بىشكەك قالاسىندا ورتالىق ازيا ەلدەرىنىڭ ايەل-كوشباسشىلارى, ساراپشىلارى جانە مەملەكەتتىك ورگاندارىنىڭ وكىلدەرىن بىرىكتىرگەن «سۋ رەسۋرستارى مەن ەنەرگەتيكا سالاسىنداعى ايەلدەر» اتتى وڭىرلىك ديالوگ ءوتتى, دەپ حابارلايدى Egemen.kz.
كەزدەسۋدىڭ باستى تاقىرىبى – وڭىردە كليماتتىق تۇراقتىلىقتى قامتاماسىز ەتۋدەگى, سۋ قاۋىپسىزدىگى مەن ەنەرگەتيكالىق كوشۋدى ىلگەرىلەتۋدەگى ايەلدەردىڭ ءرولى بولدى.
قازاقستان اتىنان فورۋمعا قر ەنەرگەتيكا مينيسترلىگى جاڭارتىلاتىن ەنەرگيا كوزدەرى دەپارتامەنتىنىڭ باس ساراپشىسى اينارا ايدىنقىزى قاتىستى. ءوز سوزىندە ول ەنەرگەتيكا سالاسىنداعى ايەلدەردىڭ كاسىبي قاۋىمداستىعىن نىعايتۋعا باعىتتالعان جۇمىستاردى اتاپ ءوتتى.
اتاپ ايتقاندا, Qazaq Green جانىنداعى ادىلەتتى ەنەرگەتيكالىق كوشۋ جونىندەگى ايەلدەر كوميتەتى مەن KazEnergy جانىنداعى ايەلدەر ەنەرگەتيكالىق كلۋبىنىڭ باستامالارى كوشباسشىلىقتى دامىتۋعا, تاجىريبە الماسۋعا جانە كاسىبي وسىمگە ىقپال ەتەتىنىن ايتتى.
قازاقستان ەنەرگەتيكالىق كوشۋ ۇدەرىسىنە ايەلدەردى كەڭىنەن تارتۋ; كاسىبي دامۋ مەن مانساپتىق ءوسىم ءۇشىن مۇمكىندىك جاساۋ; وڭىرارالىق ديالوگ پەن ىنتىماقتاستىقتى كەڭەيتۋ باعىتتارىنا باسىمدىق بەرەدى.
«قازاقستان 2030 جىلعا قاراي جەك ۇلەسىن 15%-عا, ال 2050 جىلعا قاراي بالامالى كوزدەردى قوسا العاندا – 50%-عا جەتكىزۋدى ماقسات ەتىپ وتىر», دەلىنگەن ەنەرگەتيكا مينيسترلگىنىڭ حابارلاماسىندا.
قازىرگى تاڭدا جەك سەكتورىندا شامامەن 2000 مامان جۇمىس ىستەيدى, ونىڭ ىشىندە ايەلدەردىڭ ۇلەسى تۇراقتى تۇردە ءوسىپ كەلەدى. بۇل ءۇردىستى جالعاستىرۋ ءۇشىن ايەلدەردىڭ ستراتەگيالىق جوسپارلاۋعا, جوبالاردى باسقارۋعا جانە شەشىم قابىلداۋعا بەلسەندى قاتىسۋىنا جاعداي جاساۋ ماڭىزدى