جاپونيادا العاش رەت ايەل پرەمەر-مينيستر بولىپ سايلاندى

وسىلايشا, ساناە تاكايتي جاپونيا تاريحىندا پرەمەر-مينيستر قىزمەتىنە تاعايىندالعان العاشقى ايەل اتاندى.

داۋىس بەرۋ قورىتىندىسى بويىنشا تاكايتي 465 دەپۋتاتتىڭ ىشىنەن 237 داۋىس جيناپ, ءبىرىنشى كەزەڭدە جەڭىسكە جەتتى. ونىڭ باستى باسەكەلەسى – كونستيتۋتسيالىق-دەموكراتيالىق پارتيانىڭ جەتەكشىسى يوسيحيكو نودا 149 داۋىسقا يە بولدى.

داۋىس بەرۋگە ءبىر كۇن قالعاندا لدپ, پارلامەنتتە كوپشىلىككە يە بولماعانىنا قاراماستان, كونسەرۆاتيۆتىك «جاپونيانى جاڭارتۋ قوعامى» پارتياسىمەن وداق قۇرىپ, تاكايتيدىڭ سايلانۋىنا كەپىلدىك جاسادى.

الداعى تاۋلىكتە ساناە تاكايتي جاڭا ۇكىمەت قۇرامىن جاساقتايتىن بولادى.

جاپون باق-تارىنىڭ مالىمەتىنشە, سىرتقى ىستەر ءمينيسترى قىزمەتىنە بۇرىن (2019–2021 جج.) وسى لاۋازىمدا بولعان توسيميتسۋ موتەگي قايتا ورالادى.

ال پارتياىشىلىك سايلاۋداعى قارسىلاسىنىڭ ءبىرى, 44 جاستاعى سيندزيرو كويدزۋمي (بۇرىنعى پرەمەر دزيۋنيتيرو كويدزۋميدىڭ ۇلى) قورعانىس ءمينيسترى قىزمەتىن اتقارىپ, بۇل قىزمەتتى يەلەنگەن ەڭ جاس مينيستر بولماق.

64 جاستاعى تاكايتي – كونسەرۆاتيۆتىك كوزقاراستاعى ساياساتكەر, ءداستۇرلى قۇندىلىقتاردى قورعاۋدى جاقتايدى.

ول جاپونيادا ءبىر جىنىستى نەكەنى زاڭداستىرۋعا قارسى پىكىر ءبىلدىرىپ كەلەدى;

ايەلدىڭ يمپەراتور تاعىنا وتىرۋ مۇمكىندىگىنە قارسىلىق تانىتقان;

جاپون كونستيتۋتسياسىنىڭ 9-بابىن قايتا قاراۋ, ياعني ەلدىڭ قورعانىس كۇشتەرىن قۇرۋ قۇقىعىن زاڭ جۇزىندە بەكىتۋ يدەياسىن قولدايدى.

تاكايتي توكيونىڭ ياسۋكۋني عيباداتحاناسىنا ءجيى بارىپ, ونى ساياسي پىكىرتالاستاردىڭ نىسانى ەتپەۋ كەرەك دەپ ەسەپتەيدى. بۇل عيباداتحانا ازيا ەلدەرىندە جاپون ءميليتاريزمىنىڭ سيمۆولى سانالادى.

ساياساتكەر ۇلتشىل “نيپپون كايگي” (جاپونيا كەڭەسى) ۇيىمىنىڭ بەلسەندى مۇشەسى. ۇيىم جاپونيانىڭ ەكىنشى دۇنيەجۇزىلىك سوعىس كەزىندە جاساعان كەيبىر قىلمىستارىن جوققا شىعارادى.

ءبىلىمى بويىنشا كيبەرقاۋىپسىزدىك سالاسىنىڭ مامانى. 2022 جىلدىڭ 4 مامىرىندا رەسەيدىڭ سانكتسيالىق تىزىمىنە ەنگىزىلگەن بولاتىن – ول كەزدە تاكايتي لدپ-نىڭ ساياسي كەڭەسىن باسقارعان.

ساراپشىلاردىڭ پىكىرىنشە, تاكايتي ۇكىمەتىنىڭ ساياسي باعىتى ايتارلىقتاي وزگەرىسكە ۇشىرامايدى. ول سايلاۋ ناۋقانى كەزىندە جاپون-امەريكالىق اليانستى نىعايتۋدى, ەلدىڭ قورعانىس الەۋەتىن ارتتىرۋدى جانە اقش-تىڭ ورتالىق بارلاۋ باسقارماسىنا ۇقساس قۇرىلىم قۇرۋدى ۇسىنعان.

تاكايتي قاۋىپسىزدىك سالاسىنداعى قازىرگى احۋالدى «ەكىنشى دۇنيەجۇزىلىك سوعىس اياقتالعالى بەرى ەڭ كۇردەلى كەزەڭ» دەپ سيپاتتادى.

ايتا كەتسەك, بۇل سايلاۋ باستاپقىدا 2027 جىلى ءوتۋى ءتيىس ەدى, الايدا لدپ مۇشەلەرىنىڭ قىسىمىمەن بۇرىنعى پرەمەر سيگەرۋ يسيبانىڭ وتستاۆكاعا كەتۋ شەشىمىنەن كەيىن مەرزىمىنەن بۇرىن وتكىزىلدى.