ازەربايجاننىڭ باكين مەملەكەتتىك ۋنيۆەرسيتەتىنىڭ (بمۋ) رەكتورى ەلچين باباەۆ ءبىلىم مەن عىلىم سالاسىنداعى جاھاندىق وزگەرىستەر اياسىندا قازاقستان مەن ازەربايجان جوعارى وقۋ ورىندارىنىڭ ىنتىماقتاستىعى كۇشەيىپ كەلە جاتقانىن اتاپ ءوتتى.
ونىڭ ايتۋىنشا, تسيفرلىق ترانسفورماتسيا, جاساندى ينتەللەكتتىڭ دامۋى, «جاسىل» تەحنولوگيالار مەن باسقارۋداعى ەتيكالىق قاعيداتتار جاڭا جاھاندىق ءبىلىم بەرۋ كۇن ءتارتىبىن قالىپتاستىرۋدا.
«قازاقستان مەن ازەربايجان — ەۋرازيا كەڭىستىگىندەگى ستراتەگيالىق مەملەكەتتەر. ولار عىلىمي ديپلوماتيا مەن اكادەميالىق ءوزارا ءىس-قيمىلدى دامىتۋ ارقىلى ايماقتىق ترانسفورماتسيانىڭ كوشباسشىسى بولۋعا الەۋەتتى», — دەدى ەلچين باباەۆ.
ول بمۋ-ءدىڭ قازاقستاننىڭ جەتەكشى جوعارى وقۋ ورىندارىمەن, سونىڭ ىشىندە ءال-فارابي اتىنداعى قازاق ۇلتتىق ۋنيۆەرسيتەتىمەن, ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىمەن, ەسەنوۆ اتىنداعى كاسپي ۋنيۆەرسيتەتىمەن, ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىمەن جانە ح. دوسمۇحامەدوۆ اتىنداعى اتىراۋ ۋنيۆەرسيتەتىمەن بەلسەندى ارىپتەستىك ورناتقانىن ايتتى.
رەكتوردىڭ سوزىنشە, بمۋ جانىنان اشىلعان اباي ورتالىعى گۋمانيتارلىق بايلانىستاردى نىعايتۋعا جانە قازاق مادەنيەتىن ناسيحاتتاۋعا زور ۇلەس قوسىپ كەلەدى.
ەلچين باباەۆ قازاقستاندىق سەرىكتەستەرمەن بىرلەسىپ بىرقاتار جاڭا باستامالاردى جۇزەگە اسىرۋعا دايىن ەكەنىن جەتكىزدى. ولاردىڭ قاتارىندا بىرلەسكەن اكادەميالىق كەڭەس, عىلىمي-زەرتتەۋ جانە يننوۆاتسيالىق قور, سونداي-اق جاس عالىمدار جەلىسىن قۇرۋ جوسپارلانعان. بۇل جوبالار جاستاردىڭ عىلىمي-زەرتتەۋ قىزمەتىن, يننوۆاتسيالىق ازىرلەمەلەرىن جانە اكادەميالىق ۇتقىرلىعىن قولداۋعا باعىتتالعان.
سونداي-اق ول 2025 جىلدىڭ ناۋرىز ايىندا باكۋدە وتكەن Study in Kazakhstan كورمەسىنىڭ جانە وسى اپتادا ۇيىمداستىرىلعان جاساندى ينتەللەكت ەتيكاسى جونىندەگى بىرلەسكەن كونفەرەنتسيانىڭ تابىستى وتكەنىن اتاپ ءوتتى. رەكتوردىڭ ايتۋىنشا, ازەربايجان جاستارىنىڭ قازاقستاندا ءبىلىم الۋعا جانە عىلىمي جوبالاردى ىسكە اسىرۋعا دەگەن قىزىعۋشىلىعى ارتىپ كەلەدى.