ەلىمىزدە ينكليۋزيۆتى ساياسات حالىقارالىق كونۆەنتسيا تالابىنا سايكەس دامىپ وتىر. بۇل – مەملەكەتتىك ساياساتتىڭ باسىم باعىتىنىڭ ءبىرى.
«ينكليۋزيۆتى ءبىلىم بەرۋ» ۇعىمى قازاقستان رەسپۋبليكاسىنىڭ ء«بىلىم تۋرالى» زاڭىندا بەكىتىلگەن, بۇل بارلىق بالانىڭ ەرەكشە ءبىلىم بەرۋ قاجەتتىلىگى مەن جەكە مۇمكىندىگىن ەسكەرە وتىرىپ, ءبىلىم الۋ قۇقىعىنا كەپىلدىك بەرەدى.
زاڭنامالىق دەڭگەيدە ەرەكشە ءبىلىم بەرۋ قاجەتتىلىكتەرى بار بالالاردى بارلىق ءبىلىم دەڭگەيىندە وقىتىپ, ارنايى جاعداي جاساۋعا مەملەكەتتىك كەپىلدىك بەرىلگەن. سونداي-اق ءبىلىم بەرۋ قاجەتتىلىگىن باعالاۋدى, پسيحولوگيالىق-پەداگوگيكالىق قولداۋدى, وقۋ جوسپارىن, باعدارلاماسىن جانە وقۋشى جەتىستىگىن باعالاۋ جۇيەسىنىڭ ارتۇرلىلىگى مەن يكەمدىلىگىن قامتاماسىز ەتۋگە قاتىستى نورمالار ەنگىزىلگەن.
بۇگىندە ەلىمىزدە 6 مىڭنان استام مەكتەپتە (90%) ينكليۋزيۆتى ءبىلىم بەرۋگە جاعداي جاسالعان. سونىڭ ىشىندە كەدەرگىسىز قولجەتىمدىلىك جانە قاجەتتى ماماندارمەن قامتاماسىز ەتىلدى. ينكليۋزيۆتى بىلىممەن 100 مىڭنان استام ەرەكشە ءبىلىم بەرۋ قاجەتتىلىگى بار بالا قامتىلعان.
مەملەكەت باسشىسىنىڭ تاپسىرماسى بويىنشا «كەلەشەك مەكتەپتەرى» ۇلتتىق جوباسى بەلسەندى جۇزەگە اسىپ وتىر. جوبا اياسىندا 460 مىڭ وقۋشى ورنى اشىلادى.
«كەلەشەك مەكتەپتەرى» جوباسى اياسىندا پەداگوگتەر مەن وقۋشىلارعا ىڭعايلى ءارى قاۋىپسىزدىك جاعدايى جاسالعان. ەرەكشە ءبىلىم بەرۋ قاجەتتىلىگى بار بالالارعا ارنالعان كەڭىستىكتى بەيىمدەۋ قاراستىرىلعان. سونداي-اق پسيحولوگ, الەۋمەتتىك پەداگوگ, لوگوپەد جانە باسقا ماماندارعا ارنايى كابينەت جابدىقتالعان. مۇندا ارنايى پەداگوگتەر, پەداگوگ-پسيحولوگتەر, پەداگوگ-اسسيستەنتتەر سياقتى بىلىكتى ماماندار جۇمىس ىستەيدى. ولار ەرەكشە قاجەتتىلىگى بار بالالارعا كومەكتەسەدى.
«كەلەشەك مەكتەپتەرى» ينكليۋزيۆتى ءبىلىم قاعيداسىن كادىمگى جالپى ءبىلىم بەرەتىن مەكتەپ سەكىلدى تولىق جۇزەگە اسىرادى. ءبىلىم ورداسىندا عيماراتتاردى جوبالاۋ كەزىندە كەدەرگىسىز ورتا تالابى ەسكەرىلگەن: پاندۋس, جەدەلساتى, كەڭ وتكەل, ارنايى سانيتارلىق توراپ جانە ناشار كورەتىندەر مەن ەستۋ قابىلەتى تومەن ادامدارعا ارنالعان ناۆيگاتسيا جۇيەسى جاسالعان.
وقۋ ۇدەرىسى – بارشاعا قولجەتىمدى. ونىڭ اياسىندا جەكە وقۋ باعدارلاماسى, پەداگوگ-اسسيستەنتتەر مەن پسيحولوگيالىق-پەداگوگيكالىق قولداۋ جۇزەگە اسادى. سونىمەن قاتار STEM زەرتحانالارى مەن ينتەراكتيۆتى تاقتالار سياقتى زاماناۋي تەحنولوگيانى ەرەكشە ءبىلىم بەرۋ قاجەتتىلىكتەرى بار بالالارمەن بىرگە ءاربىر وقۋشى پايدالانادى.
كەيىنگى ەكى جىلدا جاڭا فورماتتاعى 176 مەكتەپ سالىندى. بيىل جىل سوڭىنا دەيىن تاعى 41 مەكتەپ پايدالانۋعا بەرىلەدى.
بۇلبۇل ەلەۋسىنوۆا,
وقۋ-اعارتۋ مينيسترلىگى ينكليۋزيۆتى جانە ارنايى ءبىلىم بەرۋ دەپارتامەنتىنىڭ ديرەكتورى