بۇگىن رەسپۋبليكا كۇنىنە ارنالعان سالتاناتتى جيىندا جەتىسۋ وبلىسىنىڭ اكىمى بەيبىت يساباەۆ ءوڭىردىڭ 35 تۇرعىنىنا مەملەكەتتىك ناگرادالاردى تابىس ەتتى. ماراپاتتار ەل تاۋەلسىزدىگىن نىعايتۋعا جانە الەۋمەتتىك-ەكونوميكالىق, مادەني, قوعامدىق ءومىردىڭ دامۋىنا ۇلەس قوسقان ازاماتتارعا بەرىلدى. شارا تالدىقورعانداعى ب. ريموۆا اتىنداعى دراما تەاترىندا ءوتتى, دەپ جازادى Egemen.kz.
ءوڭىر باسشىسى قۇتتىقتاۋ سوزىندە مەملەكەتتىك ەگەمەندىك تۋرالى دەكلاراتسيانىڭ قابىلدانعانىنا 35 جىل تولعانىن اتاپ ءوتىپ, ونىڭ تاۋەلسىز قازاقستاننىڭ ىرگەتاسىن قالاۋداعى تاريحي رولىنە توقتالدى. سونداي-اق سوڭعى ءۇش جىلداعى ءوڭىر جەتىستىكتەرىن ەلدىڭ بىرلىگى مەن ەڭبەكقور ازاماتتاردىڭ تاباندى ەڭبەگىنىڭ ناتيجەسى دەپ باعالادى.
– مەملەكەت باسشىسى قاسىم-جومارت توقاەۆ ايتقانداي, بۇل قۇجات – ەلىمىزدىڭ دەربەستىگىن ايقىنداعان تاريحي قادام. ەندىگى مىندەت – بەيبىتشىلىك پەن بىرلىكتى ساقتاپ, جەتىستىكتەرىمىزدى ەسەلەۋ, – دەدى وبلىس اكىمى.
بەيبىت يساباەۆ ءوز سوزىندە بيىلعى «جۇمىسشى ماماندىقتار جىلى» اياسىندا «تالدىقورعان جىلۋ سەرۆيس» كاسىپورنىنىڭ سلەسارى مارات مەرگەنباەۆتىڭ مەملەكەت باسشىسى قولىنان مەملەكەتتىك ماراپات العانىن دا اتاپ ءوتتى.
ناگرادالار قاتارىندا «قۇرمەت», «پاراسات» وردەندەرى, ءىىى دارەجەلى «ەڭبەك داڭقى» وردەنى, سونداي-اق «ەرەن ەڭبەگى ءۇشىن» جانە «شاپاعات» مەدالدارى بار. ماراپاتتالعاندار اراسىندا ءتۇرلى سالانىڭ وكىلدەرى – كوممۋنالدىق شارۋاشىلىق, ءبىلىم, مادەنيەت, دەنساۋلىق, كاسىپكەرلىك جانە اۋىل شارۋاشىلىعى قىزمەتكەرلەرى بار.
ولاردىڭ قاتارىندا تالدىقورعان قالاسى اكىمىنىڭ كەڭەسشىسى ۆاديم درۋزين, الاكول اۋدانىنىڭ شارۋاشىلىق باسشىسى بولاتبەك قاپسالاموۆ, «سارقان جىلۋ» جۇرگىزۋشىسى قاناپيا تۇقىمبەكوۆ, تەكەلى قالاسىنىڭ ەلەكترومونتەرى الەكساندر ۆينوكۋروۆ, مۇعالىم ايناگۇل جيەنباەۆا جانە باسقا دا ەڭبەك مايتالماندارى بار.
ماراپات يەلەرى ءوز اسەرلەرىن ءبولىسىپ, مەملەكەت باسشىسىنا جانە وبلىس باسشىلىعىنا العىس ايتتى.
سالتاناتتى جيىن جەتىسۋ وبلىسىنىڭ ونەر ۇجىمدارى ۇيىمداستىرعان مەرەكەلىك كونتسەرتپەن تۇيىندەلدى.