ەلدەگى ەڭ باي ادامدار قايىرىمدىلىققا قانشا اقشا جۇمسايدى؟

Ranking.kz پورتالىنىڭ جازۋىنشا, كوشتى باستاپ تۇرعان ميللياردەر بولات وتەمۇراتوۆ ون جىلدان استام ۋاقىت بويى قايىرىمدىلىقپەن اينالىسىپ كەلەدى. ونىڭ اتىنداعى بولات وتەمۇراتوۆ قورى تۇراقتى تۇردە ءوز قىزمەتىنىڭ قارجىلىق ەسەبىن جاريالاپ وتىرادى. 2024 جىلعى دەرەكتەرگە سايكەس, قور وتكەن جىلى 51,9 ميلليارد تەڭگەنى الەۋمەتتىك جانە قايىرىمدىلىق جوبالارىنا جۇمساعان. بۇل كورسەتكىش 2023 جىلمەن سالىستىرعاندا 2,8 ەسە كوپ. 

قوردىڭ ەڭ تانىمال جوبالارىنىڭ ءبىرى – «اۋتيزم. بارشامىز ءۇشىن الەم» اتتى ۇزاق مەرزىمدى الەۋمەتتىك باعدارلاما. بۇل باعدارلاما ەلىمىزدىڭ ءتۇرلى وڭىرلەرىندە ورنالاسقان 13 ورتالىقتىڭ قىزمەتىن قارجىلاندىرىپ, اۋتيزم دياگنوزى بار بالالارعا كومەك كورسەتەدى. سونىمەن قاتار, قور 2024 جىلى قىزىلوردا قالاسىنداعى جولاۋشىلار تەرمينالى مەن ەسىكتەگى مەكتەپتىڭ قۇرىلىسىنا, سۋ تاسقىنىنان زارداپ شەككەندەرگە كومەك كورسەتۋگە جانە از قامتىلعان ازاماتتارعا پاتەر ساتىپ الۋعا قارجى بولگەن.

ەكىنشى ورىندا – كاسىپكەر ۆياچەسلاۆ كيم. ول بىرنەشە جىلدان بەرى ANSA قايىرىمدىلىق قورى ارقىلى الەۋمەتتىك جوبالاردى جۇزەگە اسىرىپ كەلەدى. وتكەن جىلى قوردىڭ كومەگىمەن 2 مىڭنان استام قازاقستاندىققا قولداۋ كورسەتىلىپ, جالپى سوماسى 20 ميلليارد تەڭگەدەن اسقان كومەك بەرىلدى.

بۇل قاراجاتقا سولتۇستىك قازاقستان جانە اقمولا وبلىستارىندا سۋ تاسقىنىنان زارداپ شەككەندەرگە ارنالعان ەكى كوپقاباتتى جانە 300 جەكە ءۇي, سونداي-اق ءبىر بالاباقشا سالىندى. سونداي-اق Esen Foundation قورىمەن بىرلەسە وتىرىپ, «باقىتتى اۋدان» (Baqatty Audan) جوباسى ىسكە قوسىلدى. باعدارلاما تسەلينوگراد اۋدانىندا اۋىل تۇرعىندارىنىڭ ساپالى مەديتسينا مەن بىلىمگە قول جەتكىزۋىن ارتتىرۋدى ماقسات ەتەدى. وعان 298 ميلليون تەڭگە بولىنگەن.

ANSA قورىنىڭ باستاماسىمەن 5 Sandyq اۋىلىندا اۋىلدىق پەداگوگيكالىق اكادەميا جانە بىلىكتىلىكتى ارتتىرۋ ورتالىعى قۇرىلدى. سونىمەن قاتار «استانا» مەديتسينا ۋنيۆەرسيتەتى مەن ۇلتتىق عىلىمي كارديوحيرۋرگيا ورتالىعى بازاسىندا 450-دەن استام مامان بىلىكتىلىگىن ارتتىردى. ينكليۋزيا باعىتى بويىنشا ەرەكشە ءبىلىم بەرۋ قاجەتتىلىگى بار بالالارعا ارنالعان ارنايى كابينەتتەر اشىلىپ, بىرنەشە مەكتەپ ينتەراكتيۆتى پانەلدەرمەن, ISKU جيھازىمەن, كومپيۋتەرلەرمەن جانە ديداكتيكالىق ماتەريالدارمەن جابدىقتالدى.

قوردىڭ سپورتتى قولداۋداعى ەڭبەگى دە ەرەكشە. 2025 جىلى ANSA قورى «بارىست» حوككەي كلۋبىنىڭ يمپاكت-پارتنەرى اتانىپ, بالالار مەن جاسوسپىرىمدەر حوككەيىن دامىتۋعا جانە دارىندى سپورتشىلاردى قولداۋعا كىرىستى. سونىمەن قاتار, پاراوليمپيادالىق بوچچا سپورتىنىڭ رەسمي سەرىكتەسىنە اينالدى. قور حالىقارالىق جارىستاردى وتكىزۋگە جانە ۇلتتىق قۇرامانىڭ دايىندىقتارىنا قولداۋ كورسەتىپ كەلەدى.

ەلدىڭ ەڭ باي بەس مەتسەناتىنىڭ بارلىعىنىڭ دەرلىك ءوز جەكە قايىرىمدىلىق قورى بار. ولار اشىق ءارى ايقىن جۇمىس ىستەۋگە تىرىسادى, جىل سايىن ەسەپ جاريالاپ, قاراجاتتىڭ قايدا جۇمسالعانىن كورسەتەدى. بۇل ەل پرەزيدەنتى قاسىم-جومارت توقاەۆ ۇسىنعان قايىرىمدىلىقتاعى اشىقتىق قاعيداسىنىڭ ناقتى كورىنىسى. پرەزيدەنتتىڭ باستاماسىمەن قابىلدانعان «قايىرىمدىلىق تۋرالى» زاڭعا ەنگىزىلگەن تۇزەتۋلەر دە وسى باعىتتاعى جۇمىستى جۇيەلەۋگە باعىتتالعان.

بەس مەتسەناتتىڭ قاتارىنا Astana Group حولدينگىنىڭ نەگىزىن قالاۋشى نۇرلان سماعۇلوۆ, قارجىگەر تيمۋر تۋرلوۆ, بانكير تيمۋر ق ۇلىباەۆ كىرەدى. ارقايسىسىنىڭ ءوز باعىتى بار:

ق ۇلىباەۆتار اۋلەتىنىڭ Halyk قورى از قامتىلعان وتباسىلارعا كومەك كورسەتىپ, مەكتەپتەر مەن بالاباقشالار سالىپ جانە جاس تالانتتارعا گرانتتار بولەدى. تيمۋر تۋرلوۆ شاحمات پەن بالالار فۋتبولىن, ەكولوگيالىق جوبالاردى قولداپ دارىندى جاستارعا گرانتتار بولەدى.  نۇرلان سماعۇلوۆ ءبىلىم بەرۋ مەن مادەنيەت سالاسىندا الەۋمەتتىك جوبالاردى تۇراقتى تۇردە قارجىلاندىرىپ كەلەدى.

ال ءتىزىمنىڭ كەلەسى بولىگىنە ەنگەن كاسىپكەرلەر – ۆلاديمير كيم, ايدىن راحىمباەۆ, شۋحرات يبراگيموۆ, اندرەي لاۆرەنتەۆ جانە كەنەس راكيشەۆ تە قايىرىمدىلىق باعىتىندا بەلسەندى. الايدا ولاردىڭ جۇمساعان ناقتى قارجىسى تۋرالى اشىق دەرەكتەر از. كوبىنە بۇل اقپاراتتار جەكە جوبالار تۋرالى جاڭالىقتاردان بەلگىلى بولادى, بىراق تولىق كولەمدە ەسەپ بەرۋ تاجىريبەسى سيرەك كەزدەسەدى.

كەيبىر كاسىپكەرلەر ءوز قورلارىنان بولەك, ءىرى قوعامدىق قورلارعا دا تۇراقتى تۇردە قاراجات اۋدارادى. مىسالى, «انا ءۇيى» قورىنىڭ جۇمىسىنا شۋحرات يبراگيموۆ پەن اندرەي لاۆرەنتەۆ بەلسەندى قاتىسادى. ارقايسىسى قازاقستاننىڭ بەلگىلى ءبىر قالاسىنداعى «انا ءۇيىن» قارجىلاندىرادى. بۇل قور الەۋمەتتىك جەتىمدىلىكتى ازايتۋعا باعىتتالعان جانە قيىن جاعدايدا قالعان انالارعا بالالارىنان باس تارتپاۋعا مۇمكىندىك بەرەدى.

سوڭعى جىلدارى مەملەكەت قايىرىمدىلىق باستامالارىن قولداۋعا ايرىقشا كوڭىل ءبولىپ وتىر. 2023 جىلدان باستاپ ەلدە مەتسەناتتار مەن دەمەۋشىلەرگە ارنالعان ۇلتتىق كونكۋرس وتكىزىلىپ كەلەدى. 2025 جىلى 33 قازاقستاندىققا «قۇرمەتتى قايىرىمدى جان» اتاعى بەرىلدى. قازىرگى تاڭدا ەلىمىزدە وسىنداي مارتەبەگە يە 164 ازامات بار.

مادەنيەت جانە اقپارات مينيسترلىگىنىڭ دەرەگىنشە, ەلىمىزدە 1,3 مىڭنان استام قايىرىمدىلىق ۇيىمى جۇمىس ىستەيدى. تەك بيىلدىڭ وزىندە «ىزگى ىستەر مارافونى» اياسىندا قازاقستاندىقتار 2,5 مىڭنان استام قايىرىمدىلىق باستاماسىنا قاتىستى. ەلدە بۇگىندە 275 مىڭنان استام ۆولونتەر بار, ولاردىڭ ىشىندە 55 جاستان اسقان 3,5 مىڭ ادام بەلسەندى تۇردە ىزگى ىستەرمەن اينالىسىپ ءجۇر.وسىلايشا, قازاقستاننىڭ ەڭ داۋلەتتى ازاماتتارى قايىرىمدىلىقتى قوعام الدىنداعى ءوز جاۋاپكەرشىلىگىنىڭ ءبىر بولىگى رەتىندە قابىلداپ, الەۋمەتتىك جوبالارعا ميللياردتاعان تەڭگە جۇمسايدى. بۇل ءۇردىس ەلدە قايىرىمدىلىق مادەنيەتىنىڭ جاڭا دەڭگەيگە كوتەرىلگەنىن جانە مەتسەناتتىقتىڭ تەك داۋلەتتىلەردىڭ ەمەس, بۇكىل قوعامنىڭ يگىلىگىنە اينالىپ كەلە جاتقانىن دالەلدەيدى.