الماتى وبلىسىندا جول ەرەجەسىن ورەسكەل بۇزىپ, دريفت جاساعان جۇرگىزۋشىلەر ۇستالدى, دەپ جازادى Egemen.kz.
الەۋمەتتىك جەلىدە الماتى وبلىسى شامالعان اۋىلى ماڭىندا تۇسىرىلگەن ۆيدەو تارادى. كادرلاردا بىرنەشە جۇرگىزۋشى جولدىڭ بويىندا دريفت جاساپ, وزگە كولىك جۇرگىزۋشىلەرىنىڭ ومىرىنە قاۋىپ توندىرگەنى بايقالادى.
پوليتسيا تەكسەرىس جۇرگىزۋ بارىسىندا وقيعاعا قاتىسقان بارلىق تۇلعا انىقتالىپ, اۋداندىق پوليتسيا بولىمشەسىنە جەتكىزىلگەن.
انىقتالعانداي, قۇقىق بۇزۋشىلار قاراساي اۋدانىنىڭ تۇرعىندارى – 1999, 2003 جانە 2007 جىلى تۋعان ازاماتتار. ولارعا قاتىستى اكىمشىلىك قۇقىق بۇزۋشىلىق تۋرالى كودەكستىڭ جەتى بابى بويىنشا اكىمشىلىك ماتەريالدار تولتىرىلدى. بارلىق كولىك قۇرالدارى ارنايى ايىپ تۇراعىنا قويىلىپ, جۇرگىزۋشىلەر كولىك قۇرالىن باسقارۋ قۇقىعىنان 6 اي مەرزىمگە ايىرىلدى. سونىمەن قاتار, پوليتسيا قىزمەتكەرلەرى قۇقىق بۇزۋشىلارمەن پروفيلاكتيكالىق اڭگىمە جۇرگىزىپ, ولارعا قولدانىستاعى زاڭناما تالاپتارى مەن وزدەرىنىڭ جاۋاپسىز ارەكەتتەرىنىڭ سالدارىن ءتۇسىندىردى. پوليتسيا مۇنداي زاڭ بۇزۋشىلىقتار تەك وزدەرىنىڭ عانا ەمەس, باسقا دا جول قوزعالىسىنا قاتىسۋشىلاردىڭ ءومىرى مەن قاۋىپسىزدىگىنە تىكەلەي قاۋىپ توندىرەتىنىن اتاپ ءوتتى, - دەپ حابارلادى الماتى وبلىسى پد ءباسپاسوز قىزمەتى.
الماتى وبلىسى.