اقش-تىڭ كەنتۋككي شتاتىندا UPS اۆياكومپانياسىنا تيەسىلى McDonnell Douglas MD-11F جۇك ۇشاعى لۋيسۆيلل قالاسىنداعى مۇحاممەد ءالي اتىنداعى حالىقارالىق اۋەجايدان كوتەرىلگەن سوڭ كوپ ۇزاماي اپاتقا ۇشىرادى. وقيعا سالدارىنان جەتى ادام قازا تاپتى, دەپ حابارلايدى Egemen.kz.
اقش-تىڭ ازاماتتىق اۆياتسيا فەدەرالدىق باسقارماسى (FAA) مەن Aviation Safety Network اگەنتتىگىنىڭ مالىمەتىنشە, UPS كومپانياسىنىڭ 2 976 ءنومىرلى رەيسى گونولۋلۋعا بەت العان. ۇشاق بورتىندا بولعان ءۇش ەكيپاج مۇشەسىنىڭ بارلىعى قازا تاپقان.
الدىن الا دەرەكتەر بويىنشا, ۇشاق قۇلاعان كەزدە اۋەجاي ماڭىنداعى بىرنەشە عيماراتقا سوعىلىپ, جەردەگى ءتورت ادام مەرت بولعان. تاعى ون ءبىر ادام اۋىر جاراقات الىپ, اۋرۋحاناعا جەتكىزىلگەن.
كۋاگەرلەر اپات كەزىندە قۋاتتى جارىلىس پەن اسپانعا كوتەرىلگەن قويۋ قارا ءتۇتىندى بايقاعاندارىن ايتقان. جەرگىلىكتى بيلىك اۋەجاي ماڭىندا توتەنشە جاعداي جاريالاپ, 8 شاقىرىمدىق اۋماقتا تۇرعىندارعا shelter-in-place (ورنىندا قالۋ) رەجيمىن ەنگىزدى. بۇل شەشىم ۋلى ءتۇتىننىڭ تارالۋ قاۋپىنە بايلانىستى قابىلدانعان.
UPS Airlines كومپانياسى اپات فاكتىسىن راستادى جانە اقش-تىڭ ۇلتتىق كولىك قاۋىپسىزدىگى كەڭەسىمەن (NTSB) بىرلەسىپ, اپاتتىڭ سەبەپتەرىن انىقتاۋ جۇمىستارىن جۇرگىزىپ جاتقانىن مالىمدەدى.
الدىن الا بولجام بويىنشا, ۇشاقتىڭ ءبىر قوزعالتقىشى اۋەگە كوتەرىلگەننەن كەيىن ىستەن شىققان بولۋى مۇمكىن.