اقتاۋ قالاسىندا پوزيترون-ەميسسيالىق توموگرافيا (پەت/كت) ورتالىعى اشىلدى. باتىس وڭىرلەرى اراسىندا تۇڭعىش رەت ماڭعىستاۋ وبلىسىندا اشىلعان ورتالىقتىڭ ماقساتى – قاتەرلى ىسىك سياقتى كۇردەلى اۋرۋلاردىڭ رەتسيديۆىن ەرتە كەزەڭدە انىقتاۋ, جوعارى تەحنولوگيالى مەديتسينالىق قىزمەتتى تۇرعىندارعا قولجەتىمدى ەتۋ.
ورتالىق پەت/كت زەرتتەۋىنەن وتۋگە استانا, الماتى قالالارىنا بارۋعا ءماجبۇر بولاتىن ماڭعىستاۋ وبلىسى مەن كورشى وڭىرلەردىڭ تۇرعىندارىنا ۋاقىت پەن شىعىندى ۇنەمدەۋگە ءارى جاساندى ينتەللەكتىنىڭ كومەگىمەن زاماناۋي دياگنوستيكا جاساۋعا مۇمكىندىك بەرەدى.
ماڭعىستاۋ وبلىسى اكىمى ءباسپاسوز قىزمەتىنىڭ مالىمدەۋىنشە, ورتالىق جىلىنا 2000-نان استام زەرتتەۋ جۇرگىزىپ, 25 جاڭا جۇمىس ورنىن قۇرادى. العاشقى كۇننىڭ وزىندە بىرنەشە پاتسيەنت پەت/كت زەرتتەۋىنەن ءوتتى. مەديتسينالىق جابدىقتار گەرمانيا, اقش, وڭتۇستىك كورەيادان جەتكىزىلگەن.
جوبا «Orhun Medical» كومپانياسى مەن ماڭعىستاۋ وبلىسى اكىمدىگىنىڭ قولداۋىمەن جۇزەگە استى. 2024 جىلعى 4 جەلتوقساندا وبلىس اكىمى نۇرداۋلەت قيلىباي مەملەكەت باسشىسىنىڭ تاپسىرماسىنا سايكەس «Orhun Medical» جشس-ءنىڭ باس ديرەكتورى ديريك گيونەنچپەن ارنايى كەزدەسىپ, ماڭعىستاۋ تۇرعىندارىنىڭ شەتەلدە ەمدەلۋگە جۇمسايتىن شىعىندارىن ازايتۋ, ەل ىشىندە مەديتسينالىق قىزمەتتەردىڭ قولجەتىمدىلىگىن ارتتىرۋ ماقساتىندا زاماناۋي ونكولوگيالىق ورتالىق اشۋ, قىزمەتكەرلەردى وقىتۋ جونىندە ۋاعدالاسقان بولاتىن.
ءوڭىر باسشىسى نۇرداۋلەت قيلىباي پەت/كت ورتالىعىنىڭ اشىلۋىن ايماقتاردا جوعارى تەحنولوگيالى مەديتسينالىق كومەكتى دامىتۋدىڭ ماڭىزدى قادامى دەپ اتاپ ءوتتى.
– مەملەكەت باسشىسى دەنساۋلىق ساقتاۋ سالاسىن دامىتۋعا باسا ءمان بەرىپ كەلەدى. ەلىمىزدىڭ باتىس وڭىرىندە تۇڭعىش رەت قاتەرلى ىسىك سەكىلدى اۋرۋلاردى ەرتە انىقتايتىن ورتالىق ءبىزدىڭ وبلىستا اشىلىپ وتىر. ەندى جەرگىلىكتى تۇرعىندار الىسقا بارماي, وسىندا تولىققاندى تەكسەرۋدەن وتە الادى. ەرتە دياگنوستيكا قولجەتىمدى بولعان سايىن, دەرتتىڭ اسقىنعان تۇرلەرىن انىقتاۋ كورسەتكىشى دە تومەندەيدى. وسى ورايدا, جوباعا قولداۋ كورسەتكەن ۇكىمەتكە, دەنساۋلىق ساقتاۋ مينيسترلىگىنە العىس بىلدىرەمىز, – دەدى نۇرداۋلەت قيلىباي.
قاتەرلى ىسىك اۋرۋى كوبەيىپ تۇرعان كەزەڭدە مۇنداي ورتالىقتىڭ بولۋى وتە ماڭىزدى. دەرەكتەرگە سۇيەنسەك, 2025 جىلدىڭ 7 ايىندا ماڭعىستاۋ وبلىسىندا قاتەرلى ىسىكتىڭ ءتۇرلى ساتىسىندا 562 جاعداي تىركەلگەن. اتاپ ايتقاندا, 312 ناۋقاس 1-2 ساتىسىندا, 36 ناۋقاس 3-4 ساتىسىندا, 157 ناۋقاس 0-1 ساتىسىندا انىقتالعان. العاش رەت 4-ساتىسىندا انىقتالعاندار سانى 57 جاعدايدى قۇرادى.
اۋىر دەرتكە شالدىققانداردى ەرتە انىقتاۋ ارقىلى تۇرعىندارعا ءومىر سىيلاۋعا سەپ بولاتىن ورتالىقتىڭ اشىلۋى – ءوڭىر مەديتسيناسىنا قوسىلعان تىڭ مۇمكىندىك.
ماڭعىستاۋ وبلىسى