ءباسى جوعارى دودا

ءدۇبىرلى دودا الدىنداعى ءباسپاسوز جيىنىندا تۋريزم جانە سپورت ۆيتسە-ءمينيسترى سەرىك جاراسباەۆ, NOMAD اكادەمياسىنىڭ ديرەكتورى رۋسلان جەتىباەۆ, الەم چەمپيوناتىنىڭ كۇمىس جۇلدەگەرى, لوندون جازعى وليمپياداسىنىڭ كۇمىس جۇلدەگەرى, جازعى ازيا ويىندارىنىڭ بەس دۇركىن جۇلدەگەرى, وڭتۇستىككورەيالىق دجۋ سە حۋك, ۇستەل تەننيسى فەدەراتسياسىنىڭ ۆيتسە-پرەزيدەنتى ەلسيار قاناعاتوۆ قاتىستى. 29 قازانعا دەيىن جالعاساتىن حالىقارالىق سايىس استاناداعى «Beeline Arena» كەشەنىندە وتەدى. NOMAD اكادەمياسىنىڭ ديرەكتورى رۋسلان جەتىباەۆ بۇل سايىستى جىل سايى­ن ۇيىمداستىرۋعا ىقىلاستى ەكەنىن اڭعارتتى.

«پرەزيدەنت كۋبوگى ەلىمىزدىڭ سپورتتىق برەندىنە اينالىپ كەلەدى, مۇندا جاس تالانتتار مەن داڭقتى تەننيسشىلەر تارتىسقا تۇسەدى. بۇل – جارىس قانا ەمەس, وسى سپورت ءتۇرىن دامىتۋ مەن حالىقارالىق سپورتتىق ىنتىماقتاستىقتى نىعايتۋدىڭ باس­تاۋى», دەيدى ءتۋرنيردى ۇيىمداس­تىرۋشى.

حالىقارالىق تۋرنيرگە 14 ەلدەن 300-دەن استام سپورتشى قاتىسادى. ولاردىڭ قاتارىندا وڭتۇستىك كورەيا, قىتاي, ماجارستان, مىسىر, مالايزيا, يران, ساۋد ارابياسى سىندى ەلدەردىڭ دە تەننيسشىلەرى بار. ەلىمىزدىڭ سپورتشىلارى دا جۇلدەدەن ءۇمىتتى. تۋرنيرگە الەمدىك ITTF رەيتينگىندەگى ۇزدىكتەردىڭ قاتىسۋى دودانىڭ ءباسى جوعارى ەكەنىن اڭعارتادى. جالپى جۇلدە قورى – 115 000 اقش دوللارى.

ايگىلى سپورتشى دجۋ سە حۋك قازاق ەلىنىڭ قوناقجايلىعىنا العىسىن جاۋ­دىرىپ, ەلىمىزدە ۇستەل تەننيسىنىڭ قارقىندى دامىپ جاتقانىنا رازى­لىعىن جەتكىزدى. تاجىريبەسىمەن ءبو­لىسىپ, شەبەرلىك ساعاتىن وتكىزۋگە ىقى­لاستى ەكەنىن دە ءمالىم ەتتى.

پرەزيدەنت كۋبوگى اياسىندا الەمدىك ۇستەل تەننيسى جۇلدىزدارىنىڭ قا­تىسۋىمەن شوۋ-ماتچ تا وتەدى. وعان سپورت اڭىزدارى, الەمنىڭ ەكس-ءبىرىنشى راكەتكاسى – سيۋي سين (قىتاي) مەن ونىڭ جەرلەسى, الەم چەمپيوناتىنىڭ كۇمىس جۇلدەگەرى فان بو, الەم چەمپيونى, ەۋروپا چەمپيوناتتارىنىڭ بىرنەشە دۇركىن جۇلدەگەرى ۆەرنەر شلاگەر (اۋستريا), سونداي-اق دجۋ سە حۋك (كورەيا) سىندى ساڭلاقتار قاتىسىپ, شەبەرلىگىن كورسەتەدى.

«2027 جىلى ۇستەل تەننيسىنەن الەم چەمپيوناتى ءبىزدىڭ ەلدە وتەدى. سوندىقتان مۇنداي دەڭگەيدەگى ءىرى جارىستى ۇيىمداستىرۋ تاجىريبەمىزدى شىڭداۋىمىزعا سەپتىگىن تيگىزەدى. بۇل حالىقارالىق تۋرنير الەمدىك دوداعا دايىندىق رەتىندە ۇيىمداستىرىلىپ وتىر. حالىقارالىق دودادا سپورت­شىلارىمىزدىڭ قارىمىن دا باي­قايمىز», دەدى س.جاراسباەۆ ءباسپاسوز ءماسليحاتىندا.

ءتورت جاس ساناتىندا ءھام كوماندالىق سايىستا كيريلل گەراسيمەنكو, الان قۇرمانعاليەۆ, ايدوس كەنجەعۇلوۆ, يسكاندەر حاركي, زاۋرەش اقاشەۆا, سارۆينوز ميركاديروۆا, جانەركە كوشكىمباەۆا, انەل باقىتقا سەنىم ارتىلادى.

پرەزيدەنت كۋبوگى ءتۋرنيرى سپورت مادەنيەتىن دامىتۋعا, جاستار اراسىندا ۇستەل تەننيسىن ناسيحاتتاپ, حا­لىقارالىق ىنتىماقتاستىقتى نىعايتۋ ماقساتىندا ۇيىمداستىرىلىپ وتىر.