قازاقستان پرەزيدەنتى قاسىم-جومارت توقاەۆ ماسكەۋگە جاسالاتىن مەملەكەتتىك ساپارى قارساڭىندا ەكى ەل اراسىنداعى قاتىناستاردىڭ جاڭا بەلەسىنە جول اشاتىن ماڭىزدى قۇجاتقا قول قويىلاتىنىن مالىمدەدى, دەپ جازادى Egemen.kz.
«ماسكەۋگە جاسالاتىن ساپارىمنىڭ بارىسىندا كۇن تارتىبىندە تۇرعان باستى تارماقتاردىڭ ءبىرى – قازاقستان مەن رەسەي اراسىنداعى قاتىناستاردى جان-جاقتى ستراتەگيالىق ارىپتەستىك پەن وداقتاستىق دەڭگەيىنە كوتەرۋ تۋرالى دەكلاراتسياعا قول قويۋ بولماق. بۇل قۇجات, ءسوزسىز, ەكىجاقتى بايلانىستاردىڭ جاڭا ءداۋىرىن اشىپ, ءوزارا سەنىمنىڭ بۇرىن-سوڭدى بولماعان دەڭگەيىن جانە بارلىق باعىت بويىنشا تىعىز ىنتىماقتاستىققا ازىرلىگىمىزدى ايعاقتايدى», دەيدى پرەزيدەنت.
رەسەي فەدەراتسياسى – ەلىمىزدىڭ ەڭ ءىرى سىرتقى ساۋدا سەرىكتەستەرىنىڭ ۇشتىگىنە كىرەدى. ءوز كەزەگىندە, قازاقستان دا رەسەيدىڭ نەگىزگى بەس ساۋدا سەرىكتەسىنىڭ قاتارىندا. ەكى ەل اراسىنداعى تاۋار اينالىمى تۇراقتى تۇردە ءوسىپ, 30 ميلليارد دوللارعا جۋىقتاپ كەلەدى.
مەملەكەت باسشىسىنىڭ ايتۋىنشا, ينۆەستيتسيالىق ىنتىماقتاستىق تا قارقىندى دامىپ جاتىر. رەسەيلىك ينۆەستورلار قازاقستان ەكونوميكاسىنا قارجى قۇيۋ كولەمى بويىنشا كوشباسشىلاردىڭ ءبىرى بولىپ سانالادى. بۇل ەلىمىزدىڭ جوعارى ينۆەستيتسيالىق تارتىمدىلىعىن, بەرىك ىسكەرلىك بايلانىستار مەن مەملەكەتتەر اراسىنداعى ءوزارا سەنىمدى كورسەتەدى.
«قازاقستان مەن رەسەيدىڭ ونەركاسىپتىك كووپەراتسياسىنىڭ نەگىزىن جالپى ينۆەستيتسيا كولەمى 50 ميلليارد اقش دوللارىنان اساتىن 170-تەن استام بىرلەسكەن جوبا قۇرايدى. «سيبۋر», «گازپروم», «لۋكويل», «ەۆروحيم» سياقتى ءىرى رەسەيلىك كومپانيالاردىڭ قاتىسۋىمەن ەلىمىزدە پوليەتيلەن, بۋتاديەن, مينەرالدىق تىڭايتقىشتار جانە باسقا دا جوعارى تەحنولوگيالىق ءونىم وندىرەتىن زاۋىتتار سالىنىپ جاتىر. «تاتنەفت» كومپانياسىمەن بىرلەسىپ اۆتوكولىك شينالارىنىڭ ءوندىرىسى جولعا قويىلعان, ال «كاماز»-بەن جۇك كولىكتەرىنە ارنالعان بولشەكتەر شىعارىلادى.
جالپى العاندا, قازاقستاندا رەسەيلىك كاپيتالدىڭ قاتىسۋىمەن 20 مىڭنان استام كومپانيا تابىستى جۇمىس ىستەپ كەلەدى. بۇل جاي عانا سان ەمەس – بۇل ءوزارا ءتيىمدى سەرىكتەستىكتىڭ ناقتى ناتيجەسى. سونىڭ ارقاسىندا جاڭا وندىرىستەر اشىلىپ, ونداعان مىڭ جۇمىس ورنى قۇرىلىپ, وزىق تەحنولوگيالار ترانسفەرى جۇزەگە اسىپ, وڭىرلەر مەن حالىقتار اراسىنداعى بايلانىستار نىعايىپ كەلەدى», دەيدى ق.توقاەۆ.
سونىمەن قاتار پرەزيدەنت ەكى ەل ىنتىماقتاستىعىندا ەنەرگەتيكا سالاسى ەرەكشە ورىن الاتىنىن اتاپ ءوتتى.
«بىرلەسكەن كۇش-جىگەر ارقىلى ءبىز رەسەيلىك ەنەرگيا رەسۋرستارىن قىتاي مەن ورتالىق ازيا ەلدەرىنە ۇزدىكسىز ترانزيتتەۋدى قامتاماسىز ەتىپ وتىرمىز. سونداي-اق ءىرى ەنەرگەتيكالىق نىسانداردى سالۋ جانە جاڭعىرتۋ جۇمىستارى جۇرگىزىلىپ جاتىر. بۇل باعىتتاعى نەگىزگى جوبالاردىڭ ءبىرى – «روساتوم» جەتەكشىلىك ەتەتىن حالىقارالىق كونسورتسيۋمنىڭ قاتىسۋىمەن قازاقستاندا العاشقى اتوم ەلەكتر ستانتسياسىن سالۋ بولماق», دەيدى ەل پرەزيدەنتى.