قازاننىڭ قارا داۋىلى ادەتتەگىدەي ۇشى-قيىرى شەكسىز دە شەتسىز ورماندى شايقاپ ءوتىپ, قىزىلدى-سارى جاپىراقتاردى ساۋ ەتكىزگەن. ماڭگى جاسىل شىرشانىڭ پىسكەن بۇرشىكتەرى دە ساتىرلاپ جەرگە تۇسكەن. شاشىلعان بۇرشىك ەرتەڭ-اق جايقالعان ورمانعا اينالادى. ول ءۇشىن ورمانشىلار بۇرشىكتەردى بۇگىن جيناپ, ارنايى تۇقىم باقتارعا ەگەدى.
ورمانشىلاردىڭ جۇمىسى تابيعاتتا تىنىعىپ جۇرگەندەي كورىنەتىن شىعار. الايدا, التايدىڭ بار بايلىعىن قورعاپ, قورىپ جۇرگەن وسىلار. الا جازداي ورتتەن قورعاسا, قىس تۇسە بۇرشىك جينايدى, زاڭسىز اعاش كەسۋدىڭ الدىن الادى. جىل ون ەكى اي تىنىمسىز ەڭبەك ەتەدى.
ەتەكتە قارا كۇز بولعانىمەن, باتىس التايدىڭ بيىگىنە باياعىدا قار تۇسكەن. توبىقتان قار كەشىپ بۇرشىك جيناۋعا ەر ازاماتتار عانا ەمەس, ورمانشى ايەلدەر دە ارالاسادى. سونىڭ ءبىرى نازيرا سايدىعۇماروۆا. ونىڭ ومىرلىك سەرىگى دامير دە وسى ورمانشىلىقتا قىزمەت ەتەدى.
– ءبىز وتباسىمىزبەن تاۋدى, دالانى جاقسى كورەمىز. ءار مامان ءوز ءىسىن ۇناتسا, جۇمىستىڭ قيىندىعى جوق. سول ءۇشىن دە جۇمىسقا بارىمىزدى سالامىز. قازىرگى مىندەتىمىز, بۇرشىك جيناۋ, ونى كەپتىرۋ, تازالاۋ, – دەيدى ورمانشى ارۋ نازيرا سايدىعۇماروۆا.
ورماننىڭ وسىناۋ مۇلگىگەن تىنىشتىعى ەش بۇزىلمايتىنداي. دەگەنمەن اقىرعان ايۋ, جورتقان بۇعى مۇندا از ەمەس. ولار دا قورىقتىڭ قورعاۋىندا. تۇمسا تابيعاتتان تىنىشتىق كەتسە, اڭنىڭ اۋىپ كەتۋى دە وپ-وڭاي.
ريددەر ورمان شارۋاشىلىعى ديرەكتورىنىڭ ورىنباسارى دامير سايدىعۇماروۆتىڭ ايتۋىنشا, 300 مىڭ گەكتار القاپتى الىپ جاتقان مەكەمەدە 160-تان استام مامان قىزمەت ەتەدى. ءار ورمانشىلىق شاشىلىپ جاتقان بۇرشىكتىڭ 3–4 تونناسىن جيناپ, وتكىزەدى. ولار جىلىجايدا ابدەن تامىرلانىپ, كۇش العان سوڭ عانا دالالى جەرگە ەگىلەدى. ابدەن ءوسىپ كەتكەنشە بالاشا كۇتىپ-باپتايدى. ءسويتىپ, ورمان قورىن ۇدايى تولىقتىرىپ وتىرادى.
شىعىس قازاقستان وبلىسى,
ريددەر قالاسى