قازاقستاننىڭ جۇپتىق سىنداعى ۇزدىگى, الەمنىڭ 13-راكەتكاسى اننا دانيلينا جاپونيا استاناسىندا ءوتىپ جاتقان WTA 500 ساناتىنداعى توكيو ءتۋرنيرىنىڭ شيرەك فينالىنا جولداما الدى, دەپ حابارلايدى Egemen.kz.
سەربيالىق ارىپتەسى الەكساندرا كرۋنيچپەن تاندەم قۇرعان قازاقستاندىق سپورتشى العاشقى اينالىمدا مەكسيكالىق دجۋليانا ولموس پەن يندونەزيالىق الديلا سۋتدجيادجيادان باسىم تۇسكەن. ءبىر ساعاتقا جۋىققا سوزىلعان ماتچ دانيلينا – كرۋنيچ جۇبىنىڭ ايقىن جەڭىسىمەن اياقتالدى — 6:1, 6:3.
سونىمەن قاتار, ەلەنا رىباكينا دا توكيو كورتىندا ونەرىن جالعاستىرادى. الەمنىڭ جەتىنشى راكەتكاسى سانالاتىن رىباكينانىڭ العاشقى قارسىلاسى بۇگىن بەلگىلى بولدى. ءبىرىنشى اينالىمدا كانادالىق لەيلا فەرناندەس (WTA – 22) گرەكيالىق ماريا ساككاريدى (WTA – 54) 7:6 (7:5), 6:4 ەسەبىمەن جەڭىپ, كەلەسى اينالىمدا رىباكينامەن كەزدەسۋگە جولداما الدى.
ال قىتايدىڭ گۋانچجوۋ قالاسىندا ءوتىپ جاتقان WTA 250 تۋرنيرىندە قازاقستاننىڭ تاعى ءبىر وكىلى, الەمنىڭ 76-راكەتكاسى يۋليا پۋتينتسەۆا العاشقى اينالىمدا رەسەيلىك الينا كورنەەۆانى (WTA – 165) 7:6 (7:2), 4:6, 6:4 ەسەبىمەن ۇتتى. ەكى جارىم ساعاتقا جۋىققا سوزىلعان تارتىستى ماتچتا پۋتينتسەۆا جەڭىستى ج ۇلىپ الىپ, جارىستىڭ شيرەك فينالىنا شىعۋ مۇمكىندىگىن ساقتاپ قالدى.
كەلەسى كەزەڭدە يۋليا پۋتينتسەۆا الەمدىك رەيتينگتىڭ 96-ساتىسىنداعى گەرمانيالىق ەللا زايدەلمەن كورتقا شىعادى.