استاناداعى كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىندە رەسپۋبليكا كۇنىنە وراي مادەنيەت جانە اقپارات سالاسىنىڭ قىزمەتكەرلەرىن ماراپاتتاۋ ءراسىمى ءوتتى. مەملەكەت باسشىسى قاسىم-جومارت توقاەۆتىڭ جارلىعىمەن تاعايىندالعان مەملەكەتتىك ناگرادالاردى وتاندىق مادەنيەت, ونەر جانە مەديا سالاسىنىڭ دامۋىنا ەلەۋلى ۇلەس قوسقان 62 قىزمەتكەرگە مادەنيەت جانە اقپارات ءمينيسترى ايدا بالاەۆا تابىستادى.
ءىس-شارا بارىسىندا مينيستر مەملەكەت باسشىسى رەسپۋبليكا كۇنى قارساڭىندا ءبىر توپ ازاماتتى مەملەكەتتىك ناگرادامەن ماراپاتتاۋ تۋرالى جارلىققا قول قويعانىن اتاپ ءوتتى. ولاردىڭ قاتارىندا حالىقپەن ەتەنە جۇمىس ىستەپ جۇرگەن قاراپايىم ەڭبەك ادامدارى دا بار. سونىڭ ىشىندە اقپارات, مادەنيەت, ونەر سالالارىندا قاجىرلى ەڭبەگىمەن تانىلعان ماماندار دا قۇرمەتكە بولەندى.
ماراپات يەلەرىنىڭ قاتارىندا «استانا وپەرا» مەملەكەتتىك وپەرا جانە بالەت تەاترىنىڭ, ك.بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ, ە.راحماديەۆ اتىنداعى مەملەكەتتىك اكادەميالىق فيلارمونيانىڭ, ر.باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنىڭ جانە باسقا دا مادەنيەت مەكەمەلەرىنىڭ قىزمەتكەرلەرى بار.
سونىمەن قاتار «Egemen Qazaqstan» جانە «كازاحستانسكايا پراۆدا» گازەتتەرىنىڭ, «حابار» اگەنتتىگى مەن «Qazaqstan» تەلەارناسىنىڭ, رەسپۋبليكالىق ۇلتتىق اكادەميالىق كىتاپحانا جانە باسقا دا ۇيىمداردىڭ قىزمەتكەرلەرى ەلەۋسىز قالمادى. ولاردىڭ قاتارىندا ارىپتەسىمىز, كوپ جىلدان بەرى باس باسىلىمدا ەسەلى ەڭبەك سىڭىرگەن قونىسباي شەجىمبايعا «ەرەن ەڭبەگى ءۇشىن» مەدالى تاپسىرىلدى. سونداي-اق «كازاحستانسكايا پراۆدا» گازەتىنىڭ ءفوتوتىلشىسى يگور بۋرگاندينوۆ پەن ەكونوميكا ءبولىمىنىڭ رەداكتورى يۋري فومەنكو «قۇرمەت» وردەنىنىڭ يەگەرى اتاندى.
سالتاناتتى ءراسىمنىڭ سوڭىندا ەلىمىزدىڭ جەتەكشى شىعارماشىلىق ۇجىمدارى ونەرپازدارىنىڭ قاتىسۋىمەن كونتسەرت ۇيىمداستىرىلدى.