بۇگىن ساۋد ارابياسىنىڭ استاناسى ەر-ريادتا يسلام ىنتىماقتاستىعى ويىندارىنىڭ الاۋى تۇتانادى. ءۇش اپتاعا سوزىلاتىن باسەكەلەر بارىسىندا 57 مەملەكەتتەن كەلگەن 3 مىڭنان اسا سپورتشى ونەر كورسەتەدى. ولار سپورتتىڭ 19 تۇرىنەن سايىسقا تۇسەدى.
پارسى شىعاناعىندا ەلىمىزدىڭ سپورتشىلارى كۇرەس, كاراتە, مۋاي-تاي, تاەكۆوندو, اۋىر اتلەتيكا, دجيۋ-دجيتسۋ, كيبەرسپورت, سەمسەرلەسۋ, ۇستەل تەننيسى, گاندبول, جەڭىل اتلەتيكا, ءجۇزۋ, پەنچاك سيلات سىندى سپورت تۇرلەرىندە باق سىنايدى. ولاردىڭ قاتارىندا ريزابەك ايتمۇحان, نۇرقوجا قايپانوۆ, ەلميرا سىزدىقوۆا, الان قۇرمانعاليەۆ, كيريلل گەراسيمەنكو سياقتى تالاي ءدۇبىرلى دودالاردا توپ جارعان ساڭلاقتار بار.
ەستەرىڭىزگە سالا كەتەيىك, جازعى يسلام ىنتىماقتاستىعى ويىندارى وسىعان دەيىن 2005 جىلى مەككەدە (ساۋد ارابياسى), 2013 جىلى پالەمبانگتە (يندونەزيا), 2017 جىلى باكۋدە (ازەربايجان), 2021 جىلى كونيادا (تۇركيا) ۇيىمداستىرىلدى. سول جارىستاردىڭ بارلىعىنا دا ەلىمىزدىڭ ورەندەرى قاتىسىپ, جالپى العاندا 134 (42 التىن+36 كۇمىس+56 قولا) جۇلدە جەڭىپ الدى.