استانا. 19 اقپان. 2014 جىلدىڭ قورىتىندىسى بويىنشا پاۆلودار وبلىسىنداعى جالدامالى جۇمىسشىلار سانى 331,5 مىڭعا جەتكەن. بۇل تۋرالى ranking.kz ساراپتامالىق رەسۋرسىنا سىلتەمە جاساعان pavlodarnews.kz ءتىلشىسى حابارلادى.
ساراپشىلاردىڭ مالىمەتىنشە, وڭىردەگى جالدامالى جۇمىسشىلاردىڭ قاتارى سالىستىرمالى كەزەڭگە قاراعاندا 2 مىڭعا ارتقان.
ساراپتامالىق رەسۋرستىڭ اقپاراتىنا سۇيەنسەك, وبلىستاعى جالدامالى جۇمىسشىلار ەكونوميكالىق تۇرعىداعى بەلسەندى تۇرعىنداردىڭ 75,5 پايىزىن قۇرايدى.
رەسمي تۇردە جالاقى الۋشىلار سانى بويىنشا الماتى وبلىسى كوش باستاپ تۇر. بۇل ايماقتا 648,3 مىڭ جالدامالى قىزمەتكەر بار. ياعني, ءوسىم 7,9 پايىزدى قۇرايدى. ال پاۆلودار وبلىسىندا بۇل كورسەتكىش 1 پايىز عانا.
تۇرعىنداردىڭ جالپى سانى قاتارىنان جۇمىسپەن قامتىلعاندار بويىنشا پاۆلودار ءوڭىرى ۇزدىك ۇشتىكتى تۇيىقتايدى. قازىرگى تاڭدا وبلىستا جالدامالى قىزمەتتە ەڭبەك ەتەتىندەر 43,9 پايىز بولىپ وتىر.
ساراپشىلاردىڭ ايتۋىنشا, 2014 جىلدىڭ جەلتوقسانىندا جاسالعان قورىتىندى بويىنشا ەلىمىزدىڭ 6,1 ملن. حالقى جالدامالى قىزمەتكەر بولىپ تابىلادى.
مۇرات ايتقوجا.