بارىنشا جەڭىلدەتىلگەن. الدىمەن جاس مامان اۋىلداعى بوس جۇمىس ورنىن تابۋى نەمەسە جەرگىلىكتى اكىمدىككە جۇگىنۋى قاجەت. كەيىن Baspana Market ونلاين پلاتفورماسىندا تىركەلىپ, ەلەكتروندى ءوتىنىم تاپسىرادى. بارلىق قۇجاتتارعا ەتسق ارقىلى قول قويۋعا مۇمكىندىك بار.
جوبا قوعامدا وڭ پىكىر تۋدىردى. كوپشىلىك «جاس ماماندارعا وسىنداي مۇمكىندىك بەرىلۋى – مەملەكەت تاراپىنان ناقتى قامقورلىقتىڭ بەلگىسى» دەپ باعالاپ وتىر. ال اۋىل تۇرعىندارى جاستاردىڭ كەلۋى اۋىل ومىرىنە جاڭا سەرپىن بەرەتىنىن ايتادى. ءوز كەزەگىندە جاس ماماندار «1 پايىزدىق نەسيە – بۇرىن بولماعان ەرەكشە مۇمكىندىك» دەپ قۋانىشتارىن جاسىرماي وتىر.