انتاليا قالاسىندا وتكەن حالىقارالىق Antalya Tourism Fair 2025 تۋريستىك كورمەسى اياسىندا ماڭعىستاۋ وبلىسىنىڭ تۋريزم باسقارماسى, تۇرىك كومپانياسى Uluer Group جانە قازاقستان تۋريستىك قاۋىمداستىعى (قتق) اراسىندا تۋريزم سالاسىنداعى ىنتىماقتاستىق تۋرالى مەموراندۋمعا قول قويدى. قۇجاتقا ماڭعىستاۋ وبلىسىنىڭ تۋريزم باسقارماسىنىڭ باسشىسى ەرسىن يبراشەۆ, Uluer Group كومپانياسىنىڭ باس ديرەكتورى سامي ماحمۇت ۋلۋەر جانە قتق پرەزيدەنتى روزا اسانباەۆا قول قويدى, دەپ حابارلايدى Egemen.kz ماڭعىستاۋ وبلىستىق قوعامدىق كوممۋنيكاتسيا ورتالىعىنا سىلتەپ.
ماڭعىستاۋ وبلىستىق تۋريزم باسقارماسىنىڭ مالىمەتىنشە, تاراپتار ماڭعىستاۋ وبلىسىنىڭ تۋريستىك الەۋەتىن ىلگەرىلەتۋگە, بىرلەسكەن ينۆەستيتسيالىق جوبالاردى ىسكە اسىرۋعا, سونداي-اق تۇراقتى جانە وقيعالى تۋريزم سالاسىندا تاجىريبە الماسۋعا باعىتتالعان ءوزارا ءتيىمدى ىنتىماقتاستىقتى دامىتۋ تۋرالى ۋاعدالاستى. مەموراندۋمعا قول قويۋ قازاقستان مەن تۇركيا اراسىنداعى حالىقارالىق ارىپتەستىكتى نىعايتۋ جولىنداعى ماڭىزدى قادام بولدى.
Uluer Group كومپانياسى – كاپپادوكيا مەن تانزانيادا اۋەشار ۇشىرۋ باعىتىندا جەتەكشى وپەراتورلاردىڭ ءبىرى. كومپانيا «Mangystau Balloon Festival» جوباسىن جۇزەگە اسىرۋعا قىزىعۋشىلىق ءبىلدىردى. باستاما اياسىندا 2026 جىلدان باستاپ بوزجىرا, تۇزبايىر, شەرقالا جانە ايراقتى سەكىلدى كورىكتى تابيعي لاندشافتتار ۇستىندە اۋەشارلار شەرۋىن ۇيىمداستىرۋ جوسپارلانىپ وتىر. جوبا كومپانيانىڭ ءوز قاراجاتى ەسەبىنەن ىسكە اسىرىلاتىن بولادى.
بيىل جىلدىڭ سوڭىنا دەيىن Uluer Group كومپانياسىنىڭ باس ديرەكتورىنىڭ ماڭعىستاۋ وبلىسىنا ساپارى جوسپارلانعان. ساپار بارىسىندا الەۋەتتى لوكاتسيالاردى زەردەلەۋ, مارشرۋتتاردى تەحنيكالىق باعالاۋ جانە اۋە شارى ءتۋريزمىن ىسكە اسىرۋعا قولايلى ايماقتاردى انىقتاۋ كوزدەلىپ وتىر. اتالعان جوبانى جۇزەگە اسىرۋ قازاقستاننىڭ جاڭا تۋريستىك برەندىنە اينالىپ, شەتەلدىك ينۆەستيتسيا تارتۋعا, جۇمىسپەن قامتۋدى ارتتىرۋعا, سونداي-اق ماڭعىستاۋ وبلىسىنىڭ ورتالىق ازياداعى وقيعالى تۋريزم ورتالىعى رەتىندەگى مارتەبەسىن نىعايتۋعا مۇمكىندىك بەرەدى.
ماڭعىستاۋ وبلىسى