سولتۇستىك قازاقستان وبلىسى پوليتسيا دەپارتامەنتى باستىعىنىڭ ءبىرىنشى ورىنباسارى اسقار مۇحامەتقاليەۆ جىل باسىنان بەرى پوليتسيا 770 كگ ەسىرتكى تاركىلەگەنىن مالىمدەدى. بۇل كورسەتكىش – بىلتىرعىدان ارتىق. بيىلعى 9 ايدا ەسىرتكىگە قاتىستى 214 قىلمىس تىركەلگەن بولسا, بىلتىر بۇل سان 187 بولعان ەدى. تىركەلگەن قىلمىستاردىڭ 100-دەن استامى – ساتۋ فاكتىلەرى.
«ج ۇلىنقۇرتتىڭ» جاستار اراسىندا جايىلىپ بارا جاتقانى بەلگىلى بولىپ وتىر. جەڭىل اقشا تابۋدى كوكسەگەن جاستار ەسىرتكىنى ءوزى قولدانباسا دا زيپ-قالتاشالارعا بولگەنى ءۇشىن عانا بىرنەشە جىل ءومىرىن قاپاستا وتكىزۋگە ءماجبۇر بولادى. ويتكەنى زاڭعا سايكەس, بۇل – اۋىر قىلمىس.
وبلىستا 9 ايدا عانا ءىرى كولەمدە ەسىرتكىنى جاسىرۋ فاكتىلەرى 7 رەت اشىلدى. سونداي-اق 7 رەت كونتراباندالىق جولمەن وبلىس اۋماعىنا وتكىزىلگەن ەسىرتكى ترافيگى انىقتالعان. ەسىرتكىنى جارنامالاعانى ءۇشىن 4 رەت قىلمىستىق ءىس قوزعالعان.
وسى مەرزىم ىشىندە وبلىستىڭ ەسىرتكىگە قارسى كۇرەس باسقارماسىنىڭ قىزمەتكەرلەرى 10 فيتوناركوزەرتحانانى اشكەرەلەپ, شامامەن 800 كيلو ەسىرتكى قۇرالدارىن تاركىلەگەن. ونىڭ ىشىندە 5 كيلوعا جۋىق سينتەتيكالىق ەسىرتكى جانە 700 كيلودان استام ماريحۋانا بار.
ەسىرتكىگە قارسى كۇرەستە وبلىس پينكەرتوندارى وڭىرگە ەسىرتكى جەتكىزەتىن 7 ارنانى انىقتاپ, جولىن كەستى. ماسەلەن, 7 ساۋىردە قالاعا كىرەبەرىستە «Daewoo Nexia» اۆتوكولىگى توقتاتىلىپ, ونى جۇرگىزگەن 26 جاستاعى استانالىق تۇرعىننان جارتى كيلوعا جۋىق سينتەتيكالىق ەسىرتكى تابىلدى. سوت ونى 7 جىلعا باس بوستاندىعىنان ايىرۋ جازاسىنا كەستى. سونداي-اق پەتروپاۆل قالاسىنا 20 قىركۇيەكتە كەلگەن 22 جاستاعى استانا تۇرعىنىنان ەرەكشە ءىرى كولەمدەگى پسيحوتروپتىق زاتتار تابىلدى. تاركىلەۋ بارىسىندا ونىڭ ماشيناسىنان مەفەدروننىڭ انالوگى بار 34 تۇيىنشەك تابىلدى. سونىمەن قاتار جالدامالى پاتەرىنەن تاعى 60 تۇيىنشەك شىقتى. بارلىعى 104 گرامم بولعان وسىناۋ سينتەتيكالىق ەسىرتكى جۇزدەگەن «قالتاشا» تۇرىندە تاراتىلۋى مۇمكىن ەدى. جەدەل ۇستاۋدىڭ ناتيجەسىندە عانا قالا اۋماعىندا ەسىرتكىنىڭ كەڭ تارالۋىنا جول بەرىلمەدى.
جۋىردا وسى جىلدىڭ باسىندا ۇستالعان پەتروپاۆلدىڭ 32 جاستاعى تۇرعىنىنا سوت بولىپ, 7 جىلعا باس بوستاندىعىنان ايىرىلدى. ول ينتەرنەت ارقىلى جاسالعان «جەڭىل تابىس» تابۋدىڭ جولدارى تۋرالى حابارلاندىرۋعا قىزىعىپ, سينتەتيكالىق ەسىرتكى ساتۋمەن اينالىساتىن ونلاين-دۇكەندەردىڭ بىرىندە «وراۋشى» بولىپ جۇمىس ىستەي باستاعان. كۋراتورىنىڭ تاپسىرماسىمەن ول جاسىرىنعان جەرلەردەگى ءىرى كولەمدەگى ەسىرتكىلەردى ۋاقتاپ, ناشاقورلارعا ساتۋ ءۇشىن زيپ-قالتاشالارعا ءبولىپ وتىرعان. كۋراتورى مۇنداي ءىستى قاۋىپسىز دەپ ۇقتىرعان. الايدا 32 جاستاعى ازامات ەسىرتكىمەن بايلانىستى ءىستىڭ ءبارى قىلمىس ەكەنىن بىلمەي قالۋى مۇمكىن ەمەس-ءتى. اقىرىندا ول پەتروپاۆلدىڭ شەتكى ايماقتارىنىڭ بىرىندە ۇستالدى. جالدامالى پاتەرىنەن جەدەل ۋاكىلدەر 200 گرامنان اسا مەفەدرون جانە α-PvP زاتى بار پاكەتتەردى تاركىلەدى. سونىمەن قاتار كۇدىكتىگە ارنالعان جاسىرىن قويمادان جارتى كيلودان اسا سينتەتيكالىق ەسىرتكى تابىلدى. بۇل جىل باسىنان بەرى سولتۇستىك قازاقستان وبلىسىندا تاركىلەنگەن سينتەتيكالىق ەسىرتكىنىڭ ەڭ ءىرى پارتيالارىنىڭ ءبىرى بولدى.
جىل باسىنان بەرى سقو-دا ەسىرتكى ساتۋ كۇدىگىمەن 40-تان اسا ادام ۇستالدى, ولاردىڭ 36-سى – 25 جاسقا دەيىنگى جاستار. ەرەكشە ءىرى كولەمدە ەسىرتكى ساتۋ 7 جىلدان 12 جىلعا دەيىن باس بوستاندىعىنان ايىرۋ جازاسىن قاراستىرادى.
قازىر پوليتسەيلەر ستۋدەنتتەر مەن جوعارى سىنىپ وقۋشىلارى اراسىندا تۇراقتى تۇردە پروفيلاكتيكالىق جۇمىستار جۇرگىزىپ كەلەدى. 40 مىڭنان اسا جاسوسپىرىمدەر مەن ستۋدەنتتەر 700-دەن اسا اقپاراتتىق, سپورتتىق جانە كرەاتيۆتى ءىس-شارالارعا قاتىستى.
پەتروپاۆل