تاياۋدا كوكشەتاۋدىڭ سەكسەننەن استام تۇرعىنى باسپانالى بولدى. جايلى پاتەرلەر رەنوۆاتسيا باعدارلاماسى اياسىندا جانە الەۋمەتتىك جاعىنان از قامتىلعان وتباسىلارعا بەرىلدى, دەپ جازادى Egemen.kz.
پاتەر كىلتتەرىن وبلىس اكىمى مارات احمەتجانوۆ تابىس ەتتى. اكىم ءوز سوزىندە ەل پرەزيدەنتىنىڭ حالىقتىڭ ءال-اۋقاتىن ارتتىرۋ مەن ءومىر ءسۇرۋ ساپاسىن جاقسارتۋعا ەرەكشە كوڭىل ءبولىپ وتىرعانىن اتاپ ايتتى. بۇگىنگى شارا وسىنداي ماڭىزدى باعىتتاردىڭ ءبىرى. ايتا كەتەرلىگى, سوڭعى ەكى جىل ىشىندە بەس مىڭعا جۋىق مۇقتاج وتباسى باسپانامەن قامتىلعان. بۇل بۇعان دەيىنگى جەتى جىلدا اتقارىلعان جۇمىسقا تەڭ. وسىنداي ىلكىمدى شارالار تۇرعىن ءۇي كەزەگىن قىسقارتۋعا مۇمكىندىك بەرىپ وتىر.
«كۇنى بۇگىنگە دەيىن سوناۋ 1964 جىلى سالىنعان اپاتتى ۇيدە تۇرىپ كەلدىك. ءتىپتى, جوندەۋگە كەلمەيتىن جاعدايدا ەدى. بۇگىن ارمانىمىز ورىندالدى», دەيدى باسپانالى بولعاننىڭ ءبىرى تاسليما توقبەرگەنوۆا.
بيىل وبلىس بويىنشا ءتۇرلى ساناتتاعى ازاماتتارعا, سونىڭ ىشىندە الەۋمەتتىك جاعىنان از قامتىلعان ادامدارعا 700-گە جۋىق پاتەر بەرىلگەن. جىل سوڭىنا دەيىن بارلىعى 1200 پاتەر تاپسىرۋ جوسپارلانىپ وتىر.
كوكشەتاۋ