مەملەكەت باسشىسى قاسىم-جومارت توقاەۆتىڭ تاپسىرماسىمەن قولعا الىنعان «كەلەشەك مەكتەپتەرى» جوباسى اياسىندا جامبىل وبلىسىندا بۇعان دەيىن ءتورت مەكتەپتىڭ ىرگەسى قالانسا, رەسپۋبليكا كۇنى مەرەكەسى اياسىندا قورداي اۋدانىندا تاعى ەكى ءبىلىم ۇياسى شاكىرتتەرگە ەسىگىن ايقارا اشتى. زاماناۋي جابدىقتارمەن قامتىلعان جاڭا مەكتەپتەر ۋاقىت سۇرانىسىنا ساي بوي كوتەرگەن.
قورداي اۋدانىنا قاراستى قاراسۋ جانە قاراكەمەر اۋىلدارىندا قونىستانعان جەرگىلىكتى حالىقتىڭ ارمانى ورىندالدى. ەندى مۇندا زامان تالابىنا ساي ءبىلىم بەرەتىن سۋ جاڭا ءبىلىم ورداسى بار. جاڭادان سالىنعان ءبىلىم وشاقتارىنىڭ اشىلۋ سالتاناتىنا قاتىسقان ءوڭىر باسشىسى ەربول قاراشوكەەۆ ءوڭىردىڭ ءبىلىم سالاسىن وركەندەتۋگە, پرەزيدەنت قاسىم-جومارت توقاەۆتىڭ تاپسىرماسىن وبلىس اۋماعىندا جۇيەلى تۇردە جۇزەگە اسىرۋعا بارىنشا دەن قويىلعانىن اتاپ ءوتتى. سونداي-اق اعارتۋشى سالاعا جەرگىلىكتى اتقارۋشى بيلىك تاراپىنان جان-جاقتى قولداۋ كورسەتۋ جۇمىسى ارمەن قاراي دا جالعاساتىنىن تىلگە تيەك ەتتى.
«وڭىردە كەيىنگى ۋاقىتتا ءبىلىم سالاسىنىڭ جۇمىسىن جانداندىرۋ ماقساتىندا زامان كوشىنە ساي ءبىلىم وشاقتارى بوي كوتەرىپ جاتقانىن جەرگىلىكتى جۇرت كورىپ, ءبىلىپ وتىر. مەكتەپ سالۋ – بۇل تەك عيمارات سالۋ ەمەس, ەلدىڭ بولاشاعىن, جاس وركەننىڭ ەرتەڭىن قالىپتاستىرۋ. ويتكەنى ءاربىر ءبىلىم ۇياسى – بالا ارمانىنىڭ جاڭا تاراۋى, ۇلتتىڭ رۋحاني قاينارى, مەملەكەتتىڭ بەرىك تىرەگى. بۇل – وسكەلەڭ ۇرپاققا دەگەن قامقورلىقتىڭ, ەل ەرتەڭىنە دەگەن جاۋاپكەرشىلىكتىڭ ايقىن كورىنىسى. سوندىقتان دا اعارتۋشى سالاعا دەگەن قامقورلىق ەشقاشان تولاستاماق ەمەس.
مەملەكەت باسشىسى قاسىم-جومارت توقاەۆتىڭ «بۇگىن سانالى ۇرپاق تاربيەلەي الساق, ەرتەڭ زامان كوشىنىڭ باسىندا جۇرەمىز» دەگەنى ءبارىمىزدىڭ جادىمىزدا جاڭعىرىپ تۇرعانى ءسوزسىز. بۇل ءسوز – ءبىلىم سالاسىنىڭ باستى ۇستانىمى, ءاربىر ۇستازدىڭ جۇرەگىندەگى سەنىم مەن جاۋاپكەرشىلىكتىڭ نىشانى. مۇعالىم مۇنى قاپەردەن شىعارماعانى ءجون.
ءبىلىم – ۇلتتىڭ جۇرەگى, مەكتەپ – ونىڭ بۇلكىلدەپ سوققان تامىرى. قاراسۋ اۋىلىندا ەسىگىن ايقارا اشقان جاڭا ءبىلىم ورداسى – سول جۇرەكتىڭ جاڭاشا سوعۋى, ەل ءۇمىتىن اقتار بولاشاقتىڭ باستاۋى بولسىن. ۇستازدارعا جەمىستى ەڭبەك پەن تولايىم تابىس تىلەيمىن. جاڭا مەكتەپ جاڭاشىلدىقتىڭ ورداسىنا اينالسىن», دەدى ەربول قاراشوكەەۆ قاراسۋلىقتاردى جاڭا ءبىلىم وشاعىنىڭ اشىلۋىمەن قۇتتىقتاپ.
پرەزيدەنت تاپسىرماسىنا سايكەس «كەلەشەك مەكتەپتەرى» ۇلتتىق جوباسى اياسىندا بوي كوتەرگەن جاڭا ءبىلىم وشاقتارىندا وقۋشىلاردىڭ ساپالى ءبىلىم الۋىنا بارلىق جاعداي قاراستىرىلعان. ەكى مەكتەپ تە 300 ءبىلىم الۋشىعا ارنالىپ سالىنعان.
قاراسۋ ەلدى مەكەنىندەگى №53 ءبىلىم ورداسىندا 28 وقۋ كابينەتى, 80 ورىندىق ءماجىلىس زالى, اسحانا, كىتاپحانا (30 ورىندىق وقۋ زالى بار), 667 شارشى مەتر اۋماقتى قامتيتىن سپورتزال بار. بۇدان بولەك STEM, روبوتتەحنيكا جانە كومپيۋتەر سىنىپتارى قاراستىرىلعان ەكەن. سونداي-اق ءبىلىم الۋشىلاردىڭ زەيىنىن دامىتۋعا ارنالعان كوۆوركينگ ورتالىعى, 3 شەبەرحانا مەن 3 عىلىمي زەرتحانا دا جۇمىس ىستەيدى. ءبىر سوزبەن ايتقاندا, وقۋشىلاردىڭ ۋاقىت كوشىنەن قالماي, جان-جاقتى دامۋىنا بارلىق جاعداي قاراستىرىلىپ وتىر.
جاڭا مەكتەپتىڭ بوي كوتەرۋى قاراسۋ حالقىنىڭ باس اۋرۋىنا اينالعان ءۇش اۋىسىمدى وقىتۋ ماسەلەسىن تولىقتاي شەشىپ وتىرعانىن ايتا كەتكەن ءجون. ەندى اۋىلداعى 232 ءبىلىم الۋشى سۋ جاڭا ءبىلىم ۇياسىندا الاڭسىز ءبىلىم نارىمەن سۋسىندايدى. قازىرگى كەزدە ءبىلىم ورداسىندا 25 ۇستاز جەمىستى ەڭبەك ەتىپ جاتىر. ولاردىڭ قاتارىندا پەداگوگ-زەرتتەۋشى, پەداگوگ-ساراپشى, پەداگوگ-مودەراتور ساناتىنداعى بىلىكتى ۇستازدار دا بار.
«قالا مەن اۋىلدىڭ قاراكوزدەرىنە بىردەي قاراپ, تەڭ مۇمكىندىك قالىپتاستىرىپ وتىرعان مەملەكەت باسشىسى قاسىم-جومارت توقاەۆقا ايتار العىسىمىز شەكسىز. ىلگەرىدە مۇنداي ىرگەلى, بارلىق جاعداي جاسالعان مەكتەپتەردى تەك قالادان عانا كورسەك, ەندى ءوزىمىز تۇراتىن التىن بەسىك اۋىلدا دا سالىنىپ جاتىر. اۋىل بالالارىنىڭ ساپالى ءبىلىم الۋىنا قولدان كەلگەنشە قولداۋ كورسەتىپ وتىرعان بارلىق ازاماتقا العىستان باسقا ايتارىمىز جوق.
ەندى مەكتەپ تابالدىرىعىن اتتاعان شاكىرتتەر ەسەيگەندە ۇزدىك بىلىمىمەن دارالانىپ, ەلىن, جەرىن سۇيەتىن ادال ازاماتتار ساناتىن تولىقتىرادى دەگەن سەنىمىم زور. ويتكەنى ولاردىڭ الاڭسىز ءبىلىم الۋىنا, اباي ارمانداعان «تولىق ادام» بولىپ قالىپتاسۋىنا مەملەكەت تاراپىنان بارلىق جاعداي جاسالعانىن كوز كورىپ وتىر. سوندىقتان وقۋشىلار ەرىنبەي ىزدەنىس ىزىنە ءتۇسۋى كەرەك. ەندى تەك بالالارىمىز ءۇمىتتى اقتاسىن دەگەن تىلەك قانا بار», دەيدى اۋىل اقساقالى تۇرعان جاسىباەۆ.
قاراكەمەر اۋىلىندا بوي كوتەرگەن №54 مەكتەپتە دە وقۋشىلاردىڭ الاڭسىز ءبىلىم الۋىنا بارلىق جاعداي قاراستىرىلعان. ۋاقىت سۇرانىسىنا ساي بوي كوتەرگەن جاڭا ءبىلىم ۇياسىندا ءبىلىم الۋشىلاردىڭ قاۋىپسىزدىگىنە ايرىقشا باسىمدىق بەرىلگەن.
«جاڭادان بوي كوتەرگەن مەكتەبىمىز ماماندىق تاڭداۋىمىزعا مول سەپتىگىن تيگىزەتىنىنە كۇمانىم جوق. بولاشاقتا ديزاينەر بولسام دەگەن ارمانىم بار. سۋ جاڭا ءبىلىم ورداسىنداعى كابينەتتەردى تولىق ارالاپ شىقتىم. مۇندا قىز بالالارعا ارنالعان شەبەرحانا بار ەكەن. جاڭا شەبەرحانادا بىزگە قاجەتتى دۇنيەنىڭ بارلىعى سامساپ تۇر. بولاشاقتا ءوزىم تاڭدايتىن ماماندىقتىڭ العاشقى قادامىن ءدال وسى جاڭا ءبىلىم ورداسىنان باستايتىنىما بەك قۋانىشتىمىن», دەيدى ىزدەنىس ىزىنە تۇسكەن ءبىلىم الۋشىلاردىڭ ءبىرى ايزەرە ەربول قۋانىشىمەن ءبولىسىپ.
ءوڭىر باسشىسى ەربول قاراشوكەەۆتىڭ ايتۋىنشا, وبلىس اۋماعىنداعى حالىق تىعىز ورنالاسقان قورداي اۋدانىندا جاڭا ءبىلىم وردالارىنىڭ بوي كوتەرۋى مۇنداعى ءبىلىم بەرۋ الەۋەتىن ايتارلىقتاي ارتتىرادى. سونداي-اق اۋىلدىق جەردەگى بالالاردىڭ ساپالى ءبىلىم الۋىنا بارىنشا مۇمكىندىك تۋعىزىپ وتىر.
جالپى العاندا كەيىنگى جىلدارى ءوڭىردىڭ ءبىلىم سالاسىن وركەندەتۋ ماقساتىندا اۋقىمدى جۇمىس اتقارىلىپ جاتىر. ناقتىراق ايتساق, وسى جىلى 26 ءبىلىم نىسانىنىڭ قۇرىلىس جۇمىسى جۇرگىزىلىپ جاتىر. جىل سوڭىنا دەيىن 10 مەكتەپ پەن 5 قوسىمشا عيمارات پايدالانۋعا بەرىلمەك. ال 2026 جىلى تاعى 11 جاڭا ءبىلىم ورداسىنىڭ ىرگەسى قالانادى.
جامبىل وبلىسى,
قورداي اۋدانى