ۇلىتاۋ وبلىسىندا اۆتوموبيل كولىگى جانە اۆتوجول سالاسى قىزمەتكەرلەرىنىڭ كاسىبي مەرەكەسىنە ارنالعان سالتاناتتى ماراپاتتاۋ ءراسىمى ءوتتى. يگى شارادا ەلىمىزدىڭ جول-كولىك ينفراقۇرىلىمىن دامىتۋعا ەلەۋلى ۇلەس قوسىپ جۇرگەن سالا ماماندارىنىڭ ەڭبەگى ەلەندى, دەپ حابارلايدى Egemen.kz.
ۇلىتاۋ وبلىسىنىڭ اكىمى داستان رىسپەكوۆ سالا قىزمەتكەرلەرىن مەرەكەمەن قۇتتىقتاپ, ەل ەكونوميكاسى مەن ءوڭىردىڭ وركەندەۋىنە قوسقان قوماقتى ۇلەسىن اتاپ ءوتتى.
«سىزدەردىڭ قاجىرلى ەڭبەكتەرىڭىزدىڭ ارقاسىندا ەلىمىزدە جولاۋشىلار مەن جۇك تاسىمالىنىڭ ۇزدىكسىزدىگى قامتاماسىز ەتىلىپ, اۆتوجول ينفراقۇرىلىمى جىلدان جىلعا جاڭارىپ كەلەدى. قالالىق كولىك جۇيەسىن جاڭارتۋ جانە قالا كەلبەتىن جاقسارتۋ, تۇرعىندارعا جايلى قوزعالىستى قامتاماسىز ەتۋ ماقساتىندا 17 جاڭا اۆتوبۋس ساتىپ الىندى. سونىمەن قاتار مەملەكەت باسشىسىنىڭ تاپسىرماسىنا سايكەس, بيىل ۇلىتاۋ وبلىسى بويىنشا ءتورت تەمىرجول ۆوكزالىنا جاڭعىرتۋ جۇمىستارى قولعا الىندى. الداعى ۋاقىتتا جەزقازعان, قاراجال, جاڭاارقا جانە قىزىلجار ستانتسيالارى جاڭا كەيىپكە ەنبەك», دەدى وبلىس اكىمى.
ەڭبەگىمەن ەلەۋلى بولعان سالا قىزمەتكەرلەرى «قۇرمەتتى جولشى» توسبەلگىسى, قر كولىك مينيسترلىگىنىڭ قۇرمەت گراموتاسى جانە العىسحاتى, ۇلىتاۋ وبلىسى اكىمىنىڭ قۇرمەت گراموتاسى جانە العىسحاتىمەن ماراپاتتالدى.
سالتاناتتى جيىن سوڭى جەرگىلىكتى ونەرپازدار مەن ەلىمىزگە تانىمال ەسترادا جۇلدىزدارى قانات ۇمبەتوۆ پەن بالجان بيداشتىڭ قاتىسۋىمەن وتكەن كونتسەرتتىك باعدارلاماعا ۇلاستى.
ۇلىتاۋ وبلىسى