اۋىل مەن قالا مەكتەبى بىردەي بولادى: جاڭا مينيستر قانداي وزگەرىس جاساماق؟

اسىرەسە, ءبىلىم ساپاسىن ارتتىرۋ, شاعىن جيناقتى مەكتەپتەردە وقۋ پروتسەسىن ۇيىمداستىرۋ, بالالاردىڭ قاۋىپسىزدىگىن قامتاماسىز ەتۋ, «زاڭ مەن ءتارتىپ» قاعيداتى اياسىندا قۇقىقتىق تاربيە بەرۋ, اتا-انالاردىڭ مەكتەپپەن ىنتىماقتاستىعى, ءبىلىم بەرۋ جۇيەسىنىڭ قىزمەتكەرلەرىنىڭ كاسىبي بىلىكتىلىگى ماسەلەلەرىنە ەرەكشە نازار اۋدارىلدى.

مينيستر ءوز جۇمىسىن جامبىل, بايزاق اۋداندارىنداعى توعىزتاراۋ, شوقاي, سارىكەمەر اۋىلدارىندا ورنالاسقان ءبىلىم بەرۋ ۇيىمدارىنان باستادى. ءبىلىم بەرۋ جۇيەسىن جەتىلدىرۋ, ءبىلىم ساپاسىن ارتتىرۋ, وقۋ پروتسەسىن ءتيىمدى ۇيىمداستىرۋعا باسىمدىق بەرگەن ج.سۇلەيمەنوۆا ءار مەكتەپتە پەداگوگيكالىق ۇجىمدارمەن كەزدەسىپ, ساباقتارعا قاتىستى, وقۋشىلارمەن ساباق ۇلگەرىمدەرى, ءبىلىم مەن عىلىمعا قىزىعۋشىلىقتارى تۋرالى سۇقباتتاستى.

«ەلىمىزدە مەملەكەت باسشىسىنىڭ قولداۋىمەن پەداگوگتەر مەن ءبىلىم الۋشىلار ءۇشىن جايلى ءارى ساپالى ءبىلىم بەرۋ ورتاسىن قۇرۋ باعىتىندا كەشەندى جۇمىستار جۇرگىزىلىپ جاتىر. جاستاردىڭ ءبىلىم مەن عىلىمعا قۇشتار, ەڭبەكقور جانە ۇلتتىڭ رۋحاني مۇراسىن ساقتايتىن, الەمدىك ءبىلىم باسەكەسىنە قابىلەتتى ادال ازامات بولىپ قالىپتاسۋىنا ءبىلىم بەرۋ جۇيەسىنىڭ ءاربىر قىزمەتكەرى جاۋاپتى. ءبىزدىڭ مىندەت – اۋىلدا دا, قالادا دا بىردەي مەكتەپ ينفراقۇرىلىمىن قۇرا وتىرىپ, بالالار ءۇشىن ءبىلىمنىڭ جوعارى ساپاسى مەن وزىق ءبىلىم تەحنولوگيالارىن قولجەتىمدى ەتۋ», دەدى جۇلدىز سۇلەيمەنوۆا.

ساپار اياسىندا مينيستر ەڭ الدىمەن توعىزتاراۋ اۋىلىنداعى ت.توقتاروۆ اتىنداعى ورتا مەكتەپكە باردى. مۇندا 100-گە جۋىق وقۋشى ءبىلىم الادى, كورشى اۋىلداردان قاتىناپ وقيتىن بالالار دا بار. بۇل وسى ايماقتاعى شاعىن جيناقتى مەكتەپتەردىڭ ءبىرى. جامبىل وبلىسىندا 149 شاعىن جيناقتى مەكتەپ بار.

كەلەسى ءبىلىم بەرۋ نىسانى – شوقاي اۋىلىنداعى ەكى جىل بۇرىن قولدانىسقا بەرىلگەن زاماناۋي №3 مەكتەپتە 187 بالا وقيدى. مەكتەپ زاماناۋي لينگافوندىق, روبوتوتەحنيكا, ەڭبەككە باۋلۋ سىنىپتارىمەن جابدىقتالعان. ال اۋداندىق ونەر مەكتەبىندە بالالار شىعارماشىلىق, تەحنيكالىق جانە عىلىمي باعىتتا ءتۇرلى روبوتوتەحنيكا, بيوتەحنولوگيا, 3D مودەلدەۋ, بەينەلەۋ ونەرى جانە مۋزىكا ۇيىرمەلەرىندە قوسىمشا ءبىلىم الىپ ءجۇر.

مينيستر سارىكەمەر اۋىلىندا وتكەن جىلى قولدانىسقا بەرىلگەن 600 ورىندىق «كەلەشەك مەكتەبىندە» بولدى. شاعىن اۋىلداعى زاماناۋي مەكتەپتە بالالار ءۇشىن ناقتى عىلىم سالاسىنداعى 3 زەرتحانا, ەرتە جاستان ەڭبەككە بەيىمدەيتىن 2 شەبەرحانا, سونداي-اق, كومپيۋتەرلىك كابينەت پەن كوۆوركينگ ايماقتارى, وقۋ زالدارى قولجەتىمدى.

سونداي-اق جۇلدىز سۇلەيمەنوۆا تاراز قالاسىنداعى وقۋشىلار سارايىن ارالادى. مۇندا بالالارعا قوسىمشا ءبىلىم بەرۋ باعىتىندا 85 شىعارماشىلىق, زياتكەرلىك, عىلىمي-تەحنيكالىق, سپورتتىق ۇيىرمەلەر جۇمىس جاسايدى. ءبىر كۇندە 2500 بالاعا دەيىن ورتالىقتا دارىستەرمەن, جاتتىعۋلارمەن قامتىلادى.

جامبىل وبلىسىنا جۇمىس ساپارى بارىسىندا مينيستر بالالاردىڭ قۇقىقتارىن قورعاۋ مەن ولاردىڭ قاۋىپسىزدىگىن قامتاماسىز ەتۋ ماسەلەلەرىنە ارنالعان ۇيلەستىرۋ كەڭەسىنىڭ وتىرىسىنا قاتىستى.